Nnyịn Imenyene Obufa N̄kpọutom Ndida Ntọn̄ọ Ukpepn̄kpọ!
1 N̄wan America kiet ekedi enyene-ifịk owo Roman Catholic. Enye ama ọsọn̄ọ ekpeme mme ukpepn̄kpọ ufọkabasi. Ama akam anam isan̄ ido ukpono aka Obio Ukara pope. Ndien kpa ye oro, ke ini kiet ke otu Mme Ntiense Jehovah akakade ufọk esie, enye ama enyịme ukpepn̄kpọ Bible. Ntak-a? Koro enye okoyomde ndikpep se Bible ọdọhọde ndien ufọkabasi mmọ ikekpepke owo Bible. Nso ke ifiọkutom emi ekpep nnyịn? Nte ke nnyịn ifiọkke owo emi edinyịmede ukpepn̄kpọ Bible mfọn.—Eccl. 11:6.
2 Nte akanam afo ememen̄e ndisian mme owo nte ke nnyịn imenyịme ndikpep Bible ye owo ekededi oro enyenede udọn̄? Nte kpukpru owo ke n̄kann̄kụk fo ẹdiọn̄ọ ẹte ke nnyịn imesinam utom mfọn emi? Didie ke nnyịn ikeme nditịm mfiọk nte ke mmọ ẹdiọn̄ọ? Ebe ke ndida obufa n̄kpọutom nnam n̄kpọ! Enye edi ediye tract oro enyenede page itiokiet oro ẹkotde Nte Afo Akpama Ndifiọk N̄kpọ Efen Efen Mban̄a Bible? Ẹyak nnyịn imehe ye n̄kpri ibuotikọ kiet kiet ke tract emi.
3 “Ntak Okotde Bible?” Mme ntak oro tract emi ọnọde ẹnen̄ede ẹdemede udọn̄. Enye anam an̄wan̄a nte ke Bible esịne “ima ima item otode Abasi,” owụtde nte ẹkpesan̄ade ẹkpere enye ke akam ẹyom un̄wam ye nte ẹkemede ndibọ enọ esie edide nsinsi uwem. (1 Thess. 2:13) Tract emi etịn̄ aban̄a nsio nsio “akpanikọ oro ọnọde un̄wana” ke Bible, utọ nte se isitịbede ke ini nnyịn ikpade ye ntak emi ekese mfịna ẹdude ke isọn̄. Enye etịn̄ aban̄a “mme edumbet Abasi ke Bible” oro ke ini ẹdade ẹsịn ke edinam ẹdade mme ufọn eke ikpọkidem ẹdi ẹnyụn̄ ẹnamde owo enyene inemesịt, idotenyịn, ye nti edu eken. Tract emi etịn̄ aban̄a ntak kiet efen ndikot Bible—mme ntịn̄nnịm ikọ ẹban̄ade ini iso, oro ẹwụtde se ikam inade nnyịn ke iso.—Edi. 21:3, 4.
4 “Un̄wam Ndida Mfiọk Bible”: Tract emi ọdọhọ ete: “Kpukpru nnyịn imoyom un̄wam man ifiọk Ikọ Abasi.” Ekem enye etịn̄ usụn̄ oro nnyịn ikpekpepde Bible: “Nte ido edide, edi mfọnn̄kan n̄kpọ ndikpep Bible ke nde ke nde, ọtọn̄ọde ye mme akpan ukpepn̄kpọ.” Ke adan̄aemi etịn̄de in̄wan̄-in̄wan̄ ete ke “Bible edi ebiet emi odudu otode,” tract emi etịn̄ akpan akpan aban̄a ediye uduot ekpri n̄wed Oyom nte n̄kpọ oro edin̄wamde eyen ukpepn̄kpọ “ndifiọk se mme itien̄wed Abasi oro ẹsiakde ẹsịn ke mme nsio nsio ibuot nneme ẹwọrọde.” Ekpri ibuotikọ oro etienede edemede mbụme oro onụkde owo ndinam n̄kpọ.
