Nam Ẹdiọn̄ọ Enyịn̄ ye Mme Edinam Jehovah
1 “Mbufo ẹkọm Jehovah; ẹkot enyịn̄ esie: ẹtan̄a ase [“mme edinam,” NW] esie ke otu mme idụt. . . . Esịt ayadat mmọ eke ẹyomde Jehovah.” (Ps. 105:1, 3) Andiwet psalm emi ekewetde mme ikọ oro ama okụt ọkpọkpọ akwa idara ke nditịn̄ nnọ mbon efen mban̄a Jehovah ye mme “mme edinam” esie. Mme edinam ewe? Nte eyịghe mîdụhe mme edinam oro ẹnyenede ebuana ye ubọn̄ ubọn̄ itie edidem Abasi ye eti mbụk “edinyan̄a esie.”—Ps. 96:2, 3; 145:11, 12.
2 Nte nnyịn isan̄ade ikpere ini Editi eke 2001, nnyịn imenyene ekese ntak ndidat esịt mban̄a se Jehovah anamde ye nnyịn. Ke didie? Ye unana mbụme, Udia Mbubịteyo Ọbọn̄ edi n̄kponn̄kan edinam ọnọ kpukpru ata Christian. Edinam en̄wen ibietke enye ke nte enye edide akpan n̄kpọ, enyenede uduak, m̀mê ndutịm. Emi edi ini ọnọ kpukpru nnyịn nditi se Jehovah ye Jesus ẹnamde ndisio usụn̄ edinyan̄a nnọ nnyịn. Eyịghe idụhe nnyịn nte ido edide isidoride enyịn ndikụt akwa n̄kọri ke utom an̄wautom ke ini Editi, nte nnyịn inamde ẹdiọn̄ọ eti mbụk “edinyan̄a”!
3 Nte Afo Ayanam Usiakusụn̄ Unọ Un̄wam? Ke April isua oko n̄wakn̄kan ibat owo edide 22,714 ẹkesịn enyịn̄ nte mme asiakusụn̄ unọ un̄wam. Isua emi, ndi nnyịn imekeme ndinam March ye April ẹdi mme san̄asan̄a ọfiọn̄ n̄kọri ke utom ukwọrọikọ? March enyene Saturday ition, ndien April enyene Sunday ition. Ebede ke ndidiomi ọyọhọ usen utom ukwọrọikọ ke mme utịturua, ediwak asuanetop emi ẹnamde utom ofụri ini ẹmekụt ẹte ke mmimọ imekeme ndinam usiakusụn̄ unọ un̄wam. Man ẹsịm hour 50 oro ẹyomde ke ọfiọn̄, asiakusụn̄ unọ un̄wam enyene ndibiat n̄kpọ nte hour 12 ke urua kiet kiet. Da ntịn̄enyịn kere ban̄a mme ndutịm oro ẹnọde ekikere ẹban̄a ke ekebe odude ke page 4. Nte kiet ke otu emi eyekem ye mme idaha fo? Edieke mîkemke, ndusụk afo emekeme ndinam ndutịm fo nnọ usiakusụn̄ unọ un̄wam ke March ye April emi.
4 Mbiowo ẹkpenyene nditọn̄ọ idahaemi ndidemede ifiopesịt nnyụn̄ n̄n̄wam ke ntatara utom ukwọrọikọ. Isua oko ke esop kiet emi kpukpru mbiowo ye mme asan̄autom unamutom ẹkenamde utom usiakusụn̄ unọ un̄wam, asuanetop 64 ke otu 121 ẹkenam utom usiakusụn̄ unọ un̄wam ke April! Idatesịt ama odu ke esop emi ndikụt asuanetop itiokiet oro mînaha baptism ẹtọn̄ọde ndinọ ibatutom ke March ye April. Ke akpanikọ nnennen ini edi emi nditọwọn̄ ye mbufa owo ndibụp mbiowo m̀mê mmimọ imodot nditọn̄ọ ndibuana ke an̄wa an̄wa utom unọ ikọ ntiense.
