Nen̄ede Kere Ban̄a Mbon Efen—Ebe ke Ndikpụhọde Nneme Nnyịn
1 Apostle Paul ama enịm eti uwụtn̄kpọ ke ndisikpụhọde nte enye ọkwọrọde eti mbụk man ekekem ye idaha ye ekikere otuowo esie. (1 Cor. 9:19-23) Akpana nnyịn idomo ndinam ntre n̄ko. Edieke idade esisịt ini itie ikere se iditịn̄de, nnyịn imekeme ndikpụhọde mme nneme oro ẹdude ke Utom Obio Ubọn̄ Nnyịn nnam ekekem ye udọn̄ mme owo ke efakutom nnyịn. Nte nnyịn isan̄ade ikpere enyịnusụn̄ enyeneufọk, nnyịn imekeme ndikụt mme n̄kpọ oro ẹwụtde se enye amade inyụn̄ ida mmọ isịn ke nneme nnyịn. Nte ededi, odu usụn̄ en̄wen oro nnyịn ikemede ndikpụhọde nneme nnyịn ke an̄wautom.
2 Da Se Mbon En̄wen Ẹtịn̄de Tọn̄ọ Nneme: Ke ini ikwọrọde eti mbụk, nnyịn imesibụp mbụme inyụn̄ idọhọ mme enyeneufọk ẹbọrọ. Afo esise didie ibọrọ oro? Ndi emesikọm enyeneufọk onyụn̄ aka iso ndineme se okodiomide ndineme? Mîdịghe ndi se afo esitịn̄de esiwụt ke emekere aban̄a ibọrọ enyeneufọk? Edieke afo enen̄ede owụt udọn̄ ke se mbon efen ẹtịn̄de, afo eyekeme ndida mbufiọk mbụp mme mbụme efen man ọfiọk se mmọ ẹkerede. (N̄ke 20:5) Ntem, afo emekeme ndiwụk ntịn̄enyịn ke ikpehe etop Obio Ubọn̄ oro enen̄ede ebehe owo oro akpan̄de utọn̄.
3 Emi ọwọrọ ke oyoyom nnyịn ineme mme n̄kpọ efen utu ke ndineme mbon oro nnyịn ikodiomide nditịn̄ n̄kpọ mban̄a. Edieke idade se idude ke mbụk itọn̄ọ nneme ndien enyeneufọk asiak n̄kpọ ke n̄kann̄kụk m̀mê n̄kpọ efen oro ebehede enye, ata udọn̄ oro inyenede inọ enyeneufọk oyonụk nnyịn ndiyak nneme Bible emi owụhọ ke n̄kpọ oro enen̄erede ebehe enye.—Phil. 2:4.
4 Ndikpụhọ Nneme Nnyịn: Ke ini enyeneufọk obụpde mbụme, ekeme ndifọn ndibọrọ mbụme oro ini efen ke nnyịn ima ikanam ndụn̄ọde efen efen ke ibuot nneme oro. Imekeme n̄ko ndinọ n̄wed oro enen̄ede etịn̄ n̄kpọ aban̄a ibuotikọ oro. Kpukpru emi owụt ata udọn̄ oro inyenede ndin̄wam mbon efen ẹdi ẹdifiọk Jehovah.—2 Cor. 2:17.