Wụt Esịtekọm Ban̄a Inyene Ukara Abasi
1 Ke ini akanamde ndutịm ndidiọn̄ temple, Edidem Josiah ama otoro mbon oro ẹkenọde utom oro ẹnam, ọdọhọde ete: “[Ẹkûbat, NW] silver oro ẹkenọde mmọ ke ubọk, koro mmọ ẹnamde n̄kpọ ke akpanikọ.” (2 Ndi. 22:3-7) Ẹma ẹkụt esịtekọm emi iren oro ẹkewụtde ẹban̄a ndisana n̄kpọ ke usụn̄ oro mmọ ẹkesede ẹban̄a inyene oro ẹkeyakde ẹsịn mmọ ke ubọk. Mfịn, nte nnyịn ibuanade ke ndinam edisana utom eti mbụk Abasi, oyom nnyịn n̄ko inam akpanikọ ke nte idade inyene oro ẹnọde nnyịn inam n̄kpọ.
2 Ke An̄wautom: Esịtekọm oro inyenede iban̄a akpan etop oro odude ke mme n̄wed nnyịn ye ndifiọk ekọmurua oro abuanade ke ndision̄o mmọ anam nnyịn ida mmọ ke akpan n̄kpọ. Nnyịn ikpenyeneke ndiyak mme n̄wed nnyịn ntịme ntịme nnọ mbon oro mîwụtke ata esịtekọm iban̄a etop Bible. Edieke owo owụtde esisịt udọn̄ ke eti mbụk, nnyịn imekeme ndinọ enye tract utu ke ndinọ mme n̄wed eken.
3 Nọ mme n̄wed ke usụn̄ oro owụtde ke amada enye ke akpan n̄kpọ. Kûbon mmọ ke an̄wan̄wa ebiet oro mmọ ẹkemede ndisuana. Man efep ndibaha n̄wed, diọn̄ọ ibat n̄wed oro enyenede ke ufọk mbemiso ọbọde n̄wed efen efen. Edieke esinyenede nyọhọ-nsụhọ nsiondi magazine kiet kiet kpukpru ini, kere ndisụhọde ibat oro esibọde.
4 Mme N̄wed Oro Adade Anam N̄kpọ Ọkpọkpọ: Nnyịn ikpenyene nditobo mme n̄wed oro nnyịn inen̄erede iyom. Nnyịn ikpenyene ndiwụt ufat akpan akpan ke ini isịnde eben̄e iyom mme n̄wed oro ẹkpade ediwak okụk ndision̄o utọ nte ediye uduot Bible, Reference Bible, ye ikpọ n̄wed eken, utọ nte Concordance, Index, mme eboho Insight, ye Proclaimers.
5 Ndi afo emesiwet enyịn̄ ye adres fo ke mme ọkpọkpọ n̄wed fo? Emi ayan̄wam nditre ndibọ n̄wed efen efen man ẹmen ẹkesịn ke itie mbon oro owo mîkwe aba. Edieke n̄wed ikwọ, Bible, m̀mê n̄wed ukpepn̄kpọ fo osopde, ekeme ndidi oyokụt enye ke otu n̄kpọ oro ẹfiọhọde ke Ufọkmbono Obio Ubọn̄ m̀mê itie mbono.—Luke 15:8, 9.
6 Ẹyak nnyịn idomo ndida mme n̄wed nnyịn nnam n̄kpọ ye eti ibuot. Emi edi usụn̄ oro ikemede ndiwụt ke imanam akpanikọ ke nte idade inyene Obio Ubọn̄ emi Jehovah ayakde esịn nnyịn ke ubọk inam n̄kpọ.—Luke 16:10.