Ikpehe 6: Ndinịm Ukpepn̄kpọ Bible Oro Enyenede Uforo
Ke Ini Eyen Ukpepn̄kpọ Obụpde Mbụme
1 Ke ndondo oro ukpepn̄kpọ Bible enyenede iwụk, esifọn ndikpep mme ukpepn̄kpọ Bible ke adiana ke adiana utu ke ndidi owo ikpepke ibuot nneme kiet ikụre ẹbe ẹka efen. Emi esin̄wam eyen ukpepn̄kpọ ndikọ nnennen ifiọk nnyụn̄ nnam n̄kọri ke n̄kan̄ eke spirit. (Col. 1:9, 10) Nte ededi, nditọ ukpepn̄kpọ ẹsiwak ndibụp mbụme mban̄a nsio nsio n̄kpọ ke ini ukpepn̄kpọ osụk akade iso. Didie ke ẹkpese ẹban̄a emi?
2 Wụt Mbufiọk: Emekeme ndibọrọ mme mbụme oro ẹnyenede ebuana ye se ẹkpepde ke ubọk ke ebe oro. Edieke n̄wed oro ẹkamade ẹkpep n̄kpọ edibọrọde mbụme oro, ndidọhọ ke n̄wed oro ọyọbọrọ mbụme oro ekeme ndikem. Nte ededi, edieke mbụme mînyeneke ebuana ye ukpepn̄kpọ oro m̀mê ediyomde ẹnam ndụn̄ọde man ẹnọ nnennen ibọrọ, ọkpọfọn ẹbọrọ mbụme oro ke ẹma ẹkekpep n̄kpọ ẹkụre m̀mê ke ini efen. Ndusụk owo ẹkụt ke ndiwet mbụme oro nnịm anam eyen ukpepn̄kpọ ọdiọn̄ọ ke ẹda mbụme imọ ke akpan n̄kpọ inyụn̄ iyakke ẹtịmede ukpepn̄kpọ oro.
3 Ẹneme ediwak ukpepn̄kpọ Bible ibio ibio kpọt ke mme akpan n̄wed ukpepn̄kpọ nnyịn. Nso edieke n̄kpọ kiet ọsọn̄de eyen ukpepn̄kpọ ndinyịme m̀mê enye enen̄erede ọsọn̄ọ eyịre ke nsunsu edinịm ke akpanikọ kiet? Ọkpọfọn ẹse n̄wed efen oro enemede se Bible etịn̄de aban̄a ibuot nneme oro ọyọhọ ọyọhọ. Edieke eyen ukpepn̄kpọ mîsụk inịmke ke akpanikọ, kpọn̄ ibuot nneme enye oro tutu ini efen nyụn̄ ka iso ke ukpepn̄kpọ mbufo. (John 16:12) Nte ifiọk Bible oro enye enyenede ọdiọn̄de-diọn̄ okpon, enye onyụn̄ anamde n̄kọri ke n̄kan̄ eke spirit, ukpepn̄kpọ Bible oro ekeme ndin̄wan̄a enye.
4 Nyene Nsụhọdeidem: Edieke mûtịmke ufiọk ibọrọ mbụme, kpeme mbak udutịn̄ ekikere idemfo. (2 Tim. 2:15; 1 Pet. 4:11) Dọhọ ke iyanam ndụn̄ọde ke mbụme oro inyụn̄ ifiak idi man idinọ ibọrọ. Afo emekeme ndida ifet oro n̄kpep eyen ukpepn̄kpọ nte ekemede ndinam ndụn̄ọde. Wụt enye nsịtnsịt nte enye ekemede ndikama nsio nsio n̄kpọ unam ndụn̄ọde oro esop Jehovah ọnọde nnam ndụn̄ọde. Ke usụn̄ emi, enye ke akpatre eyekeme ndibọrọ mbụme idemesie.—Utom 17:11.