Uwụtn̄kpọ Oro Ẹnọde Kpukpru Owo

Enye ama enyene inem inem ye ntotụn̄ọ itie ebuana ye Abasi. Enye ama ayak uwem esie esịn ke edinam uduak Jehovah. Enye ama “asan̄a ye Abasi,” ẹma ẹnyụn̄ ẹdiọn̄ enye ke ndinam ntre. Owo oro ekedi Noah, kpa uwụtn̄kpọ oro odotde se n̄kpri ye ikpọ owo ẹkpebede. (Gen. 6:9) Vidio oro Noah—He Walked With God ayan̄wam fi ndikụt nte n̄kpọ eketiede ye Noah, ntak emi Jehovah ọkọdiọn̄de enye, ye nte afo ekemede ndikpebe nti edu esie.

Se vidio emi, ekem, bụp idemfo mme mbụme emi: (1) Nso idiọkn̄kpọ ke ndusụk mme angel ẹkenam, ndien mmanie ẹkedi mme Nephilim? (Gen. 6:1, 2, 4) (2) Ntak emi mme owo ẹkediọkde ntre, ndien didie ke emi okotụk Abasi? (Gen. 6:4-6) (3) Didie ke Noah okokpụhọde ye mbon eken? (Gen. 6:22) (4) Didie ke ẹkesobo mme idiọkowo? (Gen. 6:17) (5) Ubom oro okokpon didie? (Gen. 6:15 ) (6) Nso efen ke Noah akanam, ndien didie ke mme owo ẹkenam n̄kpọ? (Matt. 24:38, 39; 2 Pet. 2:5) (7) Mme unam oro ẹkedụkde ubom ekedi ifan̄ ifan̄ ke ibat? (Gen. 7:2, 3, 8, 9) (8) Usen ifan̄ ke edịm ekedep, ndien ukwọ okofụk isọn̄ ebịghi adan̄a didie? (Gen. 7:11, 12; 8:3, 4) (9) Ntak emi Noah ye ubon esie ẹkebọhọde? (Gen. 6:18, 22; 7:5) (10) Ubom oro ekedibak ke m̀mọ̀n̄? (Gen. 8:4) (11) Noah akasan̄a didie ọfiọk ke ini ekem ndiwọrọ ke ubom? (Gen. 8:6-12) (12) Nso ke Noah akanam ke ini enye ọwọrọde ke ubom? (Gen. 8:20-22) (13) Nso ke akpara ada aban̄a? (Gen. 9:8-16) (14) Nso ke ọwọrọ ‘ndisan̄a ye Abasi’? (Gen. 6:9, 22; 7:5) (15) Nso ke oyom inam man ikeme ndikụt Noah ke Paradise? (Matt. 28:19, 20; 1 Pet. 2:21)

Nso ke mbụk Bible aban̄ade Noah emi akanamde akpanikọ onyụn̄ okopde item ekpep fi aban̄a nte afo n̄ko ekemede ‘ndisan̄a ye Abasi’ ye nte ẹkemede ndinyene mbuọtidem nte ke Jehovah enyene ukeme ndinyan̄a ikọt esie ke eyomfịn?—Gen. 7:1; N̄ke 10:16; Heb. 11:7; 2 Pet. 2:9.