Nso ke Afo Enịm nte Ebeiso N̄kpọ?
1 Ediwak esop ido ukpono ẹsidori nsọn̄uyo ke mme edinam mfọnido, utọ nte edibọp mme ufọkn̄wed m̀mê ufọkibọk. Nte ededi, ke adan̄aemi Mme Ntiense Jehovah mîfreke “ndinam eti n̄kpọ ndinyụn̄ mfọn ido ye owo,” mmọ ẹnịm edin̄wam mme owo ke n̄kan̄ eke spirit nte ebeiso n̄kpọ.—Heb. 13:16.
2 Uwụtn̄kpọ Akpa Isua Ikie: Jesus ama anam ediwak nti utom ke ini utom ukwọrọikọ esie ke isọn̄, edi akpan utom esie ekedi ndidi ntiense nnọ akpanikọ. (Luke 4:43; John 18:37; Utom 10:38) Enye ama owụk mme mbet esie ete “ẹka ẹkenam kpukpru mme idụt ẹdi mbet [Imọ], . . . ẹnyụn̄ ẹkpep mmọ.” (Matt. 28:19, 20) Ndien enye ama owụt nte ke mbon oro ẹbuọtde idem ye imọ ẹyenam utom oro imọ ikọtọn̄ọde okpon akan se imọ ikanamde. (John 14:12) Jesus ekenịm utom ukwọrọikọ nte ebeiso n̄kpọ koro emi an̄wam mme owo ẹkpep n̄kpọ ẹban̄a usụn̄ edinyan̄a.—John 17:3.
3 Apostle Paul akada utom ukwọrọ esie nte ‘n̄kpọ oro obiomode imọ,’ kpa se ẹyomde inam emi imọ mîkekemeke ndifụmi. (1 Cor. 9:16, 17) Enye ama eben̄e idem ndiyak n̄kpọ ekededi atak, ndiyọ idomo ekededi, m̀mê ndisobo nsọn̄ọn̄kpọ ekededi man anam utom ukwọrọikọ esie. (Utom 20:22-24) Apostle Peter ye mme nsan̄a esie ẹma ẹnyene ukem edu emi. Idem kpa ye oro ẹkesịnde ke ufọk-n̄kpọkọbi ẹnyụn̄ ẹmiade mmọ, “mmọ [ikodopke] uyo ndikpep nnyụn̄ n̄kwọrọ, ẹte Jesus edi Christ.”—Utom 5:40-42.
4 Nso kaban̄a nnyịn? Ndi nnyịn imenịm utom editan̄a eti mbụk Obio Ubọn̄ ye edinam mme mbet nte ebeiso n̄kpọ? Ukem nte Jesus, nte nnyịn imenen̄ede ikere iban̄a mbon oro “ẹdude ke nnanenyịn ẹnyụn̄ ẹsuanade, nte erọn̄ eke mînyeneke andikpeme”? (Matt. 9:36) Mme n̄kpọntịbe ererimbot eke ndondo emi ye ntịn̄nnịm ikọ Bible ẹnen̄ede ẹwụt nte ke idiọk editịm n̄kpọ emi eyesịm utịt ke mîbịghike! Ndifiọk nte ke utom ukwọrọikọ edi akpan utom oyonụk nnyịn ndika iso n̄kwọrọ ikọ ifịk ifịk.
5 Dụn̄ọde Mme Idaha Fo: Sia idaha mme owo ẹsiwakde ndikpụhọde, ọfọn ndikere ke ini ke ini m̀mê nnyịn imekeme ndinam mme ukpụhọde man inyene ọyọhọ ebuana ke utom ukwọrọikọ. Eyenete an̄wan kiet ama anam utom usiakusụn̄ ofụri ini ke iduọk isua 1950, 1960, ye 1970 edi ekem okụt ke oyom itre ke ntak unana nsọn̄idem. Nte ededi, nte ini akakade enye ama afiak okop nsọn̄idem. Ke ndondo emi, enye ama afiak odụn̄ọde mme idaha esie onyụn̄ ebiere ke imọ imekeme ndifiak nsiak usụn̄. Enye okokop inemesịt didie ntem ndidụk Ufọkn̄wed Utom Usiakusụn̄ ke ini enye edide isua 90! Nso kaban̄a fi? Nte afo emekpere isua ukpọn̄ utom m̀mê isua ukụre ufọkn̄wed? Nte ukpụhọde ke mme idaha fo ekeme ndiyak fi asiak usụn̄?
6 Ke ini Jesus okokụtde ke “utom eke Martha an̄wanade ndinam nnọ isen efịghe enye akaha,” enye ama ada mfọnido ọnọ ekikere ete ke enye ọkpọbọ ediwak ufọn edieke enye akpanamde sụk n̄kpọ ifan̄. (Luke 10:40-42) Nte afo emekeme ndidu mmemmem uwem? Nte enen̄ede oyom n̄wan ye ebe ẹnam utom idịbi udia? Edieke ẹnamde mme ukpụhọde, nte ubon ekeme ndinyene se ẹyomde ke owo kiet kpọt ndinam utom idịbi udia? Ediwak owo ẹmebọ ufọn ke n̄kan̄ eke spirit ebe ke ndinam mme ukpụhọde man ẹnen̄ede ẹbuana ke utom ukwọrọikọ.
7 Kpukpru nnyịn ikpakam ikpebe uwụtn̄kpọ oro Jesus ye mme apostle ẹkenịmde! Nnyịn imenịm ke akpanikọ ite ke Jehovah ọyọdiọn̄ ukeme ofụri esịt oro nnyịn isịnde man inyene ọyọhọ ebuana ke akpan utom eke edikwọrọ eti mbụk Obio Ubọn̄.—Luke 9:57-62.