Nditi Nnyụn̄ N̄wụt Esịtekọm Mban̄a Ufak
1, 2. Nso ntak ke nnyịn inyene nditi nnyụn̄ n̄wụt esịtekọm mban̄a ufak?
1 Mme Christian ke ofụri ererimbot ẹyesop idem ke Saturday, March 22, 2008, ke utịn ama okosụhọde, man ẹti n̄kpa Jesus Christ, kpa nte enye eketemede. (Luke 22:19; 1 Cor. 11:23-26) Se inụkde nnyịn ndinam emi edi ntotụn̄ọ esịtekọm oro inyenede iban̄a se enye akanamde ke usen n̄kpa esie ke isua 1,975 emi ẹkebede. Ke ndimụm mfọnmma nsọn̄ọnda esie n̄kama tutu esịm n̄kpa ke eto ndutụhọ, Jesus ama anam enyịn̄ Ete esie asana, ọnọde mfọnn̄kan n̄kpọ ndida mbọrọ isụn̄i Satan.—Job 1:11; N̄ke 27:11.
2 Iyịp Jesus oro ẹkeduọkde ama ọsọn̄ọ obufa ediomi, anamde ẹkeme ndibon mme anana-mfọnmma owo nte nditọ Abasi oro ẹdoride enyịn ndikara ye Christ ke Obio Ubọn̄ esie ke heaven. (Jer. 31:31-34; Mark 14:24) N̄ko-n̄ko, Abasi ndikọnọ ata edima Eyen esie nte uwa owụt adan̄a ima oro Abasi amade ubonowo, kpa nte Jesus ke idemesie eketịn̄de ọnọ Nicodemus.—John 3:16.
3. Didie ke mbon oro ẹdidụkde Editi ẹdibọ ufọn?
3 Kot Mbon En̄wen: Nsiondi Utom Obio Ubọn̄ Nnyịn eke January ama ọnọ ekikere ete iwet enyịn̄ mbon oro iyomde ndikot inyụn̄ inọ mmọ n̄wedikot ke ubọk. Nte ọmọtọn̄ọ ndikot mbon oro afo ekewetde enyịn̄? Ndi amanam ndutịm man abuana ọyọhọ ọyọhọ ke ubịnikọt oro editọn̄ọde ke March 1 ndikot mme owo ẹdidụk Editi? Mbon oro ẹdidụkde ẹyekop mme item N̄wed Abasi oro ẹkemede ndinam ẹnyene mbuọtidem ke ufak, ndien emi ayada esịm nsinsi uwem.—Rome 10:17.
4. Ntak emi ikpabakde-bak ikesịm ke usen Editi-e?
4 Kpukpru mbon oro ẹkemede ẹkpenyene ndinam ndutịm ndibabak n̄kesịm man ẹnen̄ede ẹkọm mbon oro ẹyerede akpan ikot emi. Sia mbon oro ẹsidụkde Editi ẹsiwakde, oyom inen̄ede inọ mbufa owo ntịn̄enyịn ọkọrọ ye mbon oro ẹsidụkde mbono esop ke ini ke ini.
5. Didie ke afo ekeme nditịm esịt fo nnọ edinam emi?
5 Tịm Esịt Fo: Ẹdụn̄ọde N̄wed Abasi ke Usen ke Usen eke 2008 ye n̄wed usenọfiọn̄ eke 2008 ẹsịne san̄asan̄a ndutịm oro ẹnamde ẹnọ edikot Bible eke Editi ọtọn̄ọde ke March 17. Ndikot mban̄a mme akpan n̄kpọ oro ẹketịbede ke mme akpatre usen oro Jesus okodude uwem ke isọn̄ ayan̄wam fi nditịm esịt fo nnọ Editi. (Ezra 7:10) Nditie n̄kere nnyụn̄ mbọn̄ akam ke ini okotde mbụk Bible emi ayanam ọdọdiọn̄ owụt esịtekọm aban̄a ima oro Jehovah ye Eyen esie ẹkewụtde ke ndinọ ufak.—Ps. 143:5.
6. Didie ke nnyịn idibọ ufọn ito ediwụt esịtekọm mban̄a ufak?
6 Nte usen Editi asan̄ade ekpere, ẹyak nnyịn inen̄ede iben̄e idem inyụn̄ in̄wam mbon en̄wen ẹben̄e idem ẹnọ akpan edinam emi. Nditi nnyụn̄ n̄wụt esịtekọm mban̄a ufak ẹyesọn̄ọ itie ebuana nnyịn ye Jehovah ye Eyen esie. (2 Cor. 5:14, 15) Emi n̄ko oyonụk nnyịn ndikpebe mmọ ke ndiwụt mbon en̄wen ima n̄waidem.—1 John 4:11.