5 “Nte Afo Emeben̄e Idem Ndibiat Ini ke Urua Kiet Kiet Man Ọfiọk Bible?” Tract emi anam an̄wan̄a nte ke ẹkeme ndidiomi ukpepn̄kpọ Bible ke ini ye ke ebiet oro eferede eyen ukpepn̄kpọ ke idem, edide ke ufọk esie m̀mê ke urụk ukopikọ. Mmanie ẹkeme ndibuana ke nneme emi? Tract emi ọbọrọ ete: “Ofụri ubon fo. Mme ufan ekededi oro afo emekde ndikot ẹkeme n̄ko nditiene mbuana. Mîdịghe edieke afo amade, ẹkeme ndinyene nneme emi ye afo ikpọn̄.” Owo kiet enyene ndikpep n̄kpọ ebịghi adan̄a didie? Enye anam an̄wan̄a ete: “Ediwak owo ẹsisio hour kiet ẹnịm ke urua kiet kiet ndida n̄kpep Bible. Edieke afo ekemede ndibiat ini efen efen m̀mê edieke esinyenede esisịt ini ke urua kiet kiet, Mme Ntiense ẹyenọ idemmọ unyịme unyịme ndin̄wam fi.” Akpan n̄kpọ edi oro! Nnyịn imeben̄e idem ndikpụhọde nda ekekem ye mme idaha eyen ukpepn̄kpọ kiet kiet.
6 “Ikot Ndibọ Ukpep”: Ẹnọ ufan̄ ke babru emi oro andibọ tract emi ekemede ndisịn eben̄e mbọ ediye uduot ekpri n̄wed Oyom mîdịghe ọdọhọ ẹwaha ẹdinam ndutịm ukpepn̄kpọ Bible mfọn nnyịn an̄wan̄a. Ẹwụt ikpaedem ediye uduot ekpri n̄wed Oyom ke ọyọhọ uduot. Nte afo omokụt ntak emi tract emi edisịnde udọn̄ ọnọ mbon esịt akpanikọ efen efen ndinyịme un̄wam nnyịn? Idahaemi, didie ke nnyịn ikeme ndida obufa n̄kpọutom emi nnam n̄kpọ ke mfọnn̄kan usụn̄?
7 Mmanie ke Afo Ekeme Ndinọ Tract Emi? Ẹkeme ndinọ mme owo tract emi ke ubọk mîdịghe ẹnịm ke ufọk mbon oro mîsidụhe ke ufọk. Ẹkeme ndisuan enye ke ufọk ke ufọk, ke efak, ye ke efakutom mbubehe. Yak enye nọ mme owo edide mmọ ẹnyịme ndibọ mme n̄wed nnyịn m̀mê inyịmeke. Sịn enye ke magazine m̀mê mme n̄wed eken oro enịmde. Sịn enye ke esịt leta oro ewetde. Nọ enye ke leta ẹsọk mbon oro afo etịn̄de ikọ ọnọ ke urụk ukopikọ. Kama mmọ kpukpru ini man asuan ke in akade ndidep n̄kpọ, anamde isan̄ ke n̄kpọisan̄ ofụri owo, ye ke ini ọnọde ikọ ntiense ido nneme. Yak enye nọ owo ekededi oro awahade ufọk fo. Yak enye nọ iman fo, mme mbọhọidụn̄, mme nsan̄autom, mme nsan̄a ufọkn̄wed, ye mme ọdiọn̄ọ eken. Domo ndinọ kpukpru owo oro afo osobode tract emi! Ke oro ebede?
8 Edieke Ẹsọpde Ẹbọrọ: Ndusụk owo ẹyesọsọp ẹbọrọ, ẹdọhọde ke mmimọ iyama ndinyene ukpepn̄kpọ Bible. Ke ntre, ini ekededi oro anamde utom an̄wautom, kụt ete ke imenyene ediye uduot ekpri n̄wed Oyom iba—okwo ye eke eyen ukpepn̄kpọ. Edieke owo enyịmede, tọn̄ọ ukpepn̄kpọ ke ebe oro. Kụbọde ka udiana page, nyụn̄ kot “Nte Ẹkamade Ediye Uduot Ekpri N̄wed Emi.” Ekem kụbọde ka ukpepn̄kpọ 1, nyụn̄ wụt nte ẹkpepde. Nso ikeme ndimem n̄kan emi?
9 Edieke Andikpan̄ Utọn̄ nnọ Fi Oyomde Ini Ndikere Mban̄a Enye: Mbemiso ata anyan ini ebede, domo ndifiak n̄kosobo ye enye. Ke ini afo akade, kụt ete ke amakama ediye uduot ekpri n̄wed Oyom. Wụt enye mme ibuotikọ oro ẹdude ke udiana page. Yak enye emek ibuotikọ oro enen̄erede edemede enye udọn̄. Kụbọde ka do, nyụn̄ tọn̄ọ ndineme ukpepn̄kpọ oro enye emekde.
