Watchtower LIBRARY EKE INTANET
Watchtower
LIBRARY EKE INTANET
Efịk
Ẹ,Ê,Ị,Ọ,Ụ,Û,N̄
  • Ẹ
  • ẹ
  • Ê
  • ê
  • Ị
  • ị
  • Ọ
  • ọ
  • Ụ
  • ụ
  • Û
  • û
  • N̄
  • n̄
  • BIBLE
  • MME N̄WED
  • MBONO ESOP
  • km 5/06 p. 5-6
  • Ẹfep Mme Ido Edinam Ererimbot ke Ini Ubụkowo

Vidio ndomokiet idụhe mi.

Kûyat esịt, n̄kpọ anam vidio emi okûbre.

  • Ẹfep Mme Ido Edinam Ererimbot ke Ini Ubụkowo
  • Utom Obio Ubọn̄ Nnyịn—2006
Utom Obio Ubọn̄ Nnyịn—2006
km 5/06 p. 5-6

Ẹfep Mme Ido Edinam Ererimbot ke Ini Ubụkowo

1 Satan, kpa andikara ererimbot emi, imaha ndikụt nte nnyịn isọn̄ọde ida ke mbuọtidem. Ntem, enye aka iso ndin̄wana ọkpọsọn̄ man anam nnyịn ibiat mme edumbet Bible. Ana inen̄ede ibiọn̄ọ enye kpukpru ini mbak nnyịn idikabade idi ubak ererimbot emi enye akarade, emi ẹdinyụn̄ ẹsobode ofụri ofụri ẹfep ke mîbịghike.—Jas. 4:7; 1 John 2:15-17.

2 Akpan ikpehe emi oyomde inen̄ede idu ke ukpeme edi ke ini ubụkowo. Ana nnyịn isọn̄ọ isịn kpukpru mme edinam ubụkowo oro ẹketọn̄ọde ẹto mme nsunsu ukpepn̄kpọ ido ukpono, utuakibuot nnọ mme demon, ye mme edinam ererimbot inamke n̄kpọ m̀mê mbio obio ẹnen̄ede ẹsịn idem didie ke esịt m̀mê mme edinam emi ẹnyụn̄ ẹwọrọ etop adan̄a didie. Kpa nte edide ke mme edinam eken, nnyịn ikpenyeneke ndinam n̄kpọ ekededi ke mme ini ubụkowo oro ekemede ndisabade edisana utuakibuot, mfịna ubieresịt nnyịn oro Bible ọnọde ukpep, mfịna ubieresịt mbon efen, m̀mê ndida esuene nsọk enyịn̄ Jehovah. Ọfọn ndiyak ẹsuene, ẹsak, ẹbiọn̄ọ, onyụn̄ osụn̄ọ ke ukọbọ, ẹkam ẹkọbọ nnyịn ke ntak oro nnyịn mîtieneke ibuana ke mme edinam ubụkowo oro mîkemke ye N̄wed Abasi akan nditiene mbuana man iman ye mme ufan nnyịn ẹma nnyịn.

3 Mme N̄kpọ Ndida Nti Ini Ubụkowo: Ndi akpana ẹnọ mme utọ n̄kpọ editi oro nte mme enọ ke ini ubụkowo? Ẹsika itie n̄kpa man ẹkedọn̄ mbon emi owo mmọ akpade esịt. Ata ima ye edikere mban̄a oro ẹnyenede ẹnọ ubon oro owo mmọ akpade akpanam ẹka do, idịghe ke ntak ibụk ibụk udọn̄ ndibọ enọ m̀mê ndinọ isenowo oro ẹdide, enọ. Ntem, owo ikpọdọhọke mbon oro owo mmọ akpade ẹnọ isenowo mme n̄kpọ ndida nti ini ubụkowo oro. Idem edieke ubon oro owo mmọ akpade ẹnyenede ukeme ndinọ mme owo mme utọ enọ emi ke imaesịt mmọ, ọkpọfọn mmọ nditi nte ke ini n̄kpa edi ini ntuan̄a ye mfụhọ, idịghe ini ndia, m̀mê ini ndiwụt mme owo ke imenyene n̄kpọ, utọ nte ke ndinọ mme enọ oro ẹsiwetde enyịn̄ mme andinọ. (Eccl. 7:2; 1 John 2:16) Mme enyene-esịtmbọm idịghe do man ẹdibọ mme enọ. Ima oro mme Christian ẹnyenede akam oyom ẹnọnọ mbon oro owo mmọ akpade un̄wam ẹda ẹse ẹban̄a se mmọ ẹbiatde ke ndibụk owo.—Jas. 1:27.

