Ikpehe 5: Ndinịm Ukpepn̄kpọ Bible Oro Enyenede Uforo
Ndibiere Udomo N̄kpọ Oro Ẹkpekpepde
1 Ke ini Jesus ekekpepde mme mbet esie n̄kpọ, enye ama esikere aban̄a ukeme mmọ, etịn̄de ikọ ọnọ mmọ “adan̄a nte mmọ ẹkemede ndikop.” (Mark 4:33; John 16:12) Ke ukem usụn̄ oro, mme andikpep Ikọ Abasi mfịn ẹnyene ndibiere udomo n̄kpọ oro ẹkpekpepde ke ini ẹnịmde ukpepn̄kpọ Bible. Emi edikọn̄ọ ke ukeme ye idaha andikpep ye eke eyen ukpepn̄kpọ.
2 Kọri Ọkpọsọn̄ Mbuọtidem: Ekeme ndiyom ẹnịm ukpepn̄kpọ ikaba m̀mê ikata man ndusụk nditọ ukpepn̄kpọ ẹmụm n̄kpọ oro nditọ ukpepn̄kpọ eken ẹkemede ndimụm inikiet oro ẹkpepde mmọ. Oyom nnyịn inam se ikpepde an̄wan̄a nditọ ukpepn̄kpọ utu ke ndikpep uwak n̄kpọ ke esisịt ini. Oyom kpukpru nditọ ukpepn̄kpọ ẹnyene eti ntak ke Ikọ Abasi, oro anamde mmọ ẹkpụhọ ido ukpono mmọ.—N̄ke 4:7; Rome 12:2.
3 Nte afo enịmde ukpepn̄kpọ emi kpukpru urua, biat ini oro ọniọn̄de ekem man an̄wam eyen ukpepn̄kpọ oro ọfiọk onyụn̄ enyịme se enye ekpepde ke Ikọ Abasi. Kûkpep owo n̄kpọ itọk itọk ye unana edisio akpanikọ oro ekpepde n̄wụt. Nọ ini oro ekemde man ẹwụk ntịn̄enyịn ke mme akpan n̄kpọ ẹnyụn̄ ẹkot mme akpan itie N̄wed Abasi oro ẹsọn̄ọde ukpepn̄kpọ oro.—2 Tim. 3:16, 17.
4 Kûwọn̄ọde Ntịn̄enyịn: Ke adan̄aemi nnyịn mîyomke ndinam ukpepn̄kpọ oro edi itọk itọk, nnyịn n̄ko iyomke n̄kpọ ọwọn̄ọrede ntịn̄enyịn nnyịn. Edieke eyen ukpepn̄kpọ esimade nditịn̄ uwak ikọ mban̄a ọkpọkpọ mbubehe, nnyịn imekeme ndinam ndutịm man ineme mme n̄kpọ emi ke ukpepn̄kpọ ama okokụre.—Eccl. 3:1.
5 Ke n̄kan̄ eken, ifiopesịt oro inyenede iban̄a akpanikọ ekeme ndinam edi ọkpọsọn̄ n̄kpọ nnyịn nditịn̄ ikọ mbio mbio ke ini ukpepn̄kpọ. (Ps. 145:6, 7) Ke ini ke ini, ekpri n̄kpọ oro ẹtịn̄de ẹdian m̀mê ifiọkutom oro ẹbụkde ekeme ndinam se ekpepde an̄wan̄a, edi nnyịn idiyomke mmọ ẹwak m̀mê ẹniọn̄ ẹkaha tutu mmọ ẹbiọn̄ọ eyen ukpepn̄kpọ ndinyene nnennen ifiọk aban̄ade mme akpan ukpepn̄kpọ Bible.
6 Ebede ke ndikpep udomo n̄kpọ oro ekemde ke mme ini ukpepn̄kpọ kiet kiet, nnyịn iyan̄wam nditọ ukpepn̄kpọ Bible ‘ndisan̄a ke un̄wana Jehovah.’—Isa. 2:5.