Ka Iso Kwọrọ Ikọ!
1 Edi uduak Abasi nte “kpukpru owo ẹnyene edinyan̄a, ẹnyụn̄ ẹsịm ifiọk akpanikọ.” (1 Tim. 2:4) Ke ntak emi, enye ọnọ nnyịn utom edikwọrọ eti mbụk. (Matt. 24:14) Edieke ifiọkde ntak emi nnyịn ikpakade iso ikwọrọ ikọ, unana udọn̄ ekededi, m̀mê n̄kpọ ẹkemede ndiwọn̄ọde owo ntịn̄enyịn oro nnyịn isobode, idibiọn̄ọke nnyịn.
2 Ntak Ọsọn̄ọde Eyịre? Odu ediwak n̄kpọ ke ererimbot oro ẹwọn̄ọrede owo ntịn̄enyịn, emi ẹnamde mme owo ẹfre m̀mê ẹda se isiande mmọ mfefere mfefere. Ke ntre, ana nnyịn ika iso nditi mmọ etop edinyan̄a Abasi. (Matt. 24:38, 39) Adianade do, mme idaha ke uwem mme owo ke ẹkpụhọde kpukpru ini. Idem mme idaha ererimbot ẹkeme ndinen̄ede n̄kpụhọde inikiet inikiet. (1 Cor. 7:31, 32a) N̄kpọn̄, urua efen, m̀mê ọfiọn̄ efen, mbon oro nnyịn ikwọrọde ikọ inọ ẹkeme ndisobo mbufa mfịna m̀mê editịmede esịt oro ẹnamde mmọ ẹnen̄ede ẹkere ẹban̄a eti mbụk oro nnyịn idade isọk mmọ. Nte afo udarake nte ke Ntiense oro akadade akpanikọ ọsọk fi ama ọsọn̄ọ eyịre?
3 Man Ikpebe Mbọm Abasi: Jehovah ke ime amayak ini ebe mbemiso ebierede ikpe ọnọ mme idiọkowo. Enye ada nnyịn aka iso ekpe mbon eti esịt ubọk ete ẹwọn̄ọde ẹtiene imọ ẹnyụn̄ ẹnyene edinyan̄a. (2 Pet. 3:9) Nnyịn iyenyene ubiomikpe iyịp edieke itrede ndida etop mbọm Abasi nsọk mme owo nnyụn̄ ntọt mmọ mban̄a nsobo Abasi oro editienede kpukpru mbon oro mîkabakede ikpọn̄ ndiọi usụn̄ mmọ. (Ezek. 33:1-11) Idem okposụkedi owo mîtịmke ikpan̄ utọn̄ inọ ukwọrọikọ nnyịn kpukpru ini, inaha nnyịn idede itek ke ifịk ke ndisịn ofụri ukeme man in̄wam mbon esịt akpanikọ ẹwụt esịtekọm ẹnọ akwa mbọm Abasi.—Utom 20:26, 27; Rome 12:11.
4 Man Iwụt Ima Nnyịn: Ebede ke Jesus Christ, Jehovah Abasi ama ọnọ ewụhọ ete ẹkwọrọ eti mbụk ke ofụri isọn̄. (Matt. 28:19, 20) Idem ke ini mme owo ẹsịnde ndikpan̄ utọn̄, nnyịn imenyene ifet ndiwụt ima ye utuakibuot nnyịn nnọ Abasi ebe ke ndika iso nnam se inende.—1 John 5:3.
5 Nnyịn ikpakam ibiere ndika iso n̄kwọrọ ikọ! Ẹyak nnyịn inam ntre ifịk ifịk ke adan̄aemi osụk edide “usen edinyan̄a” Jehovah.—2 Cor. 6:2.