Tịn̄ Enyịn ke Mme Utịbe Utom Abasi
1 Ke ofụri usen ita, nnyịn ima isop idem ke Mbono District “Mme Anam Ikọ Abasi.” Nnyịn ima iwọn̄ọde ntịn̄enyịn nnyịn ikpọn̄ ekikere uwem ofụri usen inyụn̄ iwụk ntịn̄enyịn ke utịbe utom Jehovah. Ẹkediomi ndutịm man ofori mbuọtidem nnyịn ke Abasi ye Ikọ esie, man ọsọn̄ọ itie ebuana nnyịn ye enye, onyụn̄ anam ifịk nnyịn ke utom ukwọrọikọ ọsọn̄. Didie ke nnyịn ibọ ufọn ito se ẹkekpepde nnyịn?—John 13:17.
2 Mme Ubon Ẹsụk Ibuot Ẹnọ Ikọ Abasi: Nneme oro “Ẹsụk Ibuot Ẹnọ Ikọ Abasi” ama an̄wam nnyịn ndidụn̄ọde idaha eke spirit ubon nnyịn. Nditọwọn̄ ẹsima ndikpep n̄kpọ. Ntem, ẹma ẹsịn udọn̄ ẹnọ mme ete ye eka emi ẹbakde Abasi ndinam ukpepn̄kpọ Bible ubon edi itiat idakisọn̄ ọnọ edibọp ubon oro ọsọn̄de idem ke n̄kan̄ eke spirit. Ediwak ibuot ufọk ke ẹda ediye uduot ekpri n̄wed Afo Emekeme Ndidi Ufan Abasi! ẹnyene nneme ye n̄kpri nditọ mmọ. Emi ayan̄wam mmọ ndikọri inem inem ye ifụre ifụre itie ebuana ye Jehovah. Mme ete ye eka, ẹkpep nditọ mbufo nte ẹkemede ndiwụk ntịn̄enyịn ke mme ekikere Abasi. Tịn̄ ima emi afo enyenede ọnọ enye ye mme edinam esie. (Ps. 103:2) Ẹnam utom ọtọkiet ndinịm nnyụn̄ nsịm mme utịtmbuba eke spirit nnyụn̄ mbuana ọyọhọ ọyọhọ ke edinam n̄kpọ Jehovah.
3 Ikọ Abasi Ọnọ Usụn̄ Nnyịn Un̄wana: Nnyịn ima ikop idatesịt ndibọ obufa n̄wed oro Ntịn̄nnịm Ikọ Isaiah—Un̄wana ofụri Ubonowo I. Afo okot akpa eboho emi aka anyan adan̄a didie? N̄wed Isaiah ebem iso etịn̄ aban̄a enyene-ndịk ubiereikpe mme idụt unana uten̄e Abasi ọkọrọ ye mme nyayama edidiọn̄ Obio Ubọn̄ eke ikọt Abasi. (Isa. 34:2; 35:10) Enye n̄ko ọbọp mbuọtidem ye uko ke Jehovah ye ke mme usụn̄ unam n̄kpọ esie.—Isa. 12:2-5.
4 Ke ini okotde Ntịn̄nnịm Ikọ Isaiah I, ke ntọn̄ọ ntọn̄ọ afo emekeme ndikụt nte Isaiah okomụmde nsọn̄ọnda esie ke Jehovah akama ke adan̄aemi idiọkido akakande enye okụk. Ke ini ẹkenọde ikot ndidi isụn̄utom Abasi, Isaiah ọkọbọrọ ete: “Se mi, dọn̄ mi utom.” (Isa. 6:8) Nditie n̄kere mban̄a edu unyịmesịt esie eyesịn udọn̄ ọnọ fi ndika iso n̄kwọrọ eti mbụk, enyenede ọyọhọ udeme ke nditie ‘ntiense nnọ kpukpru mme idụt.’—Matt. 24:14.
5 Nnyịn ndinọ ntịn̄enyịn ke mme utom Jehovah ọyọnọ ubom esie ubọn̄. Ntre ẹda ifet edidi mme anam Ikọ Abasi ke ọsọn̄urua!