Da Ini Fo Nam N̄kpọ Ọniọn̄ Ọniọn̄
1 Udọn̄ nnyịn ndinem Jehovah esịt onụk nnyịn ndiwụk ntịn̄enyịn ke mme edinam eke spirit. Ikọ esie eteme nnyịn ete ‘ika iso ndibem iso nyom obio ubọn̄’ inyụn̄ ‘idụn̄ọde ifiọk se idide akpan n̄kpọ ikan.’ (Matt. 6:33; Phil. 1:10) Didie ke nnyịn ikeme ndidep ifet nnọ mme n̄kpọ Obio Ubọn̄ nnyụn̄ nnịm mme n̄kpọ oro mînen̄ekede idi akpan n̄kpọ ke itie mmọ?—Eph. 5:15-17.
2 Nịm Mme N̄kpọ Obio Ubọn̄ Akpa: Diomi ini fo man mme n̄kpọ oro mîdịghe akpan n̄kpọ ẹdidia enye ama. Ke ntọn̄ọ ọfiọn̄ kiet kiet, ndusụk owo ẹsiwet mme akpan ini oro mmọ ẹdiwọrọde an̄wautom ke n̄wed usenọfiọn̄ mmọ. Ndien mmọ ẹsikpeme mbak mme n̄kpọ efen edibiọn̄ọ ndutịm mmọ. Ẹkeme ndinam ukem oro man ẹdep ifet ẹnọ mme mbono esop, ọkpọkpọ ukpepn̄kpọ, ye ikpọ mbono. Ediwak owo ẹsinam ndutịm ndikot Bible ke usenubọk m̀mê ke okoneyo. Nịm ini nọ akpan edinam kiet kiet, ndien kûyak mme n̄kpọ efen ẹda ini oro.—Eccl. 3:1; 1 Cor. 14:40.
3 Kûda Ererimbot Unam N̄kpọ Ọyọhọ Ọyọhọ: Mme mbre mbuba, unọ idem inemesịt, mme edinam ini nduọkodudu, mme edinam oro ẹmade, ye mme n̄kpọ eken ẹdi ọsọ n̄kpọ ke ndusụk idụt. Ediwak owo ẹsibiat ini ẹkaha ye ekebe ndise m̀mê kọmputa. Nte ededi, ndiyak mme edinam ini nduọkodudu ye mbufa n̄kpọ oro ererimbot emi osion̄ode edi ẹdia ini nnyịn iditreke-tre ndisụn̄ọ ke edikpu. (1 John 2:15-17) Ntak edi oro N̄wed Abasi ọdọhọde nnyịn ikûda ererimbot inam n̄kpọ ọyọhọ ọyọhọ. (1 Cor. 7:31) Afo emekeme ndiwụt Jehovah nte ke utuakibuot esie enyene akpa itie ke uwem fo edieke anamde ọniọn̄ ọniọn̄ item oro ẹnọde mi.—Matt. 6:19-21.
4 Ini oro osụhọde ọnọ editịm n̄kpọ emi ọmọn̄ okụre. Mbon oro ẹnịmde mme ufọn n̄kpọ Obio Ubọn̄ akpa ẹyekop inemesịt ẹnyụn̄ ẹnyene mfọn Abasi. (N̄ke 8:32-35; Jas. 1:25) Ke ntre, nnyịn ikpakam ida ini nnyịn, oro edide ata ọsọn̄urua inyene, inam n̄kpọ ọniọn̄ ọniọn̄.