Ntak Emi Akade Iso Ndikwọrọ Ikọ?
1 Nte ẹnam utom ukwọrọikọ Obio Ubọn̄ ke n̄kann̄kụk mbufo ke ediwak isua? (Matt. 24:14) Edieke edide ntre, afo emekeme ndikere ke ẹkụre efakutom esop nte odotde. Idahaemi ke ini afo ọkwọrọde ikọ, eyedi ẹtie nte ediwak owo oro afo osobode inyeneke udọn̄ ke etop Obio Ubọn̄. Idem ke edide ntre, tịm fiọk se ẹtịn̄de ẹban̄a mme ata mbet Jesus ke n̄wed Ntịn̄nnịm Ikọ Isaiah II page 141: “Ke ndusụk itie, ekeme nditie nte utom ukwọrọikọ mmọ ọwọrọ ikpîkpu ke ẹmende ẹdomo ye udomo utom ye ukeme oro ẹsịnde. Kpa ye oro, mmọ ẹyọ.” Edi ntak ẹkade iso ndikwọrọ ikọ?
2 Ti Jeremiah: Nnyịn ndika iso nnam utom ukwọrọikọ ke edinam akpanikọ ikpenyeneke ndikọn̄ọ ke mme owo ndinọ nnyịn n̄kpan̄utọn̄ m̀mê nditre ndinọ. Jeremiah ama ọkwọrọ ikọ ke isua 40 ke efakutom kiet idem okposụkedi edide ata esisịt ibat owo ẹkenọ enye n̄kpan̄utọn̄ ndien ediwak owo mîkamaha etop esie. Ntak emi Jeremiah ọkọsọn̄ọde eyịre? Koro enye akanamde utom oro Abasi okowụkde enye ete anam ndien ifiọk esie kaban̄a se ikenyenede nditịbe ke ini iso ama onụk enye ndika iso ntịn̄ ikọ ye uko.—Jer. 1:17; 20:9.
3 Idaha nnyịn edi ukem ntre. Jesus “ọnọ nnyịn uyo ete ikwọrọ inọ mbio-obio, inyụn̄ idi ntiense ite Emi edi Enye emi Abasi ekenịmde ete edi Ebiereikpe ọnọ mme odu-uwem ye mme akpa-n̄kpa.” (Utom 10:42) Etop oro nnyịn itan̄ade edi n̄kpọ n̄kpa ye uwem ọnọ mbon oro ẹkopde enye. Ẹdibiere ikpe inọ mme owo ẹtiene nte mmọ ẹnamde n̄kpọ ẹban̄a eti mbụk. Ke ntak oro, mbiomo nnyịn edi ndinam ata ukem nte ẹkewụkde nnyịn ẹte inam. Idem ke ini mme owo ẹsịnde ndikpan̄ utọn̄, emi ọnọ nnyịn ifet ndiwụt udomo ima oro nnyịn imade mmọ ye uten̄e oro nnyịn inyenede inọ Jehovah ke ndisịn ifịk nnam se anade nnyịn inam. Edi esịne se ikande oro.
4 Nnyịn Imọbọ Ufọn: Ndinam uduak Abasi, inamke n̄kpọ m̀mê ẹnam n̄kpọ didie ke efakutom, anam nnyịn inyene emem, uyụhọ, ye inemesịt, emi owo mîkemeke ndinyene ke usụn̄ efen ekededi. (Ps. 40:8) Uwem nnyịn enen̄ede enyene uduak ye se ọwọrọde. Adan̄a nte nnyịn ibuanade ke utom ukwọrọikọ, ntre ke esịt ye ekikere nnyịn ẹwụhọ ke idotenyịn ye idatesịt edidu uwem ke obufa ererimbot Abasi. Ndikere mban̄a mme un̄wọn̄ọ N̄wed Abasi emi ofori idaha eke spirit nnyịn onyụn̄ ọsọn̄ọ itie ebuana nnyịn ye Jehovah.
5 Idem ọkpọkọm nnyịn ikwe usọp usọp utịp ke utom ukwọrọikọ nnyịn, eyedi imọtọ n̄kpasịp akpanikọ ke esịt owo oro edikọride ke edikem ini Jehovah. (John 6:44; 1 Cor. 3:6) Owo nnyịn ndomokiet ifiọkke adan̄a ediwak owo efen oro ẹdidide ẹdikpep ẹban̄a Obio Ubọn̄ ebe ke ukeme ikọt Jehovah, edide ke n̄kann̄kụk m̀mê ke ofụri ererimbot.
6 Nnyịn ikpenyene ndinam item Jesus emi n̄kan nte akanam edide: “Mbufo ẹtịn̄ enyịn ẹse, ẹkpeme, ẹnyụn̄ ẹbọn̄ akam; koro mbufo mîfiọkke edikem ini. Se ndọhọde mbufo, mmonyụn̄ ndọhọ kpukpru owo nte, Ẹkpeme.” (Mark 13:33, 37) Ntre, ndien, kpukpru nnyịn ikpakam ika iso nditan̄a eti mbụk Obio Ubọn̄, inamde esịt Jehovah adat nte nnyịn ibuanade ke ndinam akwa ye edisana enyịn̄ esie asana.