‘Kwọrọ Ikọ Abasi Ọyọhọ Ọyọhọ’
1 Ke ini afo enen̄erede owụt esịtekọm aban̄a eti n̄kpọ oro afo ọbọde, nte afo usûwụtke emi ke edu ye edinam fo? Edi akpanikọ emesiwụt! Tịm fiọk nte apostle Paul akanamde n̄kpọ aban̄a eti ido ye ima-mfọnido oro Jehovah owụtde ubonowo. Enye ama atan̄a ete: “Ekọm enyene Abasi ke enọ Esie emi ayan̄ade edeme”! Nso ke “enọ” oro abuana? Enye abuana kpukpru “akwa mfọn Abasi” oro ẹwụtde nnyịn, emi n̄kponn̄kan uyarade edide edinọ Eyen esie nte ufak kaban̄a mme idiọkn̄kpọ nnyịn.—2 Cor. 9:14, 15; John 3:16.
2 Nte ikọ ekọm Paul ekedi sụk ikọ inua inua? N̄wan̄ansa- o! Enye ama owụt ntotụn̄ọ esịtekọm esie ke ediwak usụn̄. Enye ama enen̄ede ekere aban̄a mfọnọn̄kpọ eke spirit ekemmọ mme Christian onyụn̄ oyom ndinam se enye ekekeme ndin̄wam mmọ ẹbọ ọyọhọ ufọn ẹto ima-mfọnido Abasi. Kaban̄a utọ mbon oro, Paul ọkọdọhọ ete: “Koro mbufo ẹdọn̄de nnyịn eti-eti, nnyịn ikụt inem, idịghe ke edinọ mbufo gospel Abasi ikpọn̄, edi ke edinyụn̄ nyak ukpọn̄ nnyịn nde nnọ mbufo, sia imade mbufo eti-eti.” (1 Thess. 2:8) Ke adianade ye edin̄wam mbon oro ẹma ẹkededi ubak esop ẹmụm edinyan̄a mmọ ẹkama, Paul ama ọkwọrọ eti mbụk ye unana edikpa mba, asan̄ade ediwak tọsịn kilomita ke inyan̄ ye ke obot ndiyom mmọ “emi ẹkenịmde ẹnọ nsinsi uwem.” (Utom 13:48) Ntotụn̄ọ esịtekọm oro Paul ekenyenede aban̄a kpukpru se Jehovah akanamde ọnọ enye ama onụk enye ‘ndikwọrọ ikọ Abasi ọyọhọ ọyọhọ.’—Col. 1:25.
3 Nte esịtekọm oro nnyịn inyenede iban̄a kpukpru se Jehovah anamde ọnọ nnyịn inụkke nnyịn ndinọ mbon oro ẹyomde un̄wam ke esop nnyịn un̄wam eke spirit? (Gal. 6:10) Ndien nte inụkke nnyịn ndinyene ọyọhọ ebuana nte ikekeme ke ndikwọrọ eti mbụk Obio Ubọn̄ ke ofụri efakutom nnyịn?—Matt. 24:14.
4 Ifet Ndiwụt Esịtekọm: Ke isua kiet kiet, Editi n̄kpa Christ esinọ nnyịn san̄asan̄a ifet ndiwụt esịtekọm nnọ kpukpru se Jehovah ye Jesus ẹnamde ẹnọ nnyịn. Emi idịghe sụk mbono esop efen m̀mê ikpîkpu editi n̄kpọntịbe. Jesus ọkọdọhọ ete: “Ẹnam emi nditi Mi.” (Luke 22:19; sịghisịghi ubọkn̄wed edi eke nnyịn.) Editi n̄kpa Christ edi ini editie n̄kere orụk owo emi Jesus edide. Edi ini ndifiọk nte ke enye ke odu uwem ke onyụn̄ anam utom mfịn, ke ubọn̄ ye itie edidem oro ẹkenọde enye ke ntak uwem edinam akpanikọ ye uwa esie. Edinam emi edi n̄ko ifet ndiwụt nsụkibuot nnyịn nnọ itieibuot Christ nte enye ọnọde mme mbubehe ye edinam esop Christian ndausụn̄. (Col. 1:17-20) Kpukpru ikọt Abasi ẹkpenyene ndidụk Editi n̄kpa Christ ukpono ukpono. Ẹdinịm eke isua emi ke utịn ama okosụhọde ke Thursday, March 28, 2002.
