Ufọkn̄wed Utom Ukara Abasi eke 2004
1 Jehovah etịm mme usụhọde owo idem man ẹnam utom oro enyenede ufọn ọnọ ofụri ererimbot. Ukpep oro ẹnọde kpukpru urua ke Ufọkn̄wed Utom Ukara Abasi edi usụn̄ kiet oro Abasi adade anam emi. Nte afo ke abuana ọyọhọ ọyọhọ nte mme idaha fo ẹyakde? Ke January, ẹyenam mme ukpụhọde ifan̄ ye uduak edin̄wam nditọ ufọkn̄wed ẹnen̄ede ẹbọ ufọn ẹto ndutịm emi.
2 Edikpụhọ Udiana Ọnọ-Item: Nditọete oro ẹnọde utịn̄ikọ item ye mme akpan n̄kpọ ẹtode edikot Bible ẹsiwụt esịtekọm ẹban̄a item oro udiana ọnọ-item esinọde. Ke ebiet emi ẹnyenede ediwak mbiowo oro ẹdotde, ẹkeme ndikpụhọ andinam utom nte udiana ọnọ-item kpukpru isua. Ke usụn̄ emi, mbon en̄wen ẹyetiene ẹnam utom emi; edi ke edide akpan n̄kpọ akan, mbiowo ye mme asan̄autom unamutom oro ẹdotde ẹyebọ ufọn ẹto ntan̄ndian ifiọkutom ẹtode nsio nsio nti mme etịn̄ikọ ye mme andikpep.
3 Ndutịm Edifiak Ndụn̄ọde Oro Ẹnemede-Neme: Edieke esop mbufo enyenede mbono circuit ke urua edifiak ndụn̄ọde oro ẹnemede-neme, do ẹkpenyene ndisio edifiak ndụn̄ọde emi (ye ndutịm eken ke urua oro) nnịm urua efen ke iso, ndien ẹkpenyene ndida ndutịm urua oro etienede nnam n̄kpọ ke urua mbono circuit oro. Nte ededi, iyomke ẹkpụhọ ndutịm ofụri urua iba ke ini edifiak ndụn̄ọde oro ẹnemede-neme odụkde ye edidi esenyịn circuit. Utu ke oro, ẹkpenyene ndikwọ ikwọ, ẹnọ ido utịn̄ikọ, ye mme akpan n̄kpọ ẹtode edikot Bible nte ẹkediomide. Utịn̄ikọ item (ẹnọde ke ini ẹkụrede ido utịn̄ikọ) ekpenyene ndito ndutịm urua oro etienede. Ke ini ẹkụrede mme akpan n̄kpọ ẹtode edikot Bible, Esoputom oro edide minit 30 eyetiene, emi ẹkemede ndinam edi ikpehe ita oro kiet kiet edide minit 10 m̀mê ikpehe iba oro kiet kiet edide minit 15. (Ẹkpenyene ndisio mme ntọt n̄kann̄kụk mfep.) Ke Esoputom okụrede, ẹyekwọ ikwọ, ndien utịn̄ikọ esenyịn circuit eyetiene ke minit 30. Ufọkn̄wed Utom Ukara Abasi eke urua oro etienede ọyọtọn̄ọ ye ido utịn̄ikọ ye mme akpan n̄kpọ ẹtode edikot Bible nte ẹkediomide, ndien ẹyenam edifiak ndụn̄ọde oro ẹnemede-neme.
4 Da ifet emi kiet kiet nam n̄kọri ke n̄kan̄ eke spirit. Nte afo ọbọde ufọn oto Ukpepn̄kpọ Ufọkn̄wed Utom Ukara Abasi, afo eyesịn udọn̄ ọnọ esop mbufo, enyene udeme ke ndisu ntịn̄nnịm ikọ Bible, onyụn̄ ada itoro ọsọk Andinyene utịbe utịbe etop emi anade nnyịn itan̄a mi.—Isa. 32:3, 4; Edi. 9:19.