N̄wam Mbon Efen “Ẹsụk Ibuot ke Ofụri Esịt”
1. Nso ke Jehovah oyom oto mme andituak ibuot nnọ enye?
1 Man ituak ibuot inọ Jehovah ke usụn̄ oro enye enyịmede, ana nnyịn isụk ibuot. (Deut. 12:28; 1 Pet. 1:14-16) Ibịghike, Abasi eyekpe ikpe ọnọ “mmọ eke mîfiọkke Abasi ye mmọ eke mîsụkke ibuot inọ eti mbụk.” (2 Thess. 1:8) Didie ke nnyịn ikeme ndin̄wam mbon efen “ẹsụk ibuot ke ofụri esịt” ẹnọ mme n̄kpọ oro Ikọ Abasi ekpepde?—Rome 6:17.
2. Ntak edide akpan n̄kpọ ndin̄wam mbon efen ẹkọri ọkpọsọn̄ mbuọtidem-e?
2 Ebe ke Ndin̄wam Ẹkọri Mbuọtidem ye Ima: Ke N̄wed Abasi, nsụkibuot ye mbuọtidem ẹsan̄a kiet. Apostle Paul ama etịn̄ aban̄a “ewụhọ nsinsi Abasi ndinam ẹsụk ibuot ebe ke mbuọtidem.” (Rome 16:26) Mme Hebrew ibuot 11 asiak ekese uwụtn̄kpọ mbon oro ẹkenyenede mbuọtidem, ndien ediwak mmọ ẹkenam n̄kpọ ke n̄kemuyo ye uduak Jehovah. (Heb. 11:7, 8, 17) Ke n̄kan̄ eken, nsọn̄ibuot ye unana mbuọtidem ẹsan̄a kiet. (John 3:36; Heb. 3:18, 19) Ana nnyịn ida Ikọ Abasi inam n̄kpọ ye usọ man in̄wam mbon efen ẹkọri orụk mbuọtidem oro anamde mmọ ẹsụk ibuot.—2 Tim. 2:15; Jas. 2:14, 17.
3. (a) Didie ke nsụkibuot enyene n̄kpọ ndinam ye ima? (b) Didie ke nnyịn ikeme ndin̄wam nditọ ukpepn̄kpọ Bible ẹkọri ima ẹnọ Jehovah?
3 Nsụkibuot enyene n̄kpọ n̄ko ndinam ye ima oro imade Abasi. (Deut. 5:10; 11:1, 22; 30:16) Akpa John 5:3 ọdọhọ ete: “Emi edi se ndima Abasi ọwọrọde, ete nnyịn inịm ibet esie; ndien ibet esie idobike owo mbiomo.” Didie ke nnyịn ikeme ndin̄wam nditọ ukpepn̄kpọ Bible ẹkọri ima ẹnọ Jehovah? Yom mme ifet ke ini ukpepn̄kpọ ndinam esịtekọm oro mmọ ẹnyenede ẹban̄a mme edu Jehovah ọkọri. Wụt esịtekọm oro afo enyenede ọnọ Abasi. N̄wam eyen ukpepn̄kpọ ekere nte enye ekpenyenede ọkpọkpọ itie ebuana ye Jehovah. Ke akande kpukpru, ima oro imade Jehovah oyonụk mbon efen, onyụn̄ onụk nnyịn n̄ko ndisụk ibuot nnọ enye ke ofụri esịt.—Matt. 22:37.
4. (a) Ntak emi uwụtn̄kpọ oro inịmde edide akpan n̄kpọ? (b) Nso ke ana nnyịn inam man inyene “esịt ọniọn̄”?
4 Ebe ke Uwụtn̄kpọ Nnyịn: Uwụtn̄kpọ oro nnyịn inịmde edi ata eti usụn̄ kiet ndisịn udọn̄ nnọ mbon en̄wen ẹsụk ibuot ẹnọ eti mbụk. Nte ededi, oyom isịn ukeme kpukpru ini man inyene “esịt ọniọn̄.” (1 Ndi. 3:9; N̄ke 4:23) Nso ke emi abuana? Abuana ndida udia eke spirit mbọk esịt fo ebe ke ndikpep Bible nnyụn̄ ndụk mme mbono esop kpukpru ini. (Ps. 1:1, 2; Heb. 10:24, 25) Ndidụk nsan̄a ye mbon oro esịt mmọ adianade kiet ke utuakibuot akpanikọ. (N̄ke 13:20) Ndiwọrọ an̄wautom kpukpru ini ye uduak ndin̄wam mme owo ke efakutom mbufo. Ndibọn̄ akam nnọ Jehovah man an̄wam fi enyene eti esịt. (Ps. 86:11) Ndifep mme n̄kpọ oro ẹkemede ndibiat esịt fo, utọ nte oburobụt m̀mê afai afai unọ idem inemesịt. Ndibịne mme n̄kpọ oro ẹnamde fi asan̄a ekpere Abasi ẹnyụn̄ ẹnamde itie ebuana fo ye enye ọsọn̄.—Jas. 4:7, 8.
5. Didie ke ẹdiọn̄ mbon oro ẹsụkde ibuot?
5 Jehovah ama ọsọn̄ọ etịn̄ ọnọ ikọt esie eke eset ete ke ẹyediọn̄ mmọ edieke mmọ ẹkopde uyo imọ. (Deut. 28:1, 2) Ukem ntre mfịn, Jehovah ke enen̄ede ọdiọn̄ “mbon oro ẹkopde uyo esie nte andikara.” (Utom 5:32) Ke ntre, ẹyak nnyịn ida ukpepn̄kpọ ye uwụtn̄kpọ nnyịn in̄wam mbon efen ẹsụk ibuot ke ofụri esịt.