Ini Ndidia Udia Eke Spirit Nnyụn̄ N̄kop Idatesịt
1. Didie ke Jehovah ọbọk ikọt esie ke n̄kan̄ eke spirit?
1 Jehovah ada ima ọbọk ikọt esie ke n̄kan̄ eke spirit. Ke akpanikọ, nnyịn imadia akpakịp udia eke spirit, ke adan̄aemi ediwak owo ke ererimbot ẹkopde biọn̄ ke n̄kan̄ eke spirit. (Isa. 65:13) Mbono district oro isikade kpukpru isua edi usụn̄ kiet oro Jehovah ọbọkde nnyịn ke n̄kan̄ eke spirit. Ndi afo ke etịm idem man odụk kpukpru ikpehe ke Mbono District “Ndausụn̄ Spirit Abasi” oro edide? Ẹtịm ata inem inem udia eke spirit ẹben̄e nnyịn.
2. Didie ke nnyịn ikeme nditịm idem mben̄e mbono oro edide?
2 Babak Nam Ndutịm: “Ekikere mme ọsọp-ubọk ẹkọ uwak ikpọn̄-ikpọn̄.” (N̄ke 21:5) Ke ntre, nte osụk anamde ntịmidem ndidụk usen mbita ke mbono emi, ben̄e eteutom fo ini idahaemi man ekeme ndidụk mbono emi. Ndi amanam ndutịm aban̄a ufọkidụn̄ edieke ediyomde? Oyoyom anam ndutịm aban̄a udia uwemeyo n̄ko man ekeme ndidu ke an̄wa mbono ndia udia ye nditọete fo. Nam ndutịm man ababak edisịm an̄wa mbono kpukpru usen man okụt itie etie onyụn̄ etiene abuana ke ikwọ ye akam ediberede.
3. Nso utọ ọfọn̄ ke nnyịn ikpaduak ndisịne?
3 Ana ikụt ite ke ọfọn̄ oro iduakde ndisịne owụt iso bụt onyụn̄ odot. (1 Tim. 2:9, 10) Mbono district ẹsidi eti ifet ndikwọrọ ikọ nnọ mbon oro ẹdude ke n̄kann̄kụk oro. Ke ini isịnede n̄kpọ oro owụtde ukpono ke obio mbono inyụn̄ idiande kad idiọn̄ọ nnyịn, nnyịn iyenen̄ede ikpụhọde ye mbon oro mînịmke ke akpanikọ, oro oyonyụn̄ anam mbon oro ẹkụtde nnyịn ẹkere nti n̄kpọ ẹban̄a nnyịn.
4. Nso idin̄wam nnyịn ye ubon nnyịn inen̄ede ibọ ufọn ito ndutịm mbono oro?
4 Nen̄ede Nọ N̄kpan̄utọn̄: Ke akpanikọ, nnyịn iyomke nditaba baba mben̄e ke udia eke spirit oro ẹtịmde mi! (N̄ke 22:17, 18) Nditiene nse Bible nnyịn ke ini ẹkotde itie N̄wed Abasi nnyụn̄ n̄wet mbio mbio akpan n̄kpọ, ẹyen̄wam nnyịn ndiwụk ntịn̄enyịn ke edinam oro nnyụn̄ mfep n̄kpọ oro ekemede ndiwọn̄ọde ntịn̄enyịn nnyịn. Ndien ke mbubịteyo, nnyịn imekeme ndineme mme akpan n̄kpọ oro ikewetde ye mbon efen. Ke mme isua ndondo emi, ẹkụt ndusụk uyen ẹtiede ẹneme nneme mîdịghe ẹdade urụk ukopikọ mmọ ẹnọ etop ẹsọk owo ke adan̄aemi edinam osụk akade iso. Edieke inyenede nditọ, esịnede mme uyen, ọkpọfọn itie ọtọkiet ye mmọ ikpan̄ utọn̄ inọ edinam utu ke ndiyak nditọ nnyịn ẹdaha ẹkpọn̄ nnyịn ẹketie ye mme uyen en̄wen.
5. Nso ke nnyịn ikpanam man inen̄ede ikop inem mbono?
5 Ẹdara Ebuana Nditọete: Udia esinen̄ede enem nnyịn ke ini idiade enye ye mme ufan nnyịn. (N̄ke 15:17) Kpasụk ntre, ndidu ye nditọete nnyịn ayanam inen̄ede ikop inem mbono. Ntre, ke ini edinam mîtọn̄ọke kan̄a, eyenen̄ede ọfọn nnyịn isan̄a ibịne mbon efen ikọtọn̄ọ nneme ye mmọ inyụn̄ idara ebuana nditọete! (Ps. 133:1) Ke ini etieibuot okpokoro ikpehe edinam ọdọhọde nnyịn idida itie nnyịn mbemiso ikwọukwak ọtọn̄ọde, nnyịn ikpenyene nditre nneme oro inyụn̄ iketie ke itie nnyịn mbemiso edinam ọtọn̄ọ.
