Yụhọ ye Se Enyenede
1 N̄wed Abasi ọnọ nnyịn item ete ise n̄kpọ iban̄a mbon ufọk nnyịn ke n̄kan̄ eke obụk, edi emi ikpenyeneke ndidi ata akpan n̄kpọ nnọ nnyịn ke uwem. Ana mme n̄kpọ eke spirit ẹdi akpa. (Matt. 6:33; 1 Tim. 5:8) Ndida ukem ukem edi n̄kpọ-ata ke “ndiọk eyo” emi. (2 Tim. 3:1) Nso idin̄wam nnyịn ndinam ntre?
2 Nyene Ekikere Bible: Ikọ Abasi ọtọt nnyịn ete ke ndibịne inyene ekeme ndibiat idaha eke spirit nnyịn. (Eccl. 5:10; Matt. 13:22; 1 Tim. 6:9, 10) Ke ndiọkeyo emi, ekpedi n̄kpọ akamade afanikọn̄ owo nnyịn ekededi ndisịn idem ke utom idịbi udia m̀mê mbubehe okụk tutu nnyịn isịk mme n̄kpọ eke spirit—mbono esop, ukpepn̄kpọ, ye utom an̄wautom—inịm ke udiana itie ke uwem nnyịn. (Luke 21:34-36) Ke okpụhọrede ye oro, Bible eteme ete: “Edieke nnyịn inyenede se idiade ye se idade ifụk iferi, nnyịn iyokụt ite oro ekem.”—1 Tim. 6:7, 8.
3 Emi iwọrọke ite ke ẹyom mme Christian ẹkokoi ẹdi ubuene. Edi item oro an̄wam nnyịn ndifiọk mme n̄kpọ eke obụk oro nnyịn inen̄erede iyom—udia, edisịnen̄kpọ, ye ufọkidụn̄ oro ekemde. Edieke nnyịn inyenede mme n̄kpọ oro ẹyomde ke uwem, nnyịn ikpebịneke ebeubọk n̄kokon̄ idaha udu uwem. Ke ini ikerede iban̄a ndidep n̄kpọ m̀mê ndinam utom efen efen, nnyịn iyanam ọfọn ndibụp idem nnyịn ite, ‘Nte emi enen̄ede edi se ẹyomde?’ Ndinam oro ayan̄wam nnyịn ndinam item eke odudu spirit emi: “Ẹkûkọmọ ke ima inyene; ẹnem-esịt ye se mbufo ẹnyenede.”—Heb. 13:5.
4 Edieke ibuọtde idem ye Jehovah, enye ọyọdiọn̄ nnyịn. (N̄ke 3:5, 6) Okposụkedi anade nnyịn inam utom ọkpọsọn̄ man inyene mme n̄kpọ ẹyomde ke usen ke usen, nnyịn ikọn̄ke uwem nnyịn ke mme n̄kpọ emi. Edide nnyịn inyene esisịt m̀mê ediwak, nnyịn iberi edem ke Jehovah ndiyụhọ mme udọn̄ nnyịn. (Phil. 4:11-13) Nte utịp, nnyịn imenyene uyụhọ otode Abasi ke adianade ye uwak edidiọn̄ eken.
5 Kpebe Mbuọtidem Mbon Efen: Eka oro ọkọbọkde eyen esie an̄wan ikpọn̄ ke usụn̄ akpanikọ ama ọtọn̄ọ ndidu mmemmem uwem sụn̄sụn̄. Kpa ye oro enye okokopde inem ufọk esie, enye ama ọwọrọ okodụn̄ ke ufọk oro ekekpride akan ndien ekem okodụn̄ ke ubet kiet. Emi ama an̄wam enye ndisụhọde mme ini utom esie man enye ekeme ndisịn ediwak ini ke utom ukwọrọikọ. Ke eyen esie ama okokpon onyụn̄ ọdọ ndọ, eka esie ama ọwọrọ ọkpọn̄ utom ke ini mîkemke, idem okposụkedi emi ọkọwọrọde edifiak nsụhọde ibat okụk esie. Eyenete nnyịn an̄wan emi odu ke ọyọhọ isua itiaba esie nte asiakusụn̄ ofụri ini ndien ituaha n̄kpọfiọk iban̄a se enye akayakde atak ke n̄kan̄ eke obụk man enịm mme ufọn n̄kpọ Obio Ubọn̄ akpa ke uwem esie.
6 Ebiowo kiet ye n̄wan esie ẹma ẹnam utom usiakusụn̄ ke ediwak isua ke adan̄aemi ẹkebọkde nditọ ita. Nte ubon, mmọ ẹma ẹkpep ndiyụhọ ye se mmọ ẹnen̄erede ẹyom utu ke ndisịn idem mbịne se idọn̄de mmọ ndinyene. Eyenete emi ọdọhọ ete: “Nnyịn ikenyene ndidu ata mmemmem uwem. Okposụkedi nnyịn ikosobode nsọn̄ọn̄kpọ, Jehovah ama esinọ nnyịn se nnyịn iyomde kpukpru ini. . . . Ke ini n̄kụtde ubon mi enịmde mme n̄kpọ eke spirit akpa ke uwem ntem, etie mi nte ke kpukpru n̄kpọ ẹfọn, ndien n̄kop uyụhọ.” N̄wan esie adian do ete: “Ke ini n̄kụtde [ebe mi] ọyọhọde ye utom eke spirit, mmesikop ntotụn̄ọ uyụhọ.” Nditọ n̄ko ẹnem esịt nte ete ye eka mmọ ẹbierede ndinam n̄kpọ Jehovah kpukpru ini.
7 Ye mbon oro ẹmekde utọ usụn̄ uten̄e Abasi emi utu ke ndibịne mme n̄kpọ obụkidem, Bible ọn̄wọn̄ọ uwak edidiọn̄ idahaemi ye ke uwem oro edide.—1 Tim. 4:8.