5 Ukeme Efen Efen Ẹda Mme Edidiọn̄ Ẹdi: Mme esop oro ẹnịmde akpan utịtmbuba ẹnyụn̄ ẹsịnde ukeme efen efen ẹnyene uwak edidiọn̄. Ndusụk esop ẹkeme ndisọn̄ọ ntịn̄ mban̄a nte ẹkpekụrede utom ke efakutom oro owo mîsiwakke ndinam utom, ẹwụkde ntịn̄enyịn ke mme orụk unọ ikọ ntiense efen, m̀mê ndisọn̄ọ ntịn̄ mban̄a unọ ikọ ntiense urụk ukopikọ—kpa uforo uforo usụn̄ ndisobo mbon oro mîsidụhe ke ufọk ye mbon oro owo mîsikemeke ndisịm.
6 Ndi unana nsọn̄idem m̀mê usọn̄ ekpenyene ndibiọn̄ọ owo ekededi ndibuana ke udomo nte ekekeme ke an̄wautom? Idịghe ke kpukpru idaha. Ke uwụtn̄kpọ, eyenete an̄wan kiet oro edide isua 86 emi ọdọn̄ọde kansa ama anam utom usiakusụn̄ unọ un̄wam ke April kpa ye ukot esie ofụtde. Unọ ikọ ntiense urụk ukopikọ ama anam enye ekeme ndinyene ọyọhọ ebuana ke utom ukwọrọikọ, oforide itoro oro enye ọnọde Jehovah. Emi ama enyene eti utịp ke idem esie ye esop.
7 Tịm Idem Ọfọn nọ Editi: Editi isua emi ọduọ ke April 8. Sia emi edide Sunday, akpana ediwak owo ẹkeme ndidụk. Nnyịn imekeme ndinyene n̄wakn̄kan ibat mme andidụk oro akanam inyenede edieke nnyịn inamde udeme nnyịn ebe ke (1) nnyịn ke idem nnyịn ndidụk ye (2) ndikot mbon en̄wen ẹtiene nnyịn ẹdụk Editi. Anie ke nnyịn ikpokot?
8 Se ọkpọkpọ n̄wetnnịm n̄kpọ utom an̄wautom fo kaban̄a enyịn̄ mbon oro ẹwụtde ndusụk udọn̄ ke akpanikọ, idem okposụkedi afo mûsukaha ubịne mmọ kpukpru ini. Urua iba m̀mê ita mbemiso Editi, wụk ntịn̄enyịn ke ndida n̄wedikot Editi nsọk kpukpru mmọ. Edieke mme idaha fo ẹyakde, se ban̄a nte mbon oro ẹdiyomde ndidụk ẹdisan̄ade.
9 Ke ndusụk esop, owo isidaha kpukpru n̄wedikot Editi oro ẹmịn̄de-mịn̄ inam n̄kpọ. Mme ewetn̄wed esop ẹkpenyene ndikụt nte ke imanam n̄wedikot odu ke eti ini ẹnọ kpukpru owo ndisuan. Afo emekeme nditaip m̀mê ndiwet ini ye ebiet Editi nte eyede ke isọn̄ isọn̄ n̄wedikot oro. Mîdịghe emekeme ndisịn n̄wedikot emi esịnede adres Ufọkmbono Obio Ubọn̄ edieke ẹdinịmde Editi do. Nte n̄kpọ editi, ke ata ediwak idaha ẹkpenyene ndinọ enyeneufọk ke idemesie n̄wedikot Editi.
