Nditọn̄ọ Ukpepn̄kpọ Bible ke Enyịnusụn̄ ye ke Urụk Ukopikọ
1, 2. Didie ke nnyịn ikeme ndikpụhọde ndutịm ukpepn̄kpọ Bible nnyịn man in̄wam mbon oro mînyeneke ini?
1 Mme owo ẹnana ini idahaemi ẹkaha. Kpa ye oro, ediwak mmọ ẹnyene udọn̄ ke mme n̄kpọ eke spirit. Didie ke nnyịn ikeme ndin̄wam mmọ ẹyụhọ udọn̄ n̄kpọ eke spirit mmọ? (Matt. 5:3) Ediwak mme asuanetop ẹkeme ndikpep Bible ye mme owo ke enyịnusụn̄ ufọk mmọ m̀mê ke urụk ukopikọ. Ndi afo emekeme nditat utom ukwọrọikọ fo ke afan̄ emi?
2 Man itọn̄ọ ukpepn̄kpọ Bible, oyom nnyịn idu ke mben̄eidem ndinam n̄wụt nte isinịmde ukpepn̄kpọ Bible ini ekededi oro ifet ebererede. Didie ke ẹkeme ndinam emi, ndien ke m̀mọ̀n̄?
3. Ntak emi akpanamde owụt nte isinịmde ukpepn̄kpọ Bible ke akpa ediwaha, ndien didie ke ẹkeme ndinam emi?
3 Ke Enyịnusụn̄: Ke ini afo osobode owo oro oyomde ndinyene nneme mban̄a Bible, kûbọde ka ikpehe ekikere oro afo ama eketịm, utọ nte akpa ikpehe ekikere ke akpa ukpepn̄kpọ ke ediye uduot ekpri n̄wed Oyom, nyụn̄ tọn̄ọ nneme. Kot ikpehe ekikere oro, bụp mbụme, nyụn̄ tịn̄ n̄kpọ ban̄a itie N̄wed Abasi kiet m̀mê iba oro ẹsiakde ẹsịn. Ediwak ini, ẹkeme ndida n̄kpọ nte minit ition esịm minit duop nnam emi ke enyịnusụn̄ ufọk owo oro. Edieke owo oro amade nneme oro, diomi ndika ini efen n̄kekpep ikpehe ekikere kiet m̀mê iba oro ẹtienede.—Mme ekikere efen efen ke nte ẹkpetọn̄ọde nneme nnennen nnennen ẹdu ke Utom Obio Ubọn̄ Nnyịn eke January 2002, p. 6.
4. Didie ke nnyịn ikeme ndida ke enyịnusụn̄ ntọn̄ọ ukpepn̄kpọ Bible ke ini inamde mfiakn̄ka?
4 Ẹkeme ndida ukem usụn̄ emi ntọn̄ọ ukpepn̄kpọ Bible ke ini ẹnamde mfiakn̄ka. Ke uwụtn̄kpọ, afo emekeme ndiwụt enye enyịn̄ Abasi ke ediye uduot ekpri n̄wed Oyom, adade ọyọhọ ukpepn̄kpọ 2, ikpehe ekikere 1-2. Ke afiakde aka, afo emekeme ndineme se Bible etịn̄de aban̄a mme edu Jehovah, adade ikpehe ekikere 3-4. Usen efen, afo emekeme ndineme ikpehe ekikere 5-6 onyụn̄ ada ndise oro odude ke page 5 owụt nte ndikpep Bible an̄wamde nnyịn ndifiọk Jehovah. Ẹkeme ndida ke enyịnusụn̄ nnam kpukpru emi.
5, 6. (a) Ntak emi ndusụk owo ẹkemede ndimek ẹda urụk ukopikọ ẹkpep mmimọ Bible? (b) Didie ke nnyịn ikpọtọn̄ọ nneme ke ini iyomde ndikpep owo n̄kpọ ke urụk ukopikọ?
5 Ke Urụk Ukopikọ: Ndusụk owo ẹkeme ndinyịme ndikpep Bible ke urụk ukopikọ akan ndikpep iso ye iso. Kere ban̄a uwụtn̄kpọ emi: Ke adan̄aemi eyenete an̄wan kiet ọkọkwọrọde ikọ ke ufọk ke ufọk, enye ama osobo eka kiet oro ekesinamde utom oro mînọhọ enye ini. Ke ini eyenete emi mîkekemeke ndifiak nsobo enye ke ufọk, enye ama ada urụk ukopikọ okot n̄wan oro. N̄wan emi ama ọdọhọ ke imọ inyeneke ini ndomokiet ndida nneme mban̄a Bible. Eyenete an̄wan oro ọkọdọhọ ete: “Afo emekeme ndikpep obufa n̄kpọ ke minit 10 m̀mê minit 15, idem ke urụk ukopikọ.” N̄wan oro ama ọbọrọ ete: “Ọfọn, edieke edide ke urụk ukopikọ, mmenyịme!” Ibịghike, ẹma ẹsida urụk ukopikọ ẹnịm ukpepn̄kpọ Bible ofụri ini.
6 Ndi ndusụk mbon oro afo osobode ẹyenyịme ada urụk ukopikọ ekpep Bible ye mmọ? Afo emekeme ndinam nte ẹdọhọde ke enyọn̄ emi, mîdịghe afo emekeme ndidọhọ ete: “Nnyịn imekeme ndinyene nneme Bible ke urụk ukopikọ edieke afo amade. Ndi oro ọkpọfọn ye afo?” Ke ndikpụhọde ndutịm ukpepn̄kpọ Bible nnyịn ekekem ye mme idaha mbon efen, nnyịn imekeme ndin̄wam mmọ “ẹsịme ifiọk Abasi.”—N̄ke 2:5; 1 Cor. 9:23.