4 Ntak edi oro ibuotikọ emi “Ubụkowo Christian—Ikpehe 4,” oro ẹkemịn̄de ke Utom Obio Ubọn̄ Nnyịn eke February 1994, page 7, etịn̄de ubak ubak ete: “Mme owo oro ẹyomde ndinọ ubon akpan̄kpa oro un̄wam ke okụk ẹkeme ndinam ntre ke ndịbe. Uduak utọ ndedịbe enọ oro idịghe ndinọ mme iman ye isenowo oro mînyeneke edikere mban̄a udia ye edin̄wọn̄ n̄kpọ, edi kaban̄a okụk ekebe okpo ye mme akpan ubiatokụk eken.” Ke ntre, nnyịn isịnke udọn̄ inọ edinọ mme n̄kpọ ndida nti ini ubụkowo ke mme itie ubụkowo sia edinam emi mînyeneke nsọn̄ọ ndomokiet ke Bible m̀mê ndida ufọn ndomokiet nsọk mbon oro owo mmọ akpade. Utu ke oro, enye ọnọ mme owo itoro onyụn̄ ada mme edinam ererimbot edisịn ke ubụkowo Christian.—Rome 12:2.

5 Nditoro Akpan̄kpa: Nnyịn ikpodomo ndidọn̄ mbon oro owo mmọ akpade esịt ke ini ubụkowo. (2 Cor. 1:3-5) Owo inamke ndutịm ndomokiet man owo efen okot m̀mê etịn̄ n̄kpọ ekededi aban̄a akpan̄kpa emi mbemiso m̀mê ke ẹma ẹkekụre utịn̄ikọ ubụkowo. Owo oro ọnọde utịn̄ikọ ke itie ubụkowo ikpenyeneke nditịn̄ ikọ m̀mê ndinam n̄kpọ ekededi nditoro akpan̄kpa. Utu ke ndiwọn̄ọde ubụkowo oro nsịn ke edinam oro mme owo ẹtịn̄de ikọ ẹtoro akpan̄kpa, enye ekpenyene ndidi ifet nditoro mme utịbe utịbe edu Abasi, esịnede mfọnido esie ke ndinọ nnyịn idotenyịn ediset ke n̄kpa. Nte ẹwụtde ke n̄wed utịn̄ikọ, etịn̄ikọ ekpenyene nditiene n̄wed utịn̄ikọ oro ẹnọde ndien, nte ẹnọde ndausụn̄, ekpenyene ndida mbufiọk nsiak ndusụk nti edu akpan̄kpa. Edieke akpan̄kpa akanamde akpanikọ ọnọ Abasi tutu esịm n̄kpa, ọkpọfọn nditịn̄ mban̄a usụn̄ nsọn̄ọnda esie. (Heb. 6:12) Ndibuana nti ekikere emi ye mbon efen ke itie ubụkowo ọnọ mme odu-uwem ndọn̄esịt onyụn̄ anam ẹnyene eti ekikere ẹban̄a akpan̄kpa.

6 Ndia ke Itie Ubụkowo: Bible etịn̄ in̄wan̄-in̄wan̄ aban̄a ukpụhọde emi odude ke “ini eke ẹtuade, ye ini eke ẹsakde; ini eke ẹsemede, ye ini eke ẹnekde.” (Eccl. 3:4) Ẹnen̄ede ẹwụt ke Ecclesiastes 7:2 nte ke “ufọk ntuan̄a” edi isio ye “ufọk udia.” Nte ẹnamde n̄kpọ ke mme itie ubụkowo ẹkpenyene ndinen̄ede n̄kpụhọde ye nte ẹnamde n̄kpọ ke mme itie ndọ. Nte an̄wan̄ade, itie ubụkowo Christian idịghe itie usọrọ, itie ndia, itie un̄wọn̄ n̄kpọ, ye itie ubre ikwọ.