10 Ti Mbon Oro Mînamke Utom Aba: Edi n̄kpọ idatesịt ke ini eyen ukpepn̄kpọ Bible ayakde idemesie ọnọ Jehovah onyụn̄ ayararede emi ebe ke ndibụhọ ke mmọn̄. Nte ededi, ke isua kiet kiet ndusụk owo ke otu nnyịn ẹsitre ndibuana ye nnyịn, ẹnyụn̄ ẹtre nditịn̄ nnọ mbon en̄wen mban̄a enyịn̄ ye mme edinam Jehovah. Nnyịn imenyene eti ntak ndikere mban̄a oro. Okposụkedi ata ediwak mbon oro mînamke utom aba mîkpọn̄ke akpanikọ, ekeme ndidi mmọ ẹketre ndikwọrọ ikọ ke ntak unana nsịnudọn̄, mme ọkpọkpọ mfịna, m̀mê mme editịmede esịt eken ke uwem. (Matt. 13:20-22) Mbon oro idem ememde ke n̄kan̄ eke spirit ẹyom un̄wam man ẹfiak ẹdi esop mbemiso editịm n̄kpọ Satan emende mmọ emen. (1 Pet. 5:8) Ke ini Editi emi nnyịn iyom ndisịn san̄asan̄a ukeme ndin̄wam kpukpru mbon oro mînamke utom aba oro ẹdotde ẹfiak ẹnyene ebuana ke ndikwọrọ eti mbụk.
11 Ewetn̄wed esop ekpenyene ndinam mme ada ukpepn̄kpọ n̄wed ẹfiọk owo ekededi ke otu mmọ oro mînamke utom aba. Kọmiti Utom Esop ayada usụn̄ ke ndidiomi edika utom ubọkerọn̄ nnọ kpukpru mbon oro mînamke utom aba. Edieke ẹbierede nte ke ọkpọkpọ ukpepn̄kpọ Bible edifọn ye owo oro, esenyịn utom ayanam ndutịm man ẹnọ un̄wam, ke ama okosobo ye mme andibuana eken ke kọmiti utom esop man ẹbiere m̀mê anie editịm ọfọn akan ndinịm ukpepn̄kpọ oro. Okposụkedi mîdiyomke ẹnịm ukpepn̄kpọ oro ke ata anyan ini, owo emi ẹdọhọde enịm ukpepn̄kpọ oro ekeme nditọt ini, mme mfiakn̄ka, ye ukpepn̄kpọ Bible.
12 Ke April isua oko, eyenete an̄wan kiet emi akanamde utom to ke ufọk sịm ufọk ama ọnọ akparawa kiet mme magazine ke efak. Enye ama etịn̄ ete ke n̄wan imọ ekedi Ntiense emi mînamke utom aba. Enye ama obụp ebiet emi Ufọkmbono Obio Ubọn̄ adade onyụn̄ ọdọhọ eyenete an̄wan oro edise imọ ye n̄wan imọ. Nte utịp, ebe ye n̄wan oro ẹma ẹdụk mbono esop oro eketienede ẹnyụn̄ ẹnyịme ukpepn̄kpọ Bible.
13 Tịm Idem nọ N̄kaiso Utom! Andiwet psalm emi akatan̄ade ete ke nnyịn ikpenyene ndinam ẹfiọk enyịn̄ ye mme edinam Jehovah ama adian do ete: “Ẹkwọ ẹnọ enye, ẹbre ẹnọ enye: ẹkere kpukpru mme utịbe n̄kpọ esie. Mbufo ẹbụre ke edisana enyịn̄ esie.” (Ps. 105:2, 3) Ẹyak nnyịn iwụt ke imekere iban̄a akwa enyịn̄ Jehovah ye “mme utịbe n̄kpọ” esie ebe ke ndifori mme ukeme nnyịn ke utom ukwọrọikọ, inamde emi edi akakan ini Editi!
[Ekebe ke page 4]
Nsio Nsio Usụn̄ Ndidiomi Hour 12 ke Urua Man Inam Usiakusụn̄ Unọ Un̄wam
Usen Hour
Monday 1 2 − −
Tuesday 1 − 3 −
Wednesday 1 2 − 5
Thursday 1 − 3 −
Friday 1 2 − −
Saturday 5 4 3 5
Sunday 2 2 3 2
Ofụri Ibat: 12 12 12 12
Ndi kiet ke otu ndutịm emi ọyọfọn ye afo? Edieke mîdifọnke, ntak mûnamke ndutịm idemfo?