Nnyịn Imenyene Mme Ọsọn̄urua N̄kpọuto Ndinọ Mbon Efen
1 N̄kpọuto eke spirit emi nnyịn imade ẹyeyọhọ Ikọ Abasi. (Ps. 12:6; 119:11, 14) Ini kiet, Jesus ama ọnọ mme uwụtn̄kpọ emi ẹkedade ẹban̄a nsio nsio ikpehe Obio Ubọn̄, ndien ekem obụp mme mbet esie ete: “Nte mbufo ẹma ẹfiọk se kpukpru n̄kpọ emi ẹwọrọde?” Ke mmọ ẹma ẹkebọrọ ih, enye ama ọdọhọ mmọ ete: “Sia edide ntre, anditeme mbio obio ekededi, ke ini ọbọde ukpep aban̄a obio ubọn̄ heaven, ebiet owo emi edide enyeneufọk, emi osion̄ode mbufa n̄kpọ ye n̄kani n̄kpọ ke ufọk ubon n̄kpọuto esie edi.”—Matt. 13:1-52.
2 Ẹkeme ndida akpanikọ Bible emi ikekpepde ke ini ikọtọn̄ọde ndikpep Bible nte n̄kani n̄kpọuto. Nte ikade iso ikpep mme ntotụn̄ọ n̄kpọ ke Ikọ Abasi, nnyịn imesikụt mme akpanikọ Bible efen emi idade nte mbufa n̄kpọuto. (1 Cor. 2:7) N̄ko, “ofụn emi anamde akpanikọ onyụn̄ enyenede ọniọn̄” an̄wam nnyịn ifiọk mbufa n̄kpọuto.—Matt. 24:45.
3 Nnyịn inen̄ede ida n̄kani ye mbufa n̄kpọuto emi ke ọsọn̄urua. Emi anam nnyịn ibọ ukpep inyụn̄ inyene ifiọk nte mme andikpep mbon en̄wen Ikọ Abasi, ibuanade ọsọn̄urua akpanikọ oro ikpepde ye mbon efen kpukpru ini.
4 Kpep N̄kpọ to Uwụtn̄kpọ Jesus: Jesus ama enen̄ede esịn ukeme abuana mme n̄kpọuto emi ye mbon en̄wen man owụt nte enye akadade mmọ ke ọsọn̄urua. Idem ke ini idem ekememde enye, enye iketreke ndision̄o n̄kpọuto ke “ubet ubon n̄kpọ” esie.—John 4:6-14.
5 Ima oro Jesus akamade mbon oro ẹbuenede ke n̄kan̄ eke spirit akanam enye abuana n̄kpọuto oro ọnọde uwem, kpa akpanikọ Abasi, ye mmọ. (Ps. 72:13) Enye ama atua mbon oro ẹkekopde biọn̄ eke spirit mbọm, onyụn̄ “ekpep mmọ ediwak n̄kpọ.”—Mark 6:34.
6 Kpebe Jesus: Ke ini idade n̄kpọuto nnyịn ke ọsọn̄urua, ọyọdọn̄ nnyịn ndiwụt mme owo mme ọsọn̄urua n̄kpọuto eke spirit emi ẹdude ke Bible, kpa nte Jesus akanamde. (N̄ke 2:1-5) Okposụkedi idem ekemede ndimem nnyịn ndusụk ini, iyokop nduaidem nditịn̄ mban̄a akpanikọ N̄wed Abasi. (Matt. 12:34) Ntotụn̄ọ esịtekọm oro inyenede iban̄a mme n̄kpọuto nnyịn ayanam isịn idem inam utom ukwọrọikọ, ifakde ifet kpukpru ini ndibuana ọyọhọ ọyọhọ.