Ndutịm Ubon—Itie N̄wed Abasi eke Usen ke Usen
1 Ima ima ete ye eka ẹsinen̄ede ẹsịn ukeme man ẹnọ nditọ mmọ nti udia kpukpru usen. Se ikam inen̄ede idi akpan n̄kpọ ikan edi ndinọ mmọ udia eke spirit emi otode Ikọ Abasi. (Matt. 4:4) Usụn̄ kiet oro afo ekemede ndin̄wam nditọ fo ẹnen̄ede ẹnyene udọn̄ ẹnọ n̄kpọ eke spirit ẹnyụn̄ ‘ẹkọri ẹsịm edinyan̄a’ edi ndida ini kpukpru usen nneme itie N̄wed Abasi eke usen ke usen ye mme utịn̄ikọ nte ubon. (1 Pet. 2:2) Ini ewe ke afo ekeme ndisịn emi ke ndutịm ubon fo?
2 Ke Mme Ini Udia: Ndineme itie N̄wed Abasi ke usenubọk ekeme ndin̄wam ubon fo nditi Jehovah ke ofụri usen oro. (Ps. 16:8) Eka kiet ama anam edi ido esie ndisikot nnyụn̄ nneme itie N̄wed Abasi ye mme utịn̄ikọ ye eyen esie ke adan̄aemi enye adiade udia usenubọk onyụn̄ ọbọn̄ akam ye enye mbemiso enye akade ufọkn̄wed. Emi ama ọsọn̄ọ eyen oro idem nditre ndikan̄ mbuọtidem ke ini ẹkesidọhọde enye edibuana ke mme edinam ufreidụt, ndibiọn̄ọ idomo oburobụt edinam, ndinyụn̄ nnọ nditọ ufọkn̄wed ye mme andikpep ikọ ntiense uko uko. Okposụkedi enye ekedide n̄kukụre Ntiense ke ufọkn̄wed, akananam enye ikekereke ke idu ikpọn̄.
3 Edieke mûkemeke ndineme itie N̄wed Abasi ke usenubọk, afo emekeme ndinam emi ye ubon fo ke ini efen ke usen oro, ndusụk enemede ke ini udia mbubịteyo. Ndusụk owo n̄ko ẹsida ini emi ndineme ifiọkutom oro mmọ ẹkenyenede ke an̄wautom ye mme akpan n̄kpọ oro mmọ ẹkekụtde ke ini ẹkotde Bible ke idemmọ. Ediwak owo ẹsiti mme utọ ini udia oro nte kiet ke otu mme ini inemesịt oro mmimọ isinyenede ọtọkiet nte ubon.
4 Ke Okoneyo: Mfọnn̄kan ini oro ndusụk ubon ẹsinemede itie N̄wed Abasi eke usen ke usen edi ke okoneyo mbemiso edede. Emi n̄ko ekeme ndidi eti ini ndibọn̄ akam ọtọkiet. Nte nditọ mbufo ẹsikopde nte mbufo ẹtịn̄de ẹban̄a Jehovah ẹnyụn̄ ẹbọn̄de akam ẹnọ enye kpukpru usen, enye akabade edi ata owo ọnọ mmọ.
5 Jehovah akpakam ọdiọn̄ ukeme oro mbufo ẹsịnde ndisịn akpanikọ ke esịt nditọ mbufo nte ẹdade Ẹdụn̄ọde N̄wed Abasi ke Usen ke Usen ẹnam n̄kpọ nte ọfọnde.