“Mmọsọn̄ọ Nda! Mmọsọn̄ọ Nda! Mmọsọn̄ọ Nda!”
1 Mme ikọ anam-akpanikọ Christian oro ọkọbọhọde Akwa Nsobo Nazi afiak etịn̄ ubiere ediwak tọsịn Mme Ntiense—mme odu-uwem ye mme akpan̄kpa—oro ẹkesọn̄ọde ẹda ke mme edinịm ke akpanikọ mmọ kpa ye ibak Nazi. (Eph. 6:11, 13) Ẹbụk aduai–owo-idem mbụk uko ye edikan mmọ ke vidio oro otụkde owo do, Jehovah’s Witnesses Stand Firm Against Nazi Assault. Ẹsịn udọn̄ ẹnọ kpukpru owo ke esop ndise enye nnyụn̄ nneme ye kiet eken mban̄a se mmọ ẹkụtde ẹnyụn̄ ẹkerede.
2 Ẹyak mme mbụme emi ẹdemede ekikere mbufo: (1) Mme ntak ewe ẹkenam Mme Ntiense Jehovah ẹsọn̄ọ ẹda uko uko ke eyo Nazi? (2a) Nso eneni ikodu kaban̄a ekọm, ndien ntak-a? (2b) Didie ke emi okotụk mme ubon Mme Ntiense? (3) Mme Ntiense ifan̄ ke ẹkenọ ẹka mme itienna ekikere, ẹkesan̄a didie ẹdiọn̄ọ mmọ do, ndien didie ke mme ndedịbe bodisi ẹkenam n̄kpọ ye mmọ? (4) Nso ke nditọete nnyịn mîkenyịmeke ndinam man ẹbọhọ? (5a) Didie ndien ini ewe ke Mme Ntiense Jehovah ẹketịn̄ ikọ uko uko ẹban̄a ibak ukara Hitler? (5b) Didie ke Hitler akanam n̄kpọ? (6) Didie ke edidianakiet ikọt Jehovah ekedi n̄kpọ unyan̄a uwem ọnọ mmọ ye mbon efen ke n̄kan̄ eke obụk ye ke n̄kan̄ eke spirit? (7) Ewe ikwọ Obio Ubọn̄ ke ẹkewet ke itienna ekikere? (8) Ewe uwụtn̄kpọ mme anam-akpanikọ iren, iban, ye mme uyen inụk fi ndimụm nsọn̄ọnda fo ke Jehovah n̄kama inamke n̄kpọ m̀mê nso itịbe? (Se n̄ko 1999 Yearbook, page 144-147.) (9) Nte kiet ke otu Mme Ntiense Jehovah, didie ke vidio emi anam fi ekere aban̄a nditre ndidi eke ererimbot?
3 In̄wan̄-in̄wan̄ uwụtn̄kpọ Mme Ntiense Jehovah emi ẹkewụtde ke vidio Stand Firm ekeme ndin̄wam n̄kparawa owo, idem mbon emi mîdịghe Mme Ntiense, ndisobo mme utọ akpan n̄kpọ nte unana ediyọ, mfịghe ubọkn̄ka, ye ubieresịt. Edieke afo edide uyen emi odude ke ufọt akpatre isua ita ke ufọkn̄wed praimari tutu esịm akpa isua ita ke sekọndri m̀mê ke akpatre isua ita ke sekọndri, nte emekeme ndinọ mme andikpep fo ifet ndikama vidio emi nnam n̄kpọ ke ubet ukpepn̄kpọ? Ndusụk afo emekeme ndinọ mmọ idem vidio emi kiet onyụn̄ etịn̄ aban̄a enye nte esisịt mbụk oro ẹfiọkde ẹban̄a m̀mê uwetn̄kpọ emi esịnede ukpepn̄kpọ ido uwem.
4 Vidio Stand Firm edi ata eti n̄kpọutom ndiwụt nte ukpepn̄kpọ Abasi ọnọde nnyịn ukeme eke spirit ndinem Abasi esịt ebe ke ndisọn̄ọ nda ke se ifọnde. (1 Cor. 16:13) Buana enye ye kpukpru mbon oro ẹnyenede udọn̄ ke akpanikọ.