Yom Ifet Ndikwọrọ Ikọ
1 Ke esop Christian, nnyịn imenyene mme owo oro ẹdude ke nsio nsio idaha. Kpa ye oro, nnyịn imadiana kiet ibiere nditoro Jehovah. (Ps. 79:13) Edieke nnyịn mîkemeke nditan̄a eti mbụk ke udomo oro akpanade itan̄a ke ntak unana nsọn̄idem m̀mê mme mfịna efen, didie ke nnyịn ikeme ndiyom ifet ndikwọrọ ikọ?
2 Ke Mme Edinam Nnyịn eke Usen ke Usen: Jesus ama ada kpukpru ifet oro enye ekenyenede ndinam n̄kpọ ye mme owo ọnọ ikọ ntiense. Enye ama enyene nneme ye Matthew ke ini akasan̄ade ebe ke itieutom mme ọbọ a-tax, enyene nneme ye Zacchaeus ke ini akanamde isan̄, onyụn̄ enyene nneme ye n̄wan Samaria ke ini ọkọduọkde odudu. (Matt. 9:9; Luke 19:1-5; John 4:6-10) Nnyịn n̄ko imekeme ndikpụhọde nneme oro inyenede ye mme owo iban̄a mme edinam eke usen ke usen isịn ke ikọ ntiense. Edieke ikamade Bible ke ubọk, ye mme tract m̀mê ndiye uduot n̄kpri n̄wed, emi ekeme ndinam nnyịn idu ke mben̄eidem nditịn̄ ntak idotenyịn nnyịn nnọ mme owo.—1 Pet. 3:15.
3 Nte udọn̄ọ anam fi okûkeme nditiene mbuana ke utom eke enyịnusụn̄ ke enyịnusụn̄? Ben̄e idem ndikwọrọ ikọ nnọ mbon ufọkibọk oro ẹdide ẹdise fi ye mbon eken oro ẹdide ẹdisobo ye afo. (Utom 28:30, 31) Edieke mûkemeke ndiwọrọ n̄kpọn̄ ufọk, ndi emesidomo ndida urụk ukopikọ m̀mê leta nnọ ikọ ntiense? Eyenete an̄wan kiet esiwet leta kpukpru ini ọnọ mbonubon esie oro mîdịghe Mme Ntiense. Enye esiwet mme ikọ nsịnudọn̄ ẹtode Bible ye mme ifiọkutom oro enye ekenyenede ke adan̄aemi ọkwọrọde ikọ ọnọ mme owo.
4 Ke Itieutom M̀mê ke Ufọkn̄wed: Udọn̄ oro nnyịn inyenede nditoro Jehovah oyonụk nnyịn n̄ko ndiyom mme ifet nditọ n̄kpasịp akpanikọ ke itieutom m̀mê ke ufọkn̄wed. Asuanetop kiet oro edide isua itiaita ama etịn̄ se enye okokotde ke Awake! aban̄a ọfiọn̄ ọnọ nditọ ubet ukpepn̄kpọ esie. Ke andikpep esie ama ọkọfiọk ebiet oro asuanetop emi akadade ifiọk oro, enye ama ọtọn̄ọ ndibọ Enyọn̄-Ukpeme ye Awake! kpukpru ini. Nnyịn ndikam nnịm n̄wed Bible Ekpep ke ebiet oro mbon efen ẹdikụtde ekeme ndinam mmọ ẹbụp mme mbụme oro ẹdidade ẹkesụn̄ọ ke ukwọrọikọ.
5 Ndi afo emekeme ndikere mban̄a mme usụn̄ oro afo ekemede ndiyom ifet ndikwọrọ ikọ ke mme edinam eke usen ke usen? Ẹyak nnyịn idomo kpukpru usen ndida ifet oro inyenede “iwa uwa ekọm inọ Abasi.”—Heb. 13:15.