7 Mmọdo, edieke ẹtemde udia ekededi ke itie ubụkowo, ẹkpenyene ndida emi akpan akpan nte usụn̄ oro ubon akpan̄kpa ẹwụtde mme enyene-esịtmbọm oro ẹtode anyan ebiet ẹdi mfọnido, koro sia mmọ ẹdide isenowo, ẹkeme ndisọn̄ mmọ ndinam ndutịm mban̄a udia oro mmọ ẹdidiade. (Men Matthew 15:32 domo.) Ntem, mbon oro ẹdụn̄de ke n̄kpet n̄kpet obio m̀mê obio-in̄wan̄ ikpenyịmeke ẹnọ mmimọ udia man mbon oro owo mmọ akpade ẹdibiat okụk ikan nte akpanade ẹbiat. Utu ke oro, ima ekpenyene ndinam mmọ ẹnọ mme enyene-esịtmbọm oro ẹtode anyan ebiet ẹdi itienna ẹnyụn̄ ẹse ẹban̄a mmọ, ntem ẹnọde mbon oro mîdịghe Mme Ntiense oro ẹsidiade ndia, ẹn̄wọn̄ n̄kpọ, ẹnyụn̄ ẹnek unek ke mme itie ubụkowo eti ikọ ntiense. (Eccl. 3:4, 8) Ntre, ke ini akade itie ubụkowo, ti item oro odude ke Enyọn̄-Ukpeme (Ikọmbakara) eke June 1, 1978, page 7 oro ọdọhọde ke “kpukpru owo ẹkpenyene ndiwụt edikere mban̄a ebe ke nditre ndinam n̄kpọ ke utọ ibụk ibụk usụn̄ oro edinamde ubon oro ẹbiat okụk ẹkan se ẹma ẹkebabiat ke ndinam ndutịm ubụkowo emi. Utu ke oro, ọkpọfọn mmọ ẹn̄wam ubon oro ke ndise mban̄a mme utom oro ẹnamde ke ufọk m̀mê ndika utom oro ẹdọn̄de.”

8 Ukpeme Okpo ye Ediyarade Ikpo: Ido ukpeme okpo ke ofụri okoneyo, oro esisan̄ade ye ndia, edin̄wọn̄ n̄kpọ, edikwọ ye edibre ikwọ ẹtọn̄ọ ẹto nsunsu edinịm ke akpanikọ. Ẹsinam ido emi man ẹbịn mme idiọk spirit ẹfep, ẹnyụn̄ ẹkụt ẹte ke ukpọn̄ m̀mê spirit akpan̄kpa ebe ke ifụre aka uwem efen. Mbọk ẹfiọk ẹte ke idịghe ido mme Christian ndinam ndutịm nnọ nnyụn̄ mbuana ke ukpeme okpo. Mmọdo, Christian ndomokiet ikpenyeneke ndinam ndutịm nnọ m̀mê nditiene mbuana ke ukpeme okpo ke ndusụk ini ke okoneyo m̀mê ke ofụri okoneyo. Kpasụk ntre ye ediyarade ikpo oro mme owo ẹdọhọde “ke ẹsinam man ẹn̄wam akpan̄kpa etịm idem ọnọ uwem ‘ke ererimbot efen,’ ẹnyụn̄ ẹben̄e un̄wam ye ukpeme akpan̄kpa.” Satan, kpa ete nsu, ọkọtọn̄ọ onyụn̄ esịn udọn̄ ọnọ ido edinam iba emi, emi ẹkọn̄ọde ke nsunsu ukpepn̄kpọ oro nte ke n̄kpọ oro ẹkotde ukpọn̄ m̀mê spirit esibọhọ ke ikpọkidem ama akakpa. (Gen. 2:7; Ezek. 18:4, 20a; Ps. 22:29; John 8:44) Mmọdo, owo ekededi oro ekpemede okpo, ayararede ikpo, m̀mê ke usụn̄ ekededi etienede abuana ke mme edinam emi, okpono mme akpan̄kpa. Okposụkedi ikpîkpu edise okpo edima ufan m̀mê iman mîkwan̄ake edieke ẹmekde ndinam ntre, n̄kpọ oro ẹnyenede ndifep edi “edidiọn̄ okpo nsio nnịm man mme owo ẹse,” kpa edinam emi mme owo ẹsisan̄ade ẹse ẹnyụn̄ ẹnamde n̄kpọ m̀mê ẹtịn̄de ikọ ke ukpono akpan̄kpa.

