“Nnyịn Isan̄a Ikpat Kiet Idi Mme Anam-Utom Abasi”
1 Apostle Paul ekewet ete: “Ami n̄kọtọ, Apollos ọkọbọk ke mmọn̄; edi n̄kọri oto Abasi. . . . Nnyịn isan̄a ikpat kiet idi mme anam-utom Abasi.” (1 Cor. 3:6, 9) Mme Christian eke akpa isua ikie ẹma ẹnen̄ede ẹfiọk ke Jehovah Abasi edinam mmimọ ikụt unen.
2 Ke Mme Ukpepn̄kpọ Bible: Ke inyenede ke ekikere nte ke utom nnyịn esịne edikpep mbon efen se Christ eketemede, odot nnyịn ibọn̄ akam iban̄a utom unam mbet nnyịn. Nnyịn ndinam emi owụt nte iberide edem ke Jehovah, oro anamde n̄kọri odu.
3 Utom Obio Ubọn̄ Nnyịn eke June 1996, page 3, ikpehe ekikere 7, ọdọhọ ete: “Nditọn̄ọ nnyụn̄ mberi ukpepn̄kpọ oro ye akam kaban̄a ndausụn̄ ye edidiọn̄ Jehovah anam ukpepn̄kpọ oro enyene uku, anam owo enyene idaha ekikere oro owụtde ukpono, onyụn̄ odụri ntịn̄enyịn ebịne Jehovah nte ata Andikpep.—John 6:45.”
4 Nso idi ndusụk n̄kpọ oro okpodotde ẹsịn ke akam oro ẹbọn̄de ke mme ukpepn̄kpọ Bible? Akam uwụtn̄kpọ Jesus ye akam oro Paul ọkọbọn̄de ke ibuot mbon Philippi ẹdi nti uwụtn̄kpọ. (Matt. 6:9-13; Phil. 1:9-11) Inaha akam nnyịn ẹnọniọn̄, edi mmọ ẹkpenyene ndisịne mme akpan n̄kpọ. Edi akpan n̄kpọ nnyịn ndisịn mme ikọ itoro oro ẹdotde nnọ Jehovah kaban̄a mme anana-ibat nti utom esie. Nnyịn imekeme nditịn̄ nte nnyịn idiọn̄ọde mme akwa idaha, ubọn̄, ye mme mfọnmma edu esie. (Ps. 145:3-5) Ndisiak enyịn̄ eyen ukpepn̄kpọ Bible oro, iso-ọfọn itịn̄de itụk mme idaha esie, inyụn̄ ibọn̄de akam ite enye akpakam anam n̄kọri ke n̄kan̄ eke spirit, eyenyene ufọn. Nte enye ọkọride, nnyịn imekeme ndidọhọ yak edidiọn̄ Jehovah odu ye ukeme oro enye esịnde ndidụk mme mbono esop ndinyụn̄ mbuana akpanikọ oro enye ekpepde ye mbon en̄wen. Sịn n̄kpeubọk man edidiọn̄ Jehovah okpodu ke utom ukwọrọikọ ke ofụri ererimbot.
5 Ini ewe okpodot ẹbọn̄ akam ke ukpepn̄kpọ Bible? Ẹkpenyene nditọn̄ọ ukpepn̄kpọ oro enyenede iwụk ye akam. Nte ededi, da ini nam an̄wan̄a eyen ukpepn̄kpọ nte ẹkpebọn̄de akam mbemiso ọtọn̄ọde ndibọn̄ akam ke ukpepn̄kpọ. Kpukpru nnyịn ikpakam idori enyịn ke Jehovah ndidiọn̄ mme ukeme nnyịn nte inịmde mme ukpepn̄kpọ Bible.