6. Bụk ọkpọkpọ ifiọkutom oro owụtde nte nnyịn ikemede ndinọ mme owo ikọ ntiense ke obio mbono.
6 Du ke Mben̄eidem Ndinọ Ikọ Ntiense: Ikpọ mbono ẹsidi ata eti ifet ndinọ ikọ ntiense. Ke ini ediwak mbon oro ẹdụkde mbono ẹsikade itie unyamudia ke mbono ama akasuana, mme anyamudia ye mbon en̄wen ẹsibụp mmọ mbụme ẹban̄a ibuotikọ oro odude ke kad idiọn̄ọ mbono mmọ. Ndusụk owo ẹma ẹnọ mme owo eti ikọ ntiense ke utọ usụn̄ emi. Ẹma ẹkot ndusụk mbon oro ẹkebụpde utọ mbụme emi ẹdidụk ikpehe edinam mbono, ndusụk mmọ ẹnyụn̄ ẹdidụk.
7. Ntak emi nnyịn ikpodụkde mbono district oro edide?
7 Ẹbiat ediwak tọsịn hour ẹnam ndutịm mbono, ẹtịm mme itie mbono, ẹtịm mme itieutom oro ẹsede ẹban̄a mbono, ẹnyụn̄ ẹtịm mme utịn̄ikọ. Ofụri utom oro ẹnamde ke ima man ẹtịm udia eke spirit emi ẹwụt ke Jehovah enen̄ede ama ikọt esie. Kpukpru nnyịn ikpakam idụk mbono emi inyụn̄ idia udia eke spirit emi ye idatesịt! Edieke nnyịn inamde emi, nnyịn iditiehe nte mbon ererimbot, edi ‘iyọkwọ ke idatesịt.’—Isa. 65:14.
[Ekebe ke page 4]
Se Ẹtide Owo Ẹban̄a Mbono District
◼ Mme Ini Ndutịm: Ke usen mbita emi, ndutịm editọn̄ọ ke n̄kanika ebede usụkkiet ke minit edịp usenubọk. Ke ini ẹtọn̄ọde ndibre ikwọ Obio Ubọn̄, kpukpru nnyịn ikpenyene ndidu ke itie nnyịn man ndutịm ekeme nditọn̄ọ ke ido nte eyede. Ke Friday ye Saturday, mbono edisuana ke n̄kanika ayakde minit ition ndimia ition mbubịteyo; ndien ke Sunday, edisuana ke n̄kanika inan̄ mbubịteyo.
◼ Itie Ndibon N̄kpọisan̄: Mme adaidaha ẹyedu ke kpukpru an̄wa mbono ndiwụt mme owo ebiet ẹdibonde n̄kpọisan̄ mmọ. Mbọk ẹbere ye mmọ.—1 Cor. 14:40.
◼ Edimụm Itie Nnịm: Ẹmekeme ndimụm itie nnịm nnọ mbon oro mbufo ẹsan̄ade ke n̄kpọisan̄ kiet m̀mê mbon oro ẹdụn̄de ufọk kiet.
◼ Udia Uwemeyo: Mbọk ẹda udia uwemeyo ẹdi utu ke ndikpọn̄ itiembono man ẹkedep udia ke ini nduọkodudu uwemeyo. Ẹmekeme ndikama ekpri n̄kpọ udọn̄ udia emi ẹkemede ndinịm ke idak n̄kpọitie. Owo inyịmeke ẹmen ikpọ n̄kpọ udọn̄ udia, mme ọtọ-akpa, ye ọkpọsọn̄ mmịn ẹdụk efe mbono.
◼ Mme Etịbe: Nnyịn imekeme ndiwụt esịtekọm mban̄a ndutịm oro ẹnamde ke mbono emi ebe ke nditịp n̄kpọ ke imaesịt nsịn ke mme ekebe etịbe ke Ufọkmbono Obio Ubọn̄ nnyịn m̀mê ke itiembono kaban̄a utom ofụri ererimbot. Ẹkpenyene ndiwet “Watch Tower,” nte ikọ iba, ke babru okụk ban̄k ekededi oro ẹnọde nte etịbe ke itiembono.
◼ Mme Mbabuat N̄kpọntịbe: Edieke oyomde ẹsọsọp ẹnọ owo usọbọ ke itiembono, mbọk ẹneme ye adaidaha oro odude ekpere, emi edisọpde an̄wam man ẹmen owo oro ẹka itie unọ Akpa Usọbọ oro mme ọnọ usọbọ emi ẹdotde, emi ẹdude ke itiembono ẹkemede ndise nte idem esie ọdiọkde eketre nnyụn̄ nnọ un̄wam.