9 Mme Edinam Eken: Mme edinam eken oro mîkemke ye N̄wed Abasi oro ẹnamde ke ntak ukpono m̀mê ke ntak ndịk oro ẹkopde ẹban̄a mme akpan̄kpa, oro mînaha Mme Ntiense ẹtiene ẹbuana ẹsịne: uwọrọ an̄wa ke ọyọhọ usen itiaita, efịt, m̀mê ke ọyọhọ usen aba nte owo akakpa m̀mê nte ẹkebụk owo; ndikporo idet; san̄asan̄a edikpok mbara ubọk; edikọn̄ọ, edikụne, m̀mê edisịne akpan n̄kwa ke ndusụk itie ke idem; edikpi ndusụk itie ke idem ke ntak akpan̄kpa; ye edikpono akpan̄kpa ebe ke ndimen okpo esie n̄ka nsio nsio ufọk m̀mê ‘akpan itie’ mbemiso ẹbụkde enye. (Lev. 19:28; Rome 1:21-25) N̄ko n̄ko, ẹsisịne ọfọn̄ikpo ke nsio nsio ikpehe Nigeria ke ntak ukpono ye ke ntak ndịk akpan̄kpa. Ke ndusụk itie ke Nigeria, iman, mbọn̄, m̀mê mbio obio ẹsiyom ẹnọ mmimọ enan̄, m̀mê ebot, unen, mmịn, ye bia. Mmọ ẹsideme ẹnyụn̄ ẹta unam emi. Nte ededi, mbemiso ẹtade, ẹkeme ndiduọk iyịp unam emi ke isọn̄ ukem nte ẹsiduọkde mmịn. Ẹsinam emi man spirit mme ete ete oro ẹma ẹkekpan̄a ẹnem esịt. Ndi ata mme asan̄autom Jehovah oro akpanikọ Ikọ Abasi anamde ẹbọhọ ufụn nsunsu ukpepn̄kpọ, nsunsu ekikere, ye mme ido edinam ererimbot ẹkpenyene nditiene nnam mme utọ edinam emi? Malachi 3:18 ọsọn̄ọ etịn̄ ke ata mme asan̄autom Jehovah ẹkpenyene ndidi isio ye ererimbot. N̄ko ẹnen̄ede ẹdụri nnyịn utọn̄ ke 1 John 5:21 ẹte ‘ikpeme idem ke ndem.’

10 Nte mme anam-akpanikọ Christian, nnyịn imesifụhọ inyụn̄ iti mbonima nnyịn oro ẹma ẹkekpan̄a. Nte ededi, akpanikọ Bible emi ọdọhọde nte ke mme akpan̄kpa isibọhọ ufen ye nte ke idotenyịn ediset ke n̄kpa odu ẹsisụk ubiak ye mfụhọ oro nnyịn ikopke. Mmọdo, nte nnyịn isinamde ke mme n̄kpọ eken, nnyịn ikpenyene ndisọn̄ọ nda ke akpanikọ Bible inyụn̄ ifep ofụri edinam ye mme edu ererimbot oro ẹsinamde ke itie ubụkowo emi mîkemke ye N̄wed Abasi.—1 Cor. 10:31; 2 Cor. 6:14-18; John 17:16.

11 Ke inen̄erede ida mme item ye mme n̄kpọ editi N̄wed Abasi emi isịn ke edinam, nnyịn iyasan̄a nte odotde Abasi, inem Enye esịt ọyọhọ ọyọhọ.—Col. 1:10.

    Mme N̄wed Ikọ Efịk (1982-2025)
    Wọrọ
    Dụk
    • Efịk
    • Share
    • Mek nte amade
    • Copyright © 2025 Watch Tower Bible and Tract Society of Pennsylvania
    • Nte Ẹkpedade Ikpehe Intanet Emi Ẹnam N̄kpọ
    • Ediomi
    • Privacy Settings
    • JW.ORG
    • Dụk
    Share