5 Ye ifịk ifịk ukeme oro ẹkesịnde mbemiso ẹkenịmde Editi isua oko, nnyịn ima inyene n̄wakn̄kan ibat owo 639,237 oro akanam ẹdụkde ke Nigeria. Nso ididi ibat mme andidụk eke isua emi? Ekese edikọn̄ọ ke nnyịn ‘ndinam utom ọkpọsọn̄ nnyụn̄ nsịn̄ede idem nnyịn,’ in̄wamde adan̄a ediwak owo nte ikekeme ndidụk.—1 Tim. 4:10.
6 Ke adianade ye edidụk Udia Mbubịteyo Ọbọn̄, nnyịn imekeme nditat utom an̄wautom nnyịn. Nte eyịghe mîdụhe, ediwak tọsịn nditọete ẹyenam utom usiakusụn̄ unọ un̄wam ke ọfiọn̄ kiet m̀mê akande oro. Ke isua kiet kiet ke isua ition emi ẹkebede, nnyịn ima inyene mme asiakusụn̄ unọ un̄wam 13,864 ke ẹbaharede ukem ukem ke ini Editi, March esịm May. Nte afo emekeme ndidiomi mbubehe fo man abuana ke ifet edinam utom usiakusụn̄ unọ un̄wam isua emi? Edidi eti usụn̄ ndiwụt esịtekọm oro otode esịt ke ima ima ndutịm Abasi ndinọ ufak Christ. Afo emekeme ndidori enyịn ndinyene edidiọn̄ Jehovah, nte mme ifiọkutom oro ẹtienede mi ẹwụtde.
7 Eyenete an̄wan emi anamde utom idịbi udia uyọhọ ini ama ewet aban̄a ifiọkutom oro enye ekenyenede ke ndinam utom usiakusụn̄ unọ un̄wam ke March isua oko ete: “Utom Obio Ubọn̄ Nnyịn eke February 2001, ama esịn udọn̄ ọnọ kpukpru owo oro idaha mmọ ẹyakde ndinam utom usiakusụn̄ unọ un̄wam ke ini Editi. Sia March ekenyenede Saturday ition, emi ama etịm odot ye ndutịm mi. Ntre mma mbiere ndisịn n̄wed eben̄e.” Nte enye ọkọtọn̄ọde ke ọfiọn̄ oro, enye ama enịm utịtmbuba editọn̄ọ ukpepn̄kpọ Bible ọnọ idemesie. Ndi enye ama okụt unen? Ih, ke ndikesịn hour 52 ke ndinọ ikọ ntiense ke ọfiọn̄ oro! Nso ikedi akpatre ikọ esie? “Mme utịbe utịbe edidiọn̄ ẹdu ke ini nnyịn isịnde ukeme efen efen.”
8 Mme ufọn ewe ke ubon oro ẹnamde utom usiakusụn̄ ọtọkiet ẹnyene? Ubon emi esịnede owo inan̄ oro ẹkenamde ntre ke April isua oko ẹma ẹkụt nte enye edide ọfiọn̄ oro ẹditide kpukpru ini. Eka ọkọdọhọ ete: “Nso in̄wan̄-in̄wan̄ idaha ekikere ke nnyịn ikenyene ntem iban̄a usen kiet kiet, sia kpukpru nnyịn ikadianade kiet ke utom ukwọrọikọ! Mme nneme ẹban̄ade utom ukwọrọikọ nnyịn eke usen ke usen ẹma ẹnam ini udia enen̄ede enyene inem.” Eyen ọkọdọhọ ete: “Mma n̄kop inem ndinam utom ye Papa ke an̄wautom ke ufọt urua, ke ini enye nte ido edide esinamde utom idịbi udia.” Ete ama adian do ete: “Nte ibuot ufọk, mma n̄kop uyụhọ ndifiọk nte ke nnyịn ikanam utom ọtọkiet ke ata akpan utom ke eyo nnyịn.” Nte ubon fo ekeme ndinam utom usiakusụn̄ ọtọkiet? Ntak mûnemeke nte ubon unyụn̄ use m̀mê ofụri ubon fo ẹkeme ndinam utom usiakusụn̄ unọ un̄wam ke ini Editi emi-e?