◼ Ẹkpeme Nte Ẹwatde N̄kpọisan̄: Mbọk ẹkpeme nte ẹwatde n̄kpọisan̄ mbufo ẹnyụn̄ ẹkpono mbet uwat ke ini ẹkade ẹnyụn̄ ẹnyọn̄de mbono. Mme Christian ẹda uwem nte edisana n̄kpọ, ntre mmọ ẹsinam kpukpru n̄kpọ ndikpeme enye. (Ps. 36:9) Nditọete oro ẹdotde ẹkpenyene ndidụri mme awat o-moto oro ẹkpede-kpe utọn̄ nnyụn̄ ndọhọ mmọ ẹwat sụn̄sụn̄ ẹnyụn̄ ẹtịn̄ enyịn ẹkpeme nte ẹwatde.
◼ N̄kpọ Umụmikọ: Owo ikpenyeneke ndida n̄kpọ umụmikọ ekededi mfak ke ikan̄ ilektrik m̀mê ke ndutịm ukwak utịn̄ikọ itiembono, edi ẹkeme ndikama enye ke usụn̄ oro mîdifịnake mbon efen.
◼ Edisio Ndise: Edieke osiode ndise ke ini edinam osụk akade iso, kûdomo emịnen̄mịnen̄ ikan̄. Ikpọfọnke owo ekededi ndikpọn̄ efe mbono man okosio ndise ke ini edinam osụk akade iso. N̄ko, owo inyịmeke mme osio ndise, idem mbon emi ẹdide Mme Ntiense, ẹdụk ẹdi an̄wa mbono ẹdisio ndise.
◼ Babru Follow-Up: Ke ini ẹnyenede ikọ ntiense ido nneme ye owo ekededi oro owụtde udọn̄ ke ini mbono, ẹkpenyene ndida babru Please Follow Up (S-43) ntọt. Mme asuanetop ẹkpenyene ndida babru Please Follow Up kiet m̀mê iba ndi mbono. Ẹmekeme ndikpọn̄ babru oro ẹwetde n̄kpọ ẹyọhọ nnọ ewetn̄wed esop mbufo ke ẹma ẹkefiak ẹnyọn̄ man enye anam n̄kpọ aban̄a.—Se Utom Obio Ubọn̄ Nnyịn eke February 2005, p. 6.
◼ Itie Unyamudia ye Mme Anyam N̄kpọ: Yak nti edu fo ẹnọ enyịn̄ Jehovah ubọn̄ ke ini akade itie unyamudia. Iwụtke eti ibuot ndikedep n̄kpọ ke ini edinam osụk akade iso. Ọkpọfọn nnyịn idep se ededi oro iyomde mbemiso mbono ọtọn̄ọde m̀mê ke mbono ama asuana.
◼ Drama: Idiwụtke ima edieke nditọete iban ẹbọbọde ikpọ bọkịt ke uwemeyo Sunday ke ini drama, sia emi mîdiyakke mbon oro ẹtiede ke edem ẹkụt se ikade iso. Oyom ẹnam emi akpan akpan ke ntak ukeuke Ufọk Mbono ye mme Ufọkmbono Obio Ubọn̄ oro ẹsidade ẹnịm mbono n̄ko.—1 Cor. 10:24.
◼ Mme Ufọkidụn̄: Ke ẹsịmde itiembono, ẹnam n̄kpọ nte mbon emi spirit Abasi adade usụn̄ ke ini ẹbọde ufọkidụn̄. Ẹkûdụn̄ ke mme dọmitri edieke Itieutom Unọ Ufọkidụn̄ mîdọhọke mbufo ẹdụn̄ do. Ẹdụn̄ ke ebiet oro ẹnọde mbufo. Ifọnke nditọete irenowo ndidu nsịm ufọt okoneyo m̀mê ndide ke mme ufọkidụn̄ oro ẹnọde iban m̀mê iban ndinam ntre ke eke irenowo. Ẹtem udia n̄kukụre ke mme ebiet oro ẹnọde unyịme. N̄ko, nditem udia ke ini edinam osụk akade iso edi unana ediwụt esịtekọm nnọ mme n̄kpọ eke spirit. (Luke 10:38-42) Edieke mfịna odude ke ebiet oro odụn̄de, sọsọp dọhọ itieutom oro ẹsede ẹban̄a ufọkidụn̄ ke ini osụk odude ke an̄wa mbono.
◼ Ndiduọn̄ọ Mbio ke Nnennen Itie: Mme ete ye eka ẹkpenyene ndikpep nditọ mmọ ẹkûduọn̄ọ efọk mmọn̄ ye mbio eken ke An̄wa Mbono akpan akpan ke mme ebiet oro ẹsitiede ke efe mbono. Emi esịne n̄ko mme n̄kann̄kụk An̄wa Mbono. Ẹyebon ediwak n̄kpọ mbio oro ẹkponde ekem ke ofụri an̄wa mbono man kpukpru owo, esịnede n̄kpri nditọ, ẹkpekeme ndidọn̄ mbio do. Ọfọn ẹkpep nditọwọn̄, toto ke ini mmọ ẹdide nsek, ndima nnyụn̄ nnịm n̄kann̄kụk asana.