Utom Ukwọrọikọ Christian—Akpan Utom Nnyịn
1 Kpukpru nnyịn imenyene nsio nsio orụk utom oro anade inam. Owo nditịm n̄kpọ nnọ mbon ufọk esie edi kiet ke otu n̄kpọ oro Abasi oyomde oto nnyịn. (1 Tim. 5:8) Nte ededi, utom oro abuanade ke owo nditịm n̄kpọ nnọ mbon ufọk esie ikpedịghe akpan n̄kpọ ikan utom edikwọrọ Obio Ubọn̄ ye edinam mbet.—Matt. 24:14; 28:19, 20.
2 Jesus ama ọnọ nnyịn uwụtn̄kpọ nditiene ke enye ‘ndikebem iso nyom Obio Ubọn̄.’ (Matt. 6:33; 1 Pet. 2:21) Okposụkedi ekenyenede esisịt ke n̄kan̄ eke obụk, enye ama enen̄ede esịn idem ke ndinam uduak Ete esie. (Luke 4:43; 9:58; John 4:34) Enye ama esịn̄ede idemesie ke ndinọ ikọ ntiense ke kpukpru ifet. (Luke 23:43; 1 Tim. 6:13) Enye ama esịn udọn̄ ọnọ mme mbet esie ndinyene ukem ntotụn̄ọ udọn̄ oro ke utom idọk.—Matt. 9:37, 38.
3 Ndikpebe Jesus Mfịn: Nnyịn imekeme ndikpebe uwụtn̄kpọ Jesus ebe ke ndidomo ndidu mmemmem uwem oro ọkọn̄ọde ke utom ukwọrọikọ Christian. Edieke nnyịn inyenede mme n̄kpọ udu uwem, ẹyak nnyịn inam item Bible emi ọdọhọde itre ndikọ ekese inyene ererimbot emi. (Matt. 6:19, 20; 1 Tim. 6:8) Ekpetịm ọfọn didie ntem ndiyom nditat ebuana nnyịn ke utom ukwọrọikọ! Edieke nnyịn isobode mme idaha oro ẹkamade n̄kpọ-ata, ẹyak nnyịn isịn̄ede idem nte Jesus ekesịn̄erede, ikûyak mme editịmede esịt uwem ẹkpon ẹkan akpan utom nnyịn oro edide editan̄a eti mbụk Obio Ubọn̄.—Luke 8:14; 9:59-62.
4 Idem mbon oro ẹnyenede ediwak mbiomo ẹsinam utom ukwọrọikọ edi ebeiso n̄kpọ. Eyenete eren kiet emi enyenede akamba ubon, eti utom, onyụn̄ anamde utom nte ebiowo ke esop Christian ọdọhọ ete: “Ami nse utom ukwọrọikọ nte ubọkọkọ mi.” Eyenete an̄wan emi edide asiakusụn̄ ọdọhọ ete: “Usiakusụn̄ otịm ọfọn akan ubọkọkọ ererimbot eke okụtde unen.”
5 Inamke n̄kpọ m̀mê nso idi idaha nnyịn, nnyịn ikpakam itiene uwụtn̄kpọ Jesus. Didie? Ebe ke ndinam utom ukwọrọikọ Christian edi akpan utom nnyịn.