Ikọ Itoro Esinọ Nsịnudọn̄
1 “Nte ami n̄kedịghe eti eyen mfịn?” ntre ke ekpri eyenan̄wan kiet oro okosụk en̄wekde eyet okobụp ke oyomde ndidụk idap. Mbụme oro ama akpa eka esie idem. Kpa ye oro ama okokụt nte ekpri eyen esie ekesịnde ukeme nditre ndisịn ntịme, enye iketịn̄ke ndomo ikọ kiet nditoro enye. Ekpri eyenan̄wan oro ndikatua ekpenyene nditi kpukpru nnyịn—n̄kpri ye ikpọ—nte ke imoyom itoro. Ndi nnyịn imesinọ mbon oro ẹdude ye nnyịn nsịnudọn̄ ebe ke ndiwụt esịtekọm mban̄a nti n̄kpọ oro mmọ ẹnamde?—N̄ke 25:11.
2 Ekemmọ mme Christian ẹsinam ediwak nti n̄kpọ oro odotde nnyịn itoro mmọ. Mbiowo, mme asan̄autom unamutom, ye mme asiakusụn̄ ẹsinam utom ọkpọsọn̄ man ẹse ẹban̄a mme mbiomo mmọ. (1 Tim. 4:10; 5:17) Mme ete ye eka oro ẹbakde Abasi ẹsisịn ofụri ukeme ndibọk nditọ mmọ nte Jehovah etemede. (Eph. 6:4) Mme uyen Christian ẹsin̄wana ọkpọsọn̄ en̄wan man ẹbiọn̄ọ “spirit ererimbot.” (1 Cor. 2:12; Eph. 2:1-3) Mbon en̄wen ẹka iso ẹnam n̄kpọ Jehovah kpa ye usọn̄, unana nsọn̄idem, m̀mê mme idomo eken. (2 Cor. 12:7) Kpukpru utọ mbon oro ẹdot itoro. Nte nnyịn imesitoro mmọ ke mme ukeme oro mmọ ẹsịnde?
3 Sio Akpan N̄kpọ Kiet Da Toro Owo: Kpukpru nnyịn imesinen̄ede ikop idatesịt ke ini ikopde nte ẹdade ke mbot utịn̄ikọ ẹnọ kpukpru owo itoro. Nte ededi, esinem akan ke ini ẹdide ẹbịne nnyịn ẹditoro nnyịn. Ke uwụtn̄kpọ, ke ibuot 16 ke leta oro enye ekewetde ọnọ ẹsọk mbon Rome, Paul ama osio akpan n̄kpọ emi enye okokụtde nte odotde, ada ọkọm Phoebe, Prisca ye Aquila, Tryphaena ye Tryphosa, ye Persis, ke ndisiak ibat ibat. (Rome 16:1-4, 12) Enyene ndidi mme ikọ esie ẹkesịn udọn̄ didie ntem ẹnọ mme anam-akpanikọ oro! Utọ itoro oro esifiak ọnọ nditọete nnyịn nsọn̄ọ nte ke ẹyom mmọ esinyụn̄ anam nnyịn inen̄ede idiana kiet. Nte afo omotoro owo ke ndondo emi aban̄a n̄kpọ oro enye anamde?—Eph. 4:29.
4 Enyene Ndito Esịt: Ana itoro oto esịt man enen̄ede ọnọ nsịnudọn̄. Mme owo ẹkeme ndifiọk m̀mê se nnyịn itịn̄de oto esịt m̀mê edi ikpîkpu ‘ikọ nneminua.’ (N̄ke 28:23) Nte nnyịn inọde idem nnyịn ukpep ndikụt nti edu ke idem mbon en̄wen, esịt nnyịn oyonụk nnyịn ndinọ itoro. Nnyịn ikpakam itat ubọk ke ndinọ itoro ofụri esịt, ifiọkde ite ke ‘ikọ oro ẹtịn̄de ke ekem ini esifọn.’—N̄ke 15:23.