Ndikwọrọ Ikọ Uforo Uforo ke Mme Itie Edinam Ofụri Owo
1. Ke ndikpebe mme Christian akpa isua ikie, didie ke mme Christian mfịn ẹkwọrọ ikọ uforo uforo ke mme itie edinam ofụri owo, ndien ye nso utịp?
1 Ukem nte mme akpa mbet Jesus, mme Christian mfịn ẹyom ndibuana eti mbụk ye mme owo ke kpukpru ebiet oro ẹkemede ndikụt mmọ. (Utom 16:13; 17:17; 20:20, 21) Nte utịp ukeme oro mmọ ẹsịnde ndikwọrọ ikọ ke mme itie edinam ofụri owo, mmọ ẹsikụt mbon oro ẹnyenede udọn̄, emi owo mîkpekwe ke ini utom ukwọrọikọ eke ufọk ke ufọk.
2. Ntak oyomde inyene mbufiọk ke ini ikwọrọde ikọ ke mme itie edinam ofụri owo, ndien didie ke nnyịn ikeme nditịp nsịn ke n̄kpọ ndisan̄a ke nde ke nde?
2 Oyom ẹnyene mbufiọk ke ini ẹkwọrọde ikọ ke mme itie edinam ofụri owo. Nte ido edide, esinen̄ede ọfọn nditre ndisio idem nnyan ke ini ikwọrọde ikọ. Ke uwụtn̄kpọ, edieke ata ediwak mme asuanetop ẹdụkde itie mbubehe kiet, idem ekeme ndikpa ndusụk owo mban̄a edidi nnyịn. Emi inọhọ utom nnyịn uku onyụn̄ ekeme ndinam nnyịn ikûkụt unen. Nso ke ẹkpenam man emi okûtịbe? Ndusụk esop emi ẹnyenede ediwak itie oro ẹkpekwọrọde ikọ ke mme itie edinam ofụri owo ẹkụt nte ọfọnde nditịm mmọ emi nte mme efakutom. (1 Cor. 14:40) Ke adianade do, nnyịn imekeme nditịp nsịn ke n̄kpọ ndisan̄a ke nde ke nde edieke inamde utom ke efakutom esop nnyịn kpọt, ibọhọke Kọmiti Utom Esop ama anam akpan ndutịm man ẹn̄wam esop en̄wen.—Se Utom Obio Ubọn̄ Nnyịn eke November 1998, p. 6, ikp. eki. 18-19.
3. Nso utọ usụn̄ ke ndusụk asuanetop ẹkụt nte enyenede uforo ndida n̄kwọrọ ikọ ke mme itie edinam ofụri owo?
3 Ndisobo Mme Owo: Ke ini Jesus eketịn̄de ikọ ye n̄wan oro ke obube mmọn̄, enye ekebem iso etịn̄ aban̄a n̄kpọ ifan̄ kpọt, ekem enye ama etịn̄ n̄kpọ efen efen etiene nte mma oro ekenyenede udọn̄. (John 4:7-26) Usụn̄ utọn̄ọ nneme emi enyene uforo n̄ko ke ndusụk itie mfịn. Ndusụk mme asuanetop ẹfiọk nte ke man ẹkụt unen ke an̄wa-an̄wa utom ukwọrọikọ mmọ, ọfọn ndibem iso nda minit ifan̄ n̄kọm mme owo nnyụn̄ n̄wụt ọkpọkpọ udọn̄ ke idem mmọ mbemiso ẹtọn̄ọde ndikwọrọ etop Obio Ubọn̄. Mmọ ẹsitịn̄ ẹban̄a ibuot nneme oro edemerede mme owo udọn̄ ke efakutom, emi ẹsidade ẹtọn̄ọ nneme. Nte mbon eken ẹnemede se ibehede mmọ, mme asuanetop ẹsikpan̄ utọn̄. Ke mîbịghike mmọ ẹsitọn̄ọ ndibuana ndọn̄esịt oro otode Ikọ Abasi.—Rome 15:4.
4. Didie ke nnyịn ikeme ndinam udọn̄ oro ikụtde aka iso?
4 Ndinam Udọn̄ Aka Iso: Ini kiet kiet oro inyenede eti nneme ye owo, ana nnyịn idomo ndinam ndutịm ndinam owo oro akaiso enyene udọn̄. Didie ke ikeme ndinam emi? Nte mbufo ẹkperede nditre nneme oro, afo emekeme ndisio n̄wed fo onyụn̄ ọdọhọ ete: “Mmenem esịt ndineme n̄kpọ ifan̄ emi ye afo. Ndi iyekeme ndifiak nsobo ini efen?” Mîdịghe afo ọdọhọ: “N̄kpama fi okot ibuotikọ emi n̄kerede ke eyenem fi. Ndi nda enye nsọk fi ke ufọk m̀mê itieutom?” Ndusụk mme asuanetop ẹsibụp: “Nso idi nọmba urụk ukopikọ fo?” Ẹsinọ eti ibọrọ.
5. Nso ikpedi utịtmbuba nnyịn ke ini ikwọrọde ikọ ke mme itie edinam ofụri owo?
5 Ediwak owo oro ẹkesobode ke ini ẹkwọrọde ikọ ke mme itie edinam ofụri owo ẹma ẹnyịme ukpepn̄kpọ Bible. Ẹkeme ndinịm utọ ukpepn̄kpọ emi ke ufọk owo oro, ke itieutom esie, ke urụk ukopikọ, m̀mê ke an̄wa-an̄wa ebiet oro odotde. Nnyịn ikpakam inịm utịtmbuba editọn̄ọ ukpepn̄kpọ Bible nte nnyịn ikwọrọde ikọ uforo uforo ke mme itie edinam ofụri owo.