9 Nte Nnyịn Imekeme Ndinam March Edi Mfọnn̄kan Ọfiọn̄ Oro Akanam Inyenede? Ke ntọn̄ọ ntọn̄ọ 2000, Utom Obio Ubọn̄ Nnyịn ama obụp mbụme emi: “Nte Nnyịn Imekeme Ndinam April 2000 Edi Mfọnn̄kan Ọfiọn̄ Oro Akanam Inyenede?” Didie ke ẹkenam n̄kpọ ẹban̄a? Ẹma ẹsịm nsio nsio obufa n̄wakn̄kan ibat. Ẹma ẹnyene n̄wakn̄kan ibat mme asiakusụn̄ unọ un̄wam 22,714 oro akanam inyenede ke ọfiọn̄ kiet. Ke adianade do, nnyịn ima inyene obufa n̄wakn̄kan ibat hour, magazine, ye mme mfiakn̄ka. Ndi afo emeti nduaidem oro okodude ke esop mbufo ke ntak ekese edinam eke spirit ke akpan ọfiọn̄ emi? Nte nnyịn imekeme ndinam ukem oro m̀mê ndikam nnam se ikande oro isua emi? Ke kpukpru owo ẹsịnde ọkpọsọn̄ ukeme, March 2002 ekeme ndidi “Mfọnn̄kan Ọfiọn̄ Oro Akanam Inyenede.” Ntak edide March?
10 Ntak iba ẹdu oro March ekpenyenede ndidi akpan ọfiọn̄ utom. Akpa, ẹdinịm Editi ke utịt utịt March, ọnọde nnyịn ekese ifet ke ntọn̄ọ ntọn̄ọ ọfiọn̄ oro ndikot adan̄a ediwak owo nte ikekeme ẹdidụk. Ọyọhọ iba, March isua emi enyene utịturua ition, anamde edi mmemmem ọnọ mbon oro ẹnamde utom idịbi udia m̀mê mbon oro ẹkade ufọkn̄wed ndinam utom usiakusụn̄ unọ un̄wam. Ntak mûsụhọkede utie unam eti ndutịm idahaemi, adade n̄wed usenọfiọn̄ oro ẹnọde ke esịne-esịt emi? Utom usiakusụn̄ unọ un̄wam ekeme ndidi mmemmem n̄kan nte afo ekerede. Ke uwụtn̄kpọ, ke odiomide hour 8 ke utom ukwọrọikọ ke utịturua kiet kiet ke urua ition oro, ediyom afo odiomi hour 10 efen kpọt ke ofụri ini eken ke ọfiọn̄ oro man esịm hour 50 oro ẹyomde.
11 Nso ke mbiowo ẹkeme ndinam man ẹn̄wam kpukpru owo ke esop ‘ndikwọrọ ikọ Abasi ọyọhọ ọyọhọ’? Demede ifiopesịt ebe ke mme ikpehe mbono esop ye ọkpọkpọ nneme. Mme ada Ukpepn̄kpọ N̄wed Esop ye udiana mmọ ẹkeme nditọn̄ọ nneme ye owo kiet kiet oro ẹdude ke otu mmọ nnyụn̄ nnọ ọkpọkpọ un̄wam. Mme ikọ nsịnudọn̄ ifan̄ oro ẹtịn̄de ke mfọnido m̀mê ndusụk nti ekikere ẹkeme ndidi n̄kukụre se ẹyomde. (N̄ke 25:11) Ediwak owo ẹyekụt ẹte ke mmimọ imekeme ndinyene ifet edinam utom nte mme asiakusụn̄ unọ un̄wam ebe ke ndinam n̄kpri ukpụhọde ke ndutịm mmimọ. Ke ediwak esop, ata ediwak, edieke mîdịghe kpukpru, mbiowo ye mme asan̄autom unamutom ye iban mmọ ẹnịm nti uwụtn̄kpọ ke ndinam utom usiakusụn̄ unọ un̄wam ọtọkiet ke ini Editi. Emi esịn udọn̄ ọnọ ediwak asuanetop nditiene mmọ nnam. Ke ntak unana ukeme eke ikpọkidem m̀mê mme idaha eken, ndusụk asuanetop idikemeke ndisiak usụn̄, edi ẹkeme ndisịn udọn̄ nnọ mmọ ndiwụt esịtekọm mmọ ebe ke ndinam ekese se mmọ ẹkemede ke utom ukwọrọikọ ọtọkiet ye mbon eken ke esop.