10 Fiak Ka Bịne Mbon Oro Ọkọnọde Mme Magazine: Edieke afo ekenịmde tract ye magazine, afo emekeme ndifiak n̄ka ye ntọn̄ọikọ emi: “Akpa ini oro n̄kedide, mma n̄kop inemesịt ndikpọn̄ magazine Enyọn̄-Ukpeme kiet nnọ fi. Eyedi afo ama okụt nte ke ọyọhọ enyịn̄ n̄wed emi edi Enyọn̄-Ukpeme Ọnọ Ntọt Obio Ubọn̄ Jehovah. Mfịn, ami nyama ndinam se Obio Ubọn̄ emi edide ye se enye ediwọrọde ọnọ fi ye ubon fo an̄wan̄a.” Ekem kụbọde ediye uduot ekpri n̄wed Oyom ka ukpepn̄kpọ 6. Ọtọn̄ọde ke akpa ikpehe ekikere, kot nyụn̄ neme adan̄a nte enyeneufọk enyenede ini ndikop. Ekem nam ndutịm ndifiak n̄ka usen efen man okokụre ukpepn̄kpọ oro.
11 Kûyak Tract Fo Okụre: Oyoyom esenyịn utom ye nditọete oro ẹsede ẹban̄a n̄wed ẹnam tract Ndifiọk Bible odu awak ekem kpukpru ini ke esop. Nyene ndusụk ke ekpatọfọn̄ m̀mê ke ekpri ekpatubọk fo, ke ubomisọn̄ fo, ke itieutom fo, ke ufọkn̄wed, bon kpere enyịnusụn̄ ufọk fo—ke ebiet ekededi oro ekperede fi ubọk. Nte ededi, kama ndusụk ke ekpat ukwọrọikọ fo man ọkpọnọ ke ini osobode ye owo emi afo ekemede ndida nneme n̄kpọ mban̄a Bible.
12 Jehovah Akpakam Ọdiọn̄ Mme Ukeme Nnyịn: Utịtmbuba oro kpukpru mme Christian ẹyomde ndisịm edi ndikpep owo efen akpanikọ. (Matt. 28:19, 20) Nte afo ke enịm ukpepn̄kpọ Bible idahaemi? Edieke edide ke enịm, nte afo emekeme ndiyom ini ke ndutịm fo eke urua ke urua nnọ edinịm ukpepn̄kpọ efen? Edieke afo mûnịmke ukpepn̄kpọ idahaemi, afo ekpenen̄ede ama ndinịm. Bọn̄ akam ben̄e Jehovah ọdiọn̄ ukeme fo man okụt owo emi afo ekemede ndikpep n̄kpọ. Ekem nam n̄kpọ ekekem ye akam oro.—1 John 5:14, 15.
13 Nnyịn imenyene obufa n̄kpọutom ndida ntọn̄ọ ukpepn̄kpọ! Mehe ye enye. Suan enye ke ntatubọk. Nam kpukpru se ekemede ‘ndifọn ido, ndinyụn̄ nnam nti utom uwak-uwak, nnyụn̄ ntat ubọk, nnyịme ndinọ owo’ se afo ekpepde aban̄a Ikọ Abasi.—1 Tim. 6:18.
[Ekebe ke page 4]
MME IFET NDISUAN TRACT EMI
◼ Ke nneme eke usen ke usen
◼ Ke ini owo ọbọde n̄wed nnyịn
◼ Ke ini owo ndomokiet mîdụhe ke ufọk
◼ Ke ini inamde mme mfiakn̄ka
◼ Ke ini isobode ye owo ke ini inọde ikọ ntiense ke efak
◼ Ke ini inọde ikọ ntiense ke efakutom mbubehe
◼ Ke ini inọde ikọ ntiense ido nneme
◼ Ke ini iwetde mme leta
◼ Ke ini idụkde n̄kpọisan̄ ofụri owo
◼ Ke ini owo awahade ufọk nnyịn
◼ Ke ini inemede nneme ye mme iman, mbọhọidụn̄, nsan̄autom, nsan̄a ufọkn̄wed, ye mme ọdiọn̄ọ eken