Nen̄ede Bọ Ufọn to Mme Mbono An̄wautom
1. Didie ke mme mbono an̄wautom ẹkeme ndin̄wam nnyịn?
1 Mme mbono an̄wautom oro ẹnyenede ufọn ẹsinen̄ede ẹnọ nsịnudọn̄ ye nti item mbemiso ikade an̄wautom. Mmọ ẹsinam nnyịn isan̄a ye mbon en̄wen inọ ikọ ntiense inyụn̄ inọ kiet eken ibetedem ye ukpep. (N̄ke 27:17; Eccl. 4:9, 10) Nso ke nnyịn ikeme ndinam man inen̄ede ibọ ufọn ito mme mbono an̄wautom emi?
2. Nso idi ndusụk n̄kpọ oro andinịm ekemede ndineme?
2 Andinịm: Owo isibemke iso itịn̄ akpan ntọt oro ẹdinemede ke mme mbono emi. Ke ntre, edieke edide afo edinịm, oyom enen̄ede etịm idem. Kûsọsọp ubiere ndineme itie N̄wed Abasi eke usen oro, okposụkedi afo ekemede nditịn̄ n̄kpọ mban̄a enye edieke enyenede ebuana nnennen nnennen ye an̄wautom. Kere ban̄a se idinen̄ede in̄wam mbon oro ẹdinọde ikọ ntiense ke usen oro. Ke uwụtn̄kpọ, emekeme ndineme m̀mê ananam usụn̄ unọ ikọ ntiense owụt. Afo emekeme ndidụn̄ọde n̄kpọ otode n̄wed Reasoning, n̄wed Ufọkn̄wed Utom, m̀mê ikpehe Esoputom ndondo emi. Ke mme ini efen, afo emekeme ndineme nte ẹkemede ndise mban̄a mfịna oro ekemede ndidemede ke efakutom mbufo, mîdịghe emekeme ndineme nte ẹkemede ndinam mme owo ẹka iso ẹnyene udọn̄ nnyụn̄ ntọn̄ọ ukpepn̄kpọ Bible, akpan akpan edieke ediwak owo ẹdikade mfiakn̄ka. Inamke n̄kpọ m̀mê nso ke edineme, yak nneme fo enyene inem onyụn̄ ọnọ nsịnudọn̄.
3. Mbono oro ọkpọniọn̄ adan̄a didie, ndien nso ke ẹkpeda ini oro ẹnam?
3 Tọn̄ọ mbono oro ke ini, idem ke ini okụtde ke ndusụk owo idibakke idi. Da mbufiọk dian mme owo, nyụn̄ nọ mme owo efakutom edieke mmọ ẹyomde. Mbono oro ikpọniọn̄ke ibe minit 10 esịm 15 m̀mê osụhọrede akan oro edieke ẹnịmde enye ke mbono esop ama akasuana. Kpukpru owo ẹkpenyene ndifiọk nsan̄a mmọ ye ebiet oro mmọ ẹdikwọrọde ikọ mbemiso afo eberide mbono oro. Ẹkpenyene ndiberi mbono oro ke akam.
4. Nso idin̄wam kpukpru owo ndinen̄ede mbọ ufọn nto mme mbono an̄wautom?
4 Mbufo Ẹmekeme Ndin̄wam: Ukem nte mbono esop, nnyịn iwụt ke imokpono Jehovah inyụn̄ ikere iban̄a mbon en̄wen ebe ke ndika ke ini. Buana ke nneme oro. Afo emekeme ndiyak adausụn̄ ọnọ fi owo oro afo edisan̄ade kiet, mîdịghe afo emekeme ndinam ndutịm idem fo mbemiso mbono oro. Edieke afo amade ndinam ndutịm idem fo, domo ‘nditat esịt’ ebe ke ndisan̄a ye nsio nsio asuanetop utu ke ndisan̄a ye mme n̄kpet n̄kpet ufan fo kpukpru ini. (2 Cor. 6:11-13) Kûkpụhọde mme ndutịm oro ẹkenamde ke ẹma ẹkesuana mbono oro, sọsọp ka efakutom fo.
5. Ntak ẹsinịmde mme mbono an̄wautom?
5 Ukem ntak oro esinamde ẹnịm mme mbono esop eken esinam ẹnịm mme mbono an̄wautom n̄ko. Ẹtịm mmọ man ikeme ‘ndidemede kiet eken nnọ ima ye nti utom.’ (Heb. 10:24, 25) Edieke idomode ndibọ ufọn nto mme mbono esop emi, ẹyen̄wam nnyịn ndinam utom ukwọrọikọ nnyịn, emi ke akpanikọ edide ‘eti utom’!