Utom Oro Ọnọde Nduọkodudu
1 Etop Bible ada nduọkodudu ọsọk kpukpru owo oro ẹbọde ẹnyụn̄ ẹdade enye ẹsịn ke edinam. (Ps. 19:7, 8) Enye an̄wam mmọ ndikịbe mbọhọ nsunsu ukpepn̄kpọ ye mme edinam oro ẹnọde unan onyụn̄ ọnọ idotenyịn oro ẹkemede ndiberi edem. Nte ededi, idịghe mbon oro ẹbọde eti mbụk kpọt ẹkeme ndibọ ufọn. Mbon oro ẹbuanade ọnọ-nduọkodudu akpanikọ Bible ye mbon en̄wen ẹbọ nduọkodudu n̄ko.—N̄ke 11:25.
2 Utom Ukwọrọikọ ọnọ Nduọkodudu: Jesus ọkọdọhọ ete ke mbon oro ẹnyịmede ndamban̄a ọkpọnọ edidi mbet Christian, oro abuanade utom ukwọrọikọ ye edinam mbet, ‘ẹyekụt nduọkodudu ẹnọ ukpọn̄ mmọ.’ (Matt. 11:29) Enye ke idemesie ama okụt nte ndinọ mbon en̄wen ikọ ntiense ọnọde nduọkodudu. Enye akada emi nte udia. (John 4:34) Ke ini enye ọkọdọn̄de mbet 70 ẹka ẹkekwọrọ ikọ, mmọ ẹma ẹdat esịt ndikụt nte Jehovah ọkọdiọn̄de ukeme mmimọ.—Luke 10:17.
3 Ndibuana ke utom ukwọrọikọ ọnọ ediwak mme Christian mfịn n̄ko nduọkodudu. Eyenete an̄wan kiet ọkọdọhọ ete: “Utom ukwọrọikọ ọnọ nduọkodudu koro enye ọnọ uwem mi ndausụn̄ ye uduak. Mme ọkpọkpọ mfịna ye mme mfịghe eke usen ke usen ẹsisụhọde ke ini mbuanade ke utom ukwọrọikọ.” Ifịk ifịk asan̄autom efen ọkọdọhọ ete: “Utom ukwọrọikọ . . . anam Jehovah edi ata owo ọnọ mi ke usen ke usen onyụn̄ ọnọ mi emem ye ndusụk udomo inemesịt oro owo mîkemeke ndinyene nto usụn̄ en̄wen ekededi.” Nso ifet ke nnyịn inyene ntem ndidi “mme anam-utom Abasi”!—1 Cor. 3:9.
4 Ọkpọnọ Christ Ememem: Ke adan̄aemi ẹketemede mme Christian ‘ndin̄wana eti eti,’ Jesus ikọdọhọke ete inam ikan se ikemede ndinam. (Luke 13:24) Ke akpanikọ, enye ke ima ọkọdọhọ nnyịn idụk idak ọkpọnọ imọ. (Matt. 11:29) Mbon oro ẹsobode n̄kpọsọn̄ idaha ẹkeme ndinyene mbuọtidem nte ke utom ofụri esịt mmimọ, idem ọkpọkọm ekpri didie, enem Abasi esịt.—Mark 14:6-8; Col. 3:23.
5 Ọnọ nduọkodudu didie ntem ndinam n̄kpọ nnọ Abasi emi adade se ededi oro inamde ke ntak enyịn̄ esie, ke akpan n̄kpọ! (Heb. 6:10) Nnyịn ikpakam idomo kpukpru ini ndinọ enye se ifọnde ikan.