N̄wam Mbon Efen Ẹdụk Mme Mbono Esop
1 “Ẹnọ owo ekededi ke n̄kann̄kụk . . . oro enyenede udọn̄ ndidụk mme mbono esop ufiop ufiop ikot ndinam ntre.” Tọn̄ọ nte ntọt emi okodu ke nsiondi Zion’s Watch Tower eke November 1880, Mme Ntiense Jehovah ẹmesịn ifịk ke ndinọ mme owo ikot ndisop idem ọtọkiet man ẹbọ item Bible. (Edi. 22:17) Emi edi akpan ubak utuakibuot akpanikọ.
2 Edi Akpan N̄kpọ Ndidụk: Ke ini nnyịn ibuanade ye esop esisụn̄ọ ke mme edidiọn̄. Nnyịn ikabade itịm imehe ye utịbe utịbe Abasi nnyịn, Jehovah. Ke esop, nnyịn isop idem ọtọkiet man idi se ‘Jehovah etemede.’ (Isa. 54:13) Esop esie owụt n̄kaiso ndutịm item Bible oro odụride nnyịn etịm ekpere enye onyụn̄ ọnọde eti un̄wam ke ndida “ofụri uduak Abasi” nsịn ke edinam. (Utom 20:27; Luke 12:42) Mme mbono esop ẹsinọ ọkpọkpọ ukpep ke usọ unọ ukpep ke Ikọ Abasi. Mme n̄kpọ editi oro ẹnọde ke N̄wed Abasi ẹn̄wam nnyịn ndidara itie ebuana oro okụtde unen ye mbon efen ye Jehovah ke idemesie. Ndidụk nsan̄a ye mbon oro ẹmade Abasi ọsọn̄ọ mbuọtidem nnyịn.—Rome 1:11, 12.
3 Nọ Ikot Nnennen Nnennen: Ọtọn̄ọde ke akpa ukpepn̄kpọ, nọ kpukpru eyen ukpepn̄kpọ Bible ikot ndidụk mme mbono esop. Nọ enye n̄wedikot. Demede udọn̄ esie ebe ke ndineme n̄kpọ oro ekesịnde udọn̄ ọnọ fi ke akpatre mbono esop oro okodụkde ye ndikere mban̄a n̄kpọ oro ẹdinemede ke mbono esop efen. Tịn̄ nte Ufọkmbono Obio Ubọn̄ etiede, nyụn̄ kụt ete ke enye ọfiọk nte edisan̄ade esịm do.
4 Edieke eyen ukpepn̄kpọ mîdụkke inikiet inikiet, ka iso ndinọ enye ikot. Da minit ifan̄ ke urua kiet kiet ndiwụt enye nte esop nnyịn etiede. Da ediye uduot ekpri n̄wed Ẹdiana Kiet Ẹnam Uduak Abasi ye, edieke ekemede, vidio Jehovah’s Witnesses—The Organization Behind the Name nam enye emehe ye nnyịn ye mme mbono esop nnyịn. San̄a ye mme asuanetop efen man anam eyen ukpepn̄kpọ emehe ye mmọ. Ke akam, kọm Jehovah ban̄a esop nyụn̄ tịn̄ ke oyom eyen ukpepn̄kpọ abuana ye esop.
5 Kûmen̄e ndin̄wam mbufa mbon oro ẹnyenede udọn̄ ndisop idem ye nnyịn. Nte esịtekọm oro mmọ ẹnyenede ẹnọ Jehovah ọkọride, oyonụk mmọ ndida se mmọ ẹkpepde nsịn ke edinam nnyụn̄ n̄kabade ndi ubak esop Abasi oro adianade kiet.—1 Cor. 14:25.