Leta Otode Otu Ukara
Nte nnyịn ikperede ndidụk obufa editịm n̄kpọ emi edide, edi usọp usọp n̄kpọ nnyịn ndibet Jehovah. (Zeph. 3:8) Prọfet Daniel ọkọdọhọ ke “Abasi . . . ayararede ndịbe n̄kpọ . . . , ndien edi enye asian . . . se ididide ke ukperedem usen.” (Dan. 2:28) Nso ifet ke edi ntem ndidu uwem ke utịt ini oro ẹkebemde iso ẹtịn̄ ẹban̄a ndinyụn̄ mfiọk ndịben̄kpọ oro Jehovah ayararede idahaemi!
Ebede ke “ofụn emi anamde akpanikọ onyụn̄ enyenede ọniọn̄,” Jehovah sụn̄sụn̄ ama ayarade uduak esie nditan̄ “akwa otuowo” mme andituak ibuot emi ẹtode ofụri ererimbot mbok ọtọkiet ke mme mfịna mfịna “akpatre usen” emi. (Matt. 24:45; Edi. 7:9; 2 Tim. 3:1) Isaiah 2:2, 3 ọdọhọ ke ẹtan̄ otu ofụri ererimbot emi ẹbok ke “utịt eyo.” Kpukpru isua, editan̄ mbok emi esika iso kpa ye ndutịme ye afai oro ẹyọhọde ererimbot emi.
Ke isua 2004, ẹma ẹnam nnyịn itịm ifiọk ufọn edikop item Jesus emi: “Ẹkpeme . . . Ẹben̄e Idem.” (Matt. 24:42, 44) Se itịbede ke ererimbot enen̄ede enyene se ọwọrọde ọnọ mme Christian, emi ẹtịmde ẹfiọk “idiọn̄ọ ini” ẹnyụn̄ ẹnamde n̄kpọ ẹban̄a idiọn̄ọ oro nte odotde. (Matt. 16:1-3) Man anam Ikọ esie osu, Jehovah ayaka iso ndidu ye ikọt esie oro enye etịmde kpa ye ubiọn̄ọ ekededi oro mmọ ẹkemede ndisobo.
Kpa ye ukeme oro ndusụk owo ẹsịnde man ẹbiọn̄ọ m̀mê ẹtre editan̄a Obio Ubọn̄, nditọete nnyịn ẹka iso ndisuan ikọ akpanikọ nnyụn̄ nsop idem ọtọkiet. (Utom 5:19, 20; Heb. 10:24, 25) Ke June 2004, esop usion̄o ikpe ke Moscow, Russia, ama ada ye ubiereikpe oro ekpri esopikpe ọkọnọde ndikpan utom Mme Ntiense Jehovah nnyụn̄ mbiat unen oro ẹkenọde mmọ. Nte ededi, nditọete do ikopke mmemidem; mmọ ẹdiọn̄ọ se Abasi oyomde oto mmimọ, mmọ ẹnyụn̄ ẹkop uyo esie nte Andikara ẹkan uyo owo. (Utom 5:29) Nnyịn imenyene mbuọtidem nte ke Jehovah ọyọnọ mme asan̄autom esie ndausụn̄ kpa ye idiọk ubiereikpe oro.
Ke Obio Ukara Georgia ke isua ifan̄ emi ẹkebede, nditọete ẹma ẹtaba inyene mmọ, ẹsobo afai otode otu mbon ntịme, ẹma ẹnyụn̄ ẹfọp n̄wed mmọ. Edi baba n̄kpọekọn̄ kiet eke ẹbotde ẹban̄a mmọ ikekwe unen. (Isa. 54:17) Ke isua utom 2004, ẹma ẹfiak ẹnọ mme Ntiense Jehovah unyịme nte ekemde ye ibet ke Georgia. Ẹma ẹnịm mbono ye unana ubiọn̄ọ, ndien n̄wed ẹmebe ẹdụk obio oro. Ẹma ẹtọt mbufa n̄wakn̄kan ibat mme asuanetop ye mme andidụk Editi.
Ke Armenia, Eritrea, Obio Ukara Korea, Rwanda, ye Turkmenistan, ẹma ẹdọn̄ nditọete ke ufọk-n̄kpọkọbi ke ntak nsọn̄ọnda mmọ. Okposụkedi ẹfiomode mmọ, mmọ ẹdiọn̄ọ ntak oro N̄wed Abasi ọnọde kaban̄a mme idomo oro mmọ ẹsobode, ndien emi an̄wam mmọ ndimụm nsọn̄ọnda mmọ n̄kama nte mmọ ẹbetde edinyan̄a Jehovah.—1 Pet. 1:6; 2 Pet. 2:9.
Nte mbufo ẹkotde mme “Akpan N̄kpọntịbe Isua Oko” ẹnyụn̄ ẹdụn̄ọrede “Ibatutom Ofụri Ererimbot” eke 2004 ke 2005 Yearbook of Jehovah’s Witnesses, mbufo ẹyedara mme ufọn Jehovah. (Ps. 31:19; 65:11) Nnyịn imodori enyịn ite ke Yearbook emi eyesịn udọn̄ ọnọ mbufo ndika iso nsan̄a ke usụn̄ oro enemde Abasi esịt.—1 Thess. 4:1.
Ke ẹsịn ọkpọsọn̄ ukeme ndinam akpanikọ ẹsịm kpukpru orụk owo. Ke uwụtn̄kpọ, ẹmetịm mme vidio, DVD, ye mme n̄kpọ eken ke usem idiọn̄ọ ye mme n̄wed nnan man ẹn̄wam mbon inan ye mme nnan ke n̄kan̄ eke spirit. Ediwak mme asuanetop Obio Ubọn̄ ẹmekpep usem oro mbon emi ẹwọrọde idụn̄ oro ẹdụn̄de ke efakutom esop mmọ ẹsemde.
Ke adianade do, ẹma ẹtọn̄ọ ediwak otu emi ẹdude nsannsan ke mme efakutom emi ọsọn̄de owo ndisịm. N̄kọk itieutom kiet enyene se ibede otu 300 emi ẹdude nsannsan, oro ẹnyenede se iwakde ibe mme asuanetop 7,000. Nso idotenyịn kaban̄a mbufa esop ke emi ọnọ ntem! Akan oro, ke otu owo 16,760,607 emi ẹkedụkde Editi ke isua utom emi, se ibede owo miliọn 10 ikedịghe Mme Ntiense. Emi edi ọkpọsọn̄ uyarade nte ke in̄wan̄ oro adatde ke ana ebet ukpen̄e.
Nnyịn imọkọm Jehovah ke akpakịp edidiọn̄ esie ye ima ima usụn̄ emi enye esede aban̄a nnyịn ke usen ke usen. (N̄ke 10:22; Mal. 3:10; 1 Pet. 5:7) Nte nnyịn isan̄ade ikpat kiet ika iso ke “ukperedem usen” emi, nnyịn iberi edem inyụn̄ ibuọt idem ke Jehovah. Inamke n̄kpọ m̀mê mme mfịna ewe ke nnyịn isobo, ẹyak nnyịn iti ibuotikọ isua 2005: “Un̄wam mi oto Jehovah.” (Ps. 121:2, NW) Mbọk ẹbọ ima ye akam nnyịn ke ibuot mbufo.
Nditọete mbufo,
Otu Ukara eke Mme Ntiense Jehovah