Ka Iso Tịn̄ Ikọ Abasi ye Uko
1 Nte mme asan̄autom Christian, nnyịn imọfiọk ke idịghe kpukpru owo ẹdima ukwọrọikọ nnyịn. (Matt. 10:14) Nte ededi, nnyịn iyakke unana udọn̄ ndusụk owo akpan nnyịn ndinam mme owo ẹkop eti mbụk. (N̄ke 29:25) Nso isin̄wam nnyịn ndika iso ntịn̄ ikọ Abasi ye uko?
2 Apostle Paul akada “akakan ifiọk Christ Jesus” nte ọsọn̄urua n̄kpọ. Emi ama anam enye etịn̄ ikọ ye “ọkpọsọn̄ mbuọtidem.” (Phil. 3:8; 1 Thess. 1:5) Okposụkedi ndusụk owo ẹkedade etop emi enye ọkọkwọrọde mfefere mfefere ye nte ebiọ, enye ama ọfiọk ke emi edi “odudu Abasi emi ọwọrọde edinyan̄a ọnọ owo ekededi eke enyenede mbuọtidem.” (Rome 1:16) Ke ntre, idem ke ini enye okosobode ubiọn̄ọ, enye ama aka iso “etịn̄ ikọ ye uko ke odudu Jehovah.”—Utom 14:1-7; 20:18-21, 24.
3 Ebiet Emi Odudu Nnyịn Otode: Paul ikadaha odudu idemesie inọ ikọ ntiense uko uko. Ke etịn̄de aban̄a idemesie ye Silas, Paul ekewet ete: “Ke ima ikebem iso ikụt ukụt inyụn̄ ibọ emiom . . . ke Philippi, [nnyịn ima ida] uko ke Abasi nnyịn itịn̄ eti mbụk Abasi inọ mbufo ye ọkpọsọn̄ en̄wan.” (1 Thess. 2:2; Utom 16:12, 37) Ke adianade do, ke ini ẹkesịnde Paul ke ufọk-n̄kpọkọbi ke Rome, enye ama eben̄e ete nditọete ẹsịn imọ ke akam man ikeme ndika iso ntịn̄ eti mbụk ‘uko uko nte imọ ikpetịn̄de.’ (Eph. 6:18-20) Ndinyene mbuọtidem ke Jehovah utu ke idemesie ama anam Paul ekeme nditịn̄ ikọ Abasi uko uko.—2 Cor. 4:7; Phil. 4:13.
4 Ntre n̄ko ke edi mfịn. Eyenete kiet oro ọkọsọn̄de enye ndinam mbon itieutom esie ẹdiọn̄ọ enye nte kiet ke otu Mme Ntiense Jehovah nnyụn̄ nnọ mmọ ikọ ntiense ido nneme ama ọbọn̄ akam aban̄a n̄kpọ emi onyụn̄ ọtọn̄ọ ndinọ ikọ ntiense. Ke ntọn̄ọ ntọn̄ọ, kiet ke otu nsan̄autom esie ikamaha nneme oro, edi ke ini enye okokopde aban̄a idotenyịn ediset ke n̄kpa, emi ama ada esịm ukpepn̄kpọ Bible. Ọtọn̄ọde ke ini oro, eyenete emi esinọ ikọ ntiense ke kpukpru ifet oro ẹberede. Ke itie efen emi enye akanamde utom, enye ama ekpep owo 34 Bible ke ufan̄ isua 14 tutu mmọ ẹna baptism. Kpasụk ntre, nnyịn imodori enyịn ke Jehovah ọyọnọ nnyịn ‘ukeme ndika iso ntịn̄ ikọ esie uko uko.’—Utom 4:29.