Nte Afo Emekeme Ndikpụhọde Ndutịm Fo?
1. Ntak emi nnyịn ikpokpụhọde ndutịm ukwọrọikọ nnyịn?
1 Nte ata mme Christian, nnyịn imenyịme ikot ndidi “mme ọkọ owo.” (Matt. 4:19) Ukem nte mme ọkọiyak, etie nte iyenyene nti utịp ke utom ukọ owo edieke nnyịn idiomide ndikwọrọ ikọ ke ini oro ikemede ndikụt mme owo. Ke ediwak idụt, eyo idisọpke ikụt ke mme ọfiọn̄ oro ẹdidide. Ediwak owo ẹsidu ke ufọk ke mbubịteyo. Ediwak ini, mmọ ẹsiduọk odudu ndien ẹkeme ndidara isenowo. Nte afo emekeme ndikpụhọde ndutịm fo man ọkwọrọ ikọ ke mbubịteyo?—1 Cor. 9:23.
2. Nso idi ndusụk usụn̄ oro nnyịn ikemede ndikwọrọ eti mbụk nnọ ediwak owo?
2 Unọ Ikọ Ntiense Mbubịteyo: Ndibabak ndiomi ndikwọrọ ikọ ke mbubịteyo ekeme ndinam nnyịn ikwọrọ eti mbụk inọ ediwak owo. (N̄ke 21:5) Mme uyen ẹkeme ndikwọrọ ikọ ke ufọkn̄wed ama akasuana. Mbon eken ẹkeme ndinam ntre ke ẹma ẹkenyọn̄ọ utom. Ndusụk otu ukpepn̄kpọ n̄wed ẹkeme ndidiomi ndida hour kiet n̄kwọrọ ikọ mbemiso ukpepn̄kpọ eke urua ke urua.
3. Ke mme usụn̄ ewe ke afo ekeme ndikwọrọ ikọ ke mbubịteyo ke efakutom mbufo?
3 Ndikwọrọ ikọ ke ufọk ke ufọk ke mbubịteyo ekeme ndinam etịn̄ ikọ ọnọ mbon oro mîsiwakke ndidu ke ufọk. Ke ediwak efakutom, ẹkeme n̄ko ndinam utom efak ye orụk unọ ikọ ntiense eken ke mbubịteyo. Ndien ediwak owo ẹkụt ke mbubịteyo edi mfọnn̄kan ini ndinam mfiakn̄ka nnyụn̄ ntọn̄ọ ukpepn̄kpọ Bible.
4. Ntak edide akpan n̄kpọ ndinyene mbufiọk ye edikere mban̄a ke ini ibuanade ke unọ ikọ ntiense mbubịteyo?
4 Oyom Inyene Mbufiọk: Oyom inyene mbufiọk ke ini ibuanade ke unọ ikọ ntiense mbubịteyo. Nte ido edide, ọfọn inọ ikọ ntiense ke ntọn̄ọ ntọn̄ọ mbubịteyo utu ke ndika ke ini oro mme enyeneufọk ẹyomde ndidụk idap. (Phil. 4:5) Ke ini ọkọn̄de usụn̄ufọk, da ke ebiet oro ẹkemede ndikụt fi, nyụn̄ nam ẹdiọn̄ọ fi. Sọsọp tịn̄ ntak oro afo edide. Edieke afo akade ke ini oro mîfọnke, utọ nte ke ini ubon ẹdiade udia, dọhọ ke iyafiak idi ini efen. Wụt edikere mban̄a kpukpru ini.—Matt. 7:12.
5. Didie ke nnyịn ikeme ndifep mme n̄kpọndịk oro ẹkemede ndidemede ke ini ikwọrọde ikọ?
5 Oyom nnyịn n̄ko ifiọk mme n̄kpọndịk oro ẹkemede ndidemede. Edieke afo ọkwọrọde ikọ ke mfụn̄ mfụn̄ mbubịteyo m̀mê ke eyo ama okokụt, owụt eti ibuot ndisan̄a owo iba iba m̀mê ndisan̄a ke otu. Du ke mme efak oro un̄wana ikan̄ odude mfọn mfọn, ke ebiet oro mme owo ẹdude. Kwọrọ ikọ ke mme ebiet oro afo okụtde ke ọfọn. Fep mme efak oro mîfọnke ke eyo ama okokụt.—N̄ke 22:3.
6. Nso idi mme ufọn efen efen oro ẹbọde ẹto unọ ikọ ntiense mbubịteyo?
6 Unọ ikọ ntiense mbubịteyo ọnọ nnyịn ifet ndikwọrọ eti mbụk ye mme asiakusụn̄ unọ un̄wam ye mme asiakusụn̄ ofụri ini. (Rome 1:12) Nte afo emekeme ndikpụhọde ndutịm fo man abuana ke ikpehe an̄wautom emi?