Nte Ẹkpedade N̄wed “Ima Abasi” Ẹnịm Ukpepn̄kpọ Bible
1. Nso idi uduak n̄wed “Ima Abasi”?
1 Idem akaduai nnyịn didie ntem ndibọ obufa n̄wed oro “Ẹnịm Idem Mbufo ke Ima Abasi” ke Mbono District “Ẹka Iso Ẹkpere Jehovah”! Ẹtịm n̄wed emi man an̄wam nnyịn ifiọk inyụn̄ ima mme idaha Jehovah kaban̄a ido uwem, idịghe man ekpep nnyịn mme akpan ukpepn̄kpọ Bible. Nnyịn idinọhọ mme owo n̄wed emi ke an̄wautom.
2. Didie ke ẹdida n̄wed emi inam n̄kpọ, ndien ye mmanie?
2 N̄wed emi edidi ọyọhọ n̄wed iba oro ẹdikpepde ye nditọ ukpepn̄kpọ Bible ke ẹma ẹkekụre ndikpep n̄wed Bible Ekpep. Ti ete ke mme owo isinamke n̄kọri eke spirit ukem ukem. Ekpenyene ndinịm ukpepn̄kpọ kiet kiet ekekem ye idaha eyen ukpepn̄kpọ. Kụt ete ke se ekpepde enen̄ede an̄wan̄a eyen ukpepn̄kpọ. Ke ata ediwak idaha, owo ikpenyeneke ndida n̄wed emi ntọn̄ọ ukpepn̄kpọ Bible ye mbon oro ẹkemede ndidi ẹma ẹkpekpep ediwak n̄wed ke ini edem edi idụkke mme mbono esop, ndien onyụn̄ ana in̄wan̄-in̄wan̄ nte ke idọn̄ke mmọ ndidu uwem ẹkekem ye mme akpanikọ Bible oro ẹkekpepde mmọ.
3. Nso ke ikpanam edieke edide ikpep n̄wed Tuak Ibuot nọ Abasi idahaemi ye eyen ukpepn̄kpọ?
3 Edieke edide afo ekpep n̄wed Tuak Ibuot nọ Abasi idahaemi ye owo ndien ibuot oro ẹsụhọde iwakke, afo emekeme ndibiere ndikụre n̄wed oro nnyụn̄ nsịn udọn̄ nnọ eyen ukpepn̄kpọ ete okot n̄wed “Ima Abasi” ke idemesie. Ke ẹsiode oro ẹfep, mfọnn̄kan n̄kpọ ekpedi nditọn̄ọ ukpepn̄kpọ ke obufa n̄wed emi ke akpa ibuot esie. Kpa nte edide ye n̄wed Bible Ekpep, afo emekeme ndineme mme ibuotikọ oro ẹdude ke se ẹwetde ẹdian edieke amade.
4. Nso ke ikpanam edieke eyen ukpepn̄kpọ anade baptism mbemiso okụrede n̄wed Bible Ekpep ye n̄wed “Ima Abasi”?
4 Edieke eyen ukpepn̄kpọ anade baptism mbemiso okụrede n̄wed mbiba, ekpenyene ndika iso n̄kpep enye n̄kpọ tutu okụre n̄wed “Ima Abasi.” Okposụkedi emi eyen ukpepn̄kpọ oro ama akana baptism, ke ini ekpepde enye n̄kpọ afo emekeme ndibat ini, mfiakn̄ka, ye ukpepn̄kpọ Bible. Asuanetop oro asan̄ade ye afo onyụn̄ abuanade ke ukpepn̄kpọ oro ekeme ndibat ini n̄ko.
5. Didie ke ẹkeme ndida n̄wed “Ima