Nnyịn Iwụri Mme N̄kpọ Eke Ẹsọn̄ọde Ẹdọn̄ N̄kam
1 Ke ediwak isua ikie, Satan amada nsunsu ukpepn̄kpọ ye abian̄a esịri esịt ye ekikere ediwak owo. Enye amasuan utọ ukpepn̄kpọ nte Abasi-Ita-ke-Kiet, ukpọn̄ ikpaha ke nsinsi, ye ikan̄ hell. Enye amanam ẹyịk m̀mê Andibot odu, inyụn̄ iyakke ẹfiọk ke Abasi akanam ẹwet Bible. Ikpọ n̄kpọ en̄wen oro ẹbiọn̄ọde un̄wana akpanikọ ẹdi usua ekpụk ye ufreidụt. (2 Cor. 4:4) Didie ke nnyịn ikeme ndiwụri mme utọ edinịm ke akpanikọ oro ẹsọn̄ọde ẹdọn̄ n̄kam mi?—2 Cor. 10:4, 5.
2 Abuana Esịt: Mme owo ẹsinen̄ede ẹma mme n̄kpọ oro ido ukpono mmọ ẹkedade anyan ini ẹkpep mmọ ndinịm ke akpanikọ. Ndusụk owo ẹnịm se mînenke ke akpanikọ toto ke uyen. Man in̄wam utọ mbon oro, oyom itịn̄ ikọ ke usụn̄ oro owụtde ke imokpono mmọ.—1 Pet. 3:15.
3 Nnyịn imekeme ndinọ utọ mbon oro ukpono ebe ke ndiyak mmọ ẹtịn̄ se mmọ ẹnịmde ke akpanikọ ye se inamde mmọ ẹnịm utọ n̄kpọ oro. (Jas. 1:19) Eyedi mmọ ẹnịm ke ukpọn̄ ikpaha ke nsinsi koro mbonima mmọ ẹkpade ndien ọdọn̄ mmọ ndifiak n̄kụt mmọ. Mîdịghe mmọ ẹsidia usọrọ ini nduọkodudu koro mme usọrọ emi ẹsinọde mmọ ifet ndidu ye ubon mmọ. Nnyịn ndikpan̄ utọn̄ nnọ mmọ ayanam itịm ifiọk se inamde mmọ ẹkere n̄kpọ ntre, emi oyonyụn̄ an̄wam nnyịn ndinọ ibọrọ oro enyenede ufọn.—N̄ke 16:23.
4 Kpebe Jesus: Jesus ama enịm ata eti uwụtn̄kpọ ọnọ nnyịn ke ini enye ọkọbọrọde mbụme owo oro ọkọfiọkde Ibet. Jesus iketịn̄ke nnennen nnennen se akpanade ete oro anam, emi ekemede ndidi enye ikpekenyịmeke ke ntak mme n̄kpọ oro enye ekenịmde ke akpanikọ. Utu ke oro, Jesus ama ada ekikere esie aka N̄wed Abasi, ọdọhọ enye etịn̄ ekikere esie, onyụn̄ ada uwụtn̄kpọ an̄wam enye ọkọk ibuot.—Luke 10:25-37.
5 Mme nsunsu edinịm ke akpanikọ emi ẹnen̄erede ẹdọn̄ n̄kam imenke-men udomo ye akpanikọ Bible. (Heb. 4:12) Ndime ime nnam akpanikọ an̄wan̄a mme andikpan̄ nnọ nnyịn ekeme nditụk esịt mmọ, ndien nnyịn imekeme ndin̄wam mme owo ndisịn nsunsu ukpepn̄kpọ nnyụn̄ mbọ akpanikọ oro ekemede ndinam mmọ ẹwọrọ ufụn.—John 8:32.