12 Edikụt unen ọkọn̄ọ ke mbiowo ndinam eti ndutịm. Ẹkpenyene ndidiomi mme mbono an̄wautom ke mme ini oro ẹdotde ke ofụri urua. Edieke ekemede, esenyịn utom eyebem iso ọnọ nditọete oro ẹdotde utom ndinịm kpukpru mbono an̄wautom. Oyoyom eti ntịmidem man mme mbono an̄wautom ẹkûbe minit 10 esịm 15, esịnede edibahade mme owo ndọn̄ ke mme otu, edinọ efakutom, ye edibọn̄ akam. (Se Ekebe Mbụme ke Utom Obio Ubọn̄ Nnyịn eke September 2001.) Ẹkpenyene ndinam ndutịm utom eke ọfiọn̄ oro enen̄ede an̄wan̄a esop ẹnyụn̄ ẹdian enye ke obukpọk ntọt.
13 Ẹkpenyene ndinam efakutom oro ekemde odu. Esenyịn utom ekpenyene ndisobo ye eyenete oro esede n̄kpọ aban̄a efakutom man ẹnam ndutịm ndinam utom ke efakutom oro owo mîsikụreke ndien ndien. Ẹkpenyene ndisịn ifịk ke ndiyom mbon oro mîsidụhe ke ufọk, ndinọ ikọ ntiense ke mme efak ye to ke ufọkurua sịm ufọkurua, ye unọ ikọ ntiense mbubịteyo. Ke ebiet odotde, ẹkeme ndin̄wam ndusụk asuanetop ndinọ ikọ ntiense urụk ukopikọ.
14 N̄wam Mmọ Ẹfiak Ẹnam Utom: Ndi odu owo ekededi ke efakutom esop mbufo oro mîsịnke ifịk aba ke edikwọrọ eti mbụk? Utọ mbon oro ẹsụk ẹdi ubak esop ndien ẹyom un̄wam. (Ps. 119:176) Sia utịt akani ererimbot emi enen̄erede ekpere ndien obufa ererimbot odude ke n̄kpet n̄kpet ini iso, nnyịn imenyene eti ntak ndisịn ofụri ukeme ndin̄wam mbon oro ẹma ẹketre utom. (Rome 13:11, 12) Ke isua inan̄ emi ẹbede, se iwakde ikan owo 2,500 ke isua kiet kiet ẹnam n̄kpọ ẹban̄a un̄wam oro ẹnọde mmọ ẹnyụn̄ ẹfiak ẹtọn̄ọ utom. Nso ke nnyịn ikeme ndinam man in̄wam ediwak owo efen efen ẹfiak ẹnyene ima ye mbuọtidem oro mmọ ẹkenyenede ke editọn̄ọ?—Heb. 3:12-14.
15 Otu mbiowo ẹyeneme nte mmọ ẹkemede ndin̄wam mbon oro ẹketrede utom ke isua ifan̄ emi ẹkebede. (Matt. 18:12-14) Ewetn̄wed ekpenyene ndidụn̄ọde kad Ibatutom Asuanetop Esop nnyụn̄ n̄wet enyịn̄ kpukpru mbon oro mînamke utom aba. Ẹkpenyene ndisịn san̄asan̄a ukeme man ẹnọ un̄wam ebe ke ndutịm ubọkerọn̄. Ebiowo ekeme ndiyom ndika mbịne asuanetop ke ntak oro ama ekememehe onyụn̄ ọdiọn̄ọ enye, mîdịghe ekeme ndidọhọ mme asuanetop efen ẹn̄wam. Ekeme ndidi mmọ ẹkekpep n̄kpọ ye owo emi mînamke utom aba mi ndien ẹyedara ifet edinọ san̄asan̄a un̄wam ke ini emi ẹyomde un̄wam mi. Idotenyịn edi nte ke ẹyedemede udọn̄ ediwak mbon oro ẹketrede utom ndifiak ntọn̄ọ ndikwọrọ ikọ Abasi. Edieke mmọ ẹdotde, ini Editi edi ata eti ini ọnọ mmọ nditọn̄ọ!—Se Ekebe Mbụme oro odude ke Utom Obio Ubọn̄ Nnyịn eke November 2000 kaban̄a mme ntọt efen efen.
16 Nte Mbon Efen Ẹdot Ndikwọrọ Ikọ? Jehovah aka iso ndidiọn̄ ikọt esie ebe ke ndida “ndiye n̄kpọ kpukpru mme idụt” ndi. (Hag. 2:7, NW) Ke isua kiet kiet, ediwak tọsịn owo ẹdot ndidi mme asuanetop oro mînaha baptism. Mmọ ẹdi mmanie? Nditọ Mme Ntiense Jehovah ọkọrọ ye nditọ ukpepn̄kpọ Bible oro ẹnamde n̄kọri. Nnyịn isan̄a didie ifiọk m̀mê mmọ ẹdot ndidi mme asuanetop eti mbụk?
17 Nditọ Mme Ntiense Jehovah: Ediwak nditọwọn̄ ẹmesan̄a ye mme ete ye eka mmọ to ke ufọk sịm ufọk ke ediwak isua, okposụkedi mmọ mînamke utom kan̄a nte mme asuanetop oro mînaha baptism. March ekeme ndidi eti ini ndinam mmọ ẹtọn̄ọ. Afo asan̄a didie ọfiọk m̀mê eyen fo odot? Page 100 ke Ẹtịm Man Inam Utom Nnyịn Ima ọdọhọ ete ke edi “ke ini eyenọwọn̄ onịmde eti uwụtn̄kpọ ke eduuwem esie onyụn̄ ekemede nditịn̄ ikọ idemesie kaban̄a mbuọtidem esie ebe ke nditịn̄ nnọ mmọ en̄wen mban̄a eti mbụk, ke esịt onụkde enye ndinam ntre.” Edieke afo ekerede ke eyen fo odot, tịn̄ nọ kiet otu mbiowo emi odude ke Kọmiti Utom Esop.
18 Nditọ Ukpepn̄kpọ Bible Oro Ẹdotde: Ke eyen ukpepn̄kpọ Bible ama ọkọbọ ifiọk onyụn̄ odụk mme mbono esop ke ndusụk ini, enye ekeme ndiyom ndidi asuanetop Obio Ubọn̄. Edieke edide afo enịm ukpepn̄kpọ ye utọ eyen ukpepn̄kpọ oro, kere ban̄a mme mbụme emi: Nte enye anam n̄kọri oro ekemde ye isua emana ye ukeme esie? Nte enye ọtọn̄ọ ndibuana mbuọtidem esie ke ido nneme ye mbon efen? Ndi enye emen ‘obufa owo esịne’? (Col. 3:10) Ndi enye esịm mme n̄kpọ oro ẹnamde owo odot ndidi asuanetop oro mînaha baptism, oro ẹwụtde ke n̄wed Ẹtịm page 97-99? Ke edide ntre, afo ekpenyene ndisobo ye Kọmiti Utom Esop man ẹkeme ndinam ndutịm mbiowo iba ẹsobo ye afo ye eyen ukpepn̄kpọ oro. Edieke enye odotde, mbiowo iba oro ẹyesian enye nte ke enye ekeme nditọn̄ọ ndibuana ke an̄wan̄wa utom ukwọrọikọ.
19 Nso Kaban̄a April ye May? Mmọ emi n̄ko ẹdidi san̄asan̄a ọfiọn̄ ẹnọ ntatara utom an̄wautom. Ediwak mbon oro ẹnamde utom usiakusụn̄ unọ un̄wam ke March ẹkeme ndifiak nnam ntre ke April ye/m̀mê May. Ke April ye May, nnyịn idiwụk akpan ntịn̄enyịn ke ndinọ magazine Enyọn̄-Ukpeme ye Awake! ke an̄wautom. Nso nti utịp ke mmọ ẹnyene ntem ke idem mbon oro ẹkotde mmọ! Mme magazine emi ẹtịp akamba akamba ẹsịn ke edinyene utịbe utịbe n̄kọri oro ẹkụtde ke ofụri ererimbot. Ẹyesịn san̄asan̄a ukeme ke April ye May ndinọ adan̄a ediwak owo nte ikekeme mme magazine. Nam ndutịm idahaemi ndinyene ọyọhọ ebuana.
20 Ye ntatara utom ukwọrọikọ oro ẹdiomide, ndi oyom mbufo ẹnam ibat magazine oro ẹsibọde ke esop ọdọk? Ke ofụri isua utom, nnyịn isinọ Enyọn̄-Ukpeme ye Awake! ke Saturday kiet kiet, Usen Magazine nnyịn oro ẹmekde ẹnịm. Nte ededi, sia ediwak owo ẹdibuanade ke utom usiakusụn̄ unọ un̄wam ndien kpukpru nnyịn idinọde magazine ke ofụri ọfiọn̄ iba, ekeme ndiyom afo anam ibat magazine oro esibọde ke esop ọdọk. Edieke edide ntre, mbọk sian asan̄autom akamade magazine ke esop mbufo ye unana ubiat ini. Ke ukem ini oro, asan̄autom akamade n̄wed ekpenyene ndikụt nte ke mme tract oro ẹdotde ẹdu ẹkem kpukpru owo ndida nnam utom.
21 Ediwak owo ẹwụt esịtekọm ẹban̄a ikpehe Utom Obio Ubọn̄ Nnyịn oro ẹkotde “Se Ẹkpetịn̄de Ẹban̄a Mme Magazine.” Nte afo ọmọbọ ufọn oto ndutịm emi ke ndikpep mme uwụtn̄kpọ nneme magazine emi? Ntak mûdaha ubak ini ukpepn̄kpọ Bible ubon mbufo ke urua kiet kiet ndinam nneme emi nse?
22 Da Ini Editi Emi Nam N̄kpọ nte Ọfọnde: Ukem nte apostle Paul, ẹyak nnyịn iwụt Jehovah adan̄a nte nnyịn iwụtde esịtekọm iban̄a “enọ Esie emi ayan̄ade edeme” ebe ke nnyịn ndibuana ọyọhọ ọyọhọ ke edinam eke spirit oro ẹdiomide ẹnọ ini Editi emi. Emi ẹsịne (1) ndidụk ata akpan edinam ke isua emi, edinam Udia Mbubịteyo Ọbọn̄ ke Thursday, March 28 2002; (2) ndin̄wam mbon oro ẹma ẹketre utom ẹfiak ẹnyene ‘ima oro mmọ ẹkenyenede ke akpa’ (Edi. 2:4; Rome 12:11); (3) ndin̄wam nditọ nnyịn ye nditọ ukpepn̄kpọ Bible ekededi oro ẹdotde ndikabade ndi mme asuanetop oro mînaha baptism; ye (4) ndibuana ọyọhọ ọyọhọ nte ikekeme ke utom ukwọrọikọ, idem inamde utom usiakusụn̄ unọ un̄wam ke March ye ke oro ebede.—2 Tim. 4:5.
23 Akam ofụri esịt nnyịn edi kpukpru nnyịn ikpakam inyene ọyọhọ ebuana ke edikwọrọ eti mbụk Obio Ubọn̄ ke ini Editi emi, ke ntem iwụtde ntotụn̄ọ esịtekọm oro inyenede iban̄a kpukpru se Jehovah anamde ọnọ nnyịn.
[Ndise ke page 6]
Ọkpọkpọ Ndutịm Utom An̄wautom eke March 2002
Sunday Monday Tuesday Wednesday Thursday Friday Saturday
1 2
Usen Magazine
3 4 5 6 7 8 9
Usen Magazine
10 11 12 13 14 15 16
Usen Magazine
17 18 19 20 21 22 23
Usen Magazine
24 25 26 27 28 29 30
EDITI
KE UTỊN AMA OKOSỤHỌDE
Usen Magazine
31
Nte afo emekeme ndidiomi hour 50 man anam usiakusụn̄ unọ un̄wam ke March?