Nen̄ede Kere Ban̄a Mbon Efen—Ebe ke Nditịn̄ Enyịn
1 Jehovah Abasi ye Christ Jesus ẹsinen̄ede ẹnam ọfọn ke ndifiọk mme akpan n̄kpọ oro mme owo ẹyomde nnyụn̄ n̄n̄wam mmọ. (2 Chron. 16:9; Mark 6:34) Edieke idiọn̄ọde mme mfịna oro mbon oro nnyịn isobode ke an̄wautom ẹnyenede ye se mmọ ẹmade, nnyịn imekeme ndikpụhọde usụn̄ oro inemede eti mbụk man ekekem ye mme idaha mmọ.
2 Tịn̄ Enyịn ke Se Okụtde: Jesus ama esitịn̄ enyịn. (Mark 12:41-43; Luke 19:1-6) Ukem ntre, ke ini nnyịn isan̄ade ikpere enyịnusụn̄ ufọk owo inyụn̄ ikụtde n̄kpọ mbana ido ukpono, ufiet oro ẹwetde ẹdian ke n̄kpọisan̄, m̀mê n̄kpọmbre n̄kpri nditọ ke esịt okụre, nnyịn imekeme ndida mme ifet oro nnọ ikọ ntiense ke usụn̄ oro enyenede uforo.
3 Nte owo akamade iso esie onyụn̄ anamde n̄kpọ ekeme ndiwụt se enye ekerede. (N̄ke 15:13) Ekeme ndidi ediduọk owo ima ke n̄kpa m̀mê mfịna en̄wen anam enye oyom ndọn̄esịt. Enye ekeme ndinem esịt edieke nnyịn ikotde itie N̄wed Abasi oro odotde inọ enye. (N̄ke 16:24) Ndi enyeneufọk oro oyom ndisọsọp n̄wọrọ m̀mê akama nsekeyen oro atuade eyet? Ke edide ntre, ekeme ndifọn anam ndutịm ndifiak n̄waha ini efen. Edieke ikopde mbọm, inyụn̄ ‘iwụtde edikere mban̄a,’ nnyịn imekeme ndinam owo oro akpan̄ utọn̄ ke ini ifiakde iwaha.—1 Pet. 3:8.
4 Kpụhọ Usụn̄ Nneme Fo: Apostle Paul ama okụt ke obio Athens enyene itieuwa oro ẹkeyakde ẹnọ “Abasi Emi Owo Mîfiọkke.” Emi ama anam enye okpụhọde usụn̄ oro enye ekenemede eti mbụk, sia enye ọkọdọhọ ete: “Se mbufo ẹtuakde ibuot ẹnọ ke unana ifiọk, kpa emi ke n̄kwọrọ nnọ mbufo.” Usọ usọ usụn̄ oro Paul akadade eneme nneme ye mmọ ama anam ndusụk mbon oro ẹkedude ẹkpan̄ utọn̄ ke etop Obio Ubọn̄ ẹnyụn̄ ẹkabade ẹdi mme andinịm ke akpanikọ.—Utom 17:23, 34.
5 Ke ukem usụn̄ oro, nditịn̄ enyịn ayanam nnyịn ifiọk se owo amade, ndien ke ntre, ikpụhọde usụn̄ nneme nnyịn. Bụp mme mbụme oro ẹkemede ndinam enyeneufọk etịn̄ mme ekikere esie. Kere ban̄a mme itie N̄wed Abasi oro ẹkemede ndidemede udọn̄ esie. (N̄ke 20:5) Edieke itịn̄de enyịn inyụn̄ inen̄erede ikere iban̄a mbon efen, emi ayanam nnyịn ikwọrọ eti mbụk ye usọ.