Nditịm N̄kpọ Nnịm—Nnọ Nso?
1 Kpukpru nnyịn imesikere ndutịm nnyịn kaban̄a ini iso. Mbon oro ẹnyenede idotenyịn uwem eke isọn̄ ẹdori enyịn ndidụn̄ ke nsinsi ke edinen obufa ererimbot Abasi. Edi odu mme odudu oro ẹkemede ndisio idotenyịn oro mfep ke esịt owo ke mbuari. Oyom ọkpọsọn̄ ukeme man ika iso ibọp uwem nnyịn ikanade mme ufọn n̄kpọ Obio Ubọn̄ ikûnyụn̄ iyak mme etabi etabi udọn̄ obụkidem ẹwọn̄ọde ntịn̄enyịn nnyịn.—1 John 2:15-17.
2 Ererimbot ikemeke ndikam mfiọk udọn̄ mme owo eke spirit. (1 Cor. 2:14) Ke adan̄aemi mbon eken ke otu ubonowo ẹsịnde ukeme ndiwọrọ etop, ndida ukara, m̀mê ndinyene inyene, nnyịn idomo ndibịne mme n̄kpọuto eke spirit. (Matt. 6:19-21) Edieke idomode ndikpụhọde ekikere nnyịn ekekem ye nte ererimbot ekerede aban̄a ini iso, nte nnyịn iyesịm mme utịtmbuba eke spirit nnyịn tutu amama? Mme n̄kpọ ererimbot ẹyekara esịt nnyịn ke mîbịghike. Didie ke ikeme ndibiọn̄ọ emi?
3 “Ẹmen Ọbọn̄ Jesus Christ Ẹsịne”: Usụn̄ kiet ndibiere m̀mê nnyịn ke ibọp ini iso nnyịn ikanade mme ufọn n̄kpọ Obio Ubọn̄ edi ndidụn̄ọde nneme nnyịn. Nte nnyịn isitịn̄ iban̄a mme n̄kpọ obụkidem m̀mê mme udọn̄ n̄kpọ ererimbot emi kpukpru ini? Ke edide ntre, ana nnyịn ikere m̀mê esịt nnyịn ke etre ndiwụhọ ke mme ọsọn̄urua n̄kpọ eke spirit. Ekeme ndidi oyom nnyịn inen̄ede idori nsọn̄uyo ke ‘ndimen Ọbọn̄ Jesus Christ nsịne utu ke ndiben̄e n̄kpọ nnịm nnọ idiọk udọn̄ obụkidem.’—Rome 13:14.
4 Mme uyen ẹkeme ‘ndimen Christ nsịne’ ebe ke nditịm n̄kpọ nnịm nnọ usen emi mmọ ẹdidụkde utom ukwọrọikọ uyọhọ ini. Ẹkebọk uyen kiet emi okoyomde ndinam usiakusụn̄ ofụri ini ke n̄kann̄kụk emi ọsọ ido edide ke ana n̄kparawa owo ẹnyene okụk. Ntem, enye ama enen̄ede esịn idem ke mbubehe tutu esịm idaha oro enye mîkakam idaha edidụk mme mbono esop ye edibuana ke utom ukwọrọikọ ke akpan n̄kpọ. Ke ndondo oro enye ọkọtọn̄ọde ndibuọt idem ke mme ikọ Jesus oro ẹkụtde ke Matthew 6:33, onyụn̄ ọkpọn̄de ekikak ekikak utom oro enye akanamde, enye ama ada utom uyọhọ ini nte ubọkọkọ. Ye eti ubieresịt idahaemi, enye ke anam n̄kpọ Jehovah, ‘ke ofụri ukeme esie,’ nte enye ọdọhọde.
5 Bible ọdọhọ ete ke owụt eti ibuot nditịm n̄kpọ nnịm nnọ ini iso. (N̄ke 21:5, NW) Ẹyak kpukpru nnyịn inam ntre, inịmde uduak Abasi akpa ke uwem nnyịn.—Eph. 5:15-17, NW.