Editi—Ini Ndinen̄ede Ntie N̄kere N̄kpọ
Esisịt ini ke Jesus ama ekenịm udia mbubịteyo Ọbọn̄ ama, ẹma ẹmụm ẹnyụn̄ ẹwot enye ke ukperedem. Udia mbubịteyo oro ikedịghe ini ndia edi ekedi ini ndinen̄ede ntie n̄kere n̄kpọ. Owo itịn̄ke n̄kpọ ndomokiet ke Bible iban̄a nte ẹkediade ndia ke Jesus Christ ama ekenịm udia mbubịteyo Ọbọn̄ ama. Akpa mme Christian ikadiaha utọ ndia oro ndomokiet mbemiso m̀mê ke ẹma ẹkenịm usọrọ Editi ẹma.
Editi idịghe mboho udia uwem. Ntem, idotke esop ndinam ndutịm nditem udia m̀mê mme asuanetop ndinọ kiet eken ikot kaban̄a unọ idem inemesịt ye ikwọ. Emi ekeme ndinam mbon an̄wa ẹtịn̄ ẹban̄a edinam emi nte “Christmas Mme Ntiense Jehovah.” Emi ekeme ndinam owo atuak ukot ọduọ. (1 Cor. 8:12, 13; 10:23, 24) Editi idịghe ini owo ndidia “san̄asan̄a udia.” Ndikọbọ ke ndinyene mboho ọtọkiet ke usen Editi ye unana edikere mban̄a ubieresịt mbon efen ọwọrọ ke nnyịn ikpebeke Christ, emi ‘mîkenemke idemesie esịt.’ (Rome 15:2, 3) Mme utọ edinam oro ikpenyeneke ndidu ke Editi oro adade ukpono ọsọk Jehovah.
Didie ke nnyịn ikeme ndinam Editi edi ini ndinen̄ede ntie n̄kere mban̄a usụn̄ uwem nnyịn nte mme Christian? Nnyịn imekeme nditie n̄kere se nnyịn idade uwem nnyịn inam ye se nnyịn ididade enye inam ke ini iso. Nnyịn imekeme ndisọn̄ọ ubiere nnyịn ndinam uduak Jehovah inamke n̄kpọ m̀mê nso itịbe. Ke akande kpukpru, nnyịn imekeme ndinen̄ede n̄kere mban̄a ima oro Jehovah enyenede ke ndinọ ufak, ọkọrọ ye ima Jesus, oro ekenyịmede ndikpe ekọmurua ufak man nnyịn ikeme ndinyene idotenyịn. (John 15:13; Phil. 2:7, 8) Edi n̄kpọ nsịnudọn̄, onyụn̄ onụk owo didie ntem nditie n̄kere utịbe utịbe ẹnọ emi!—1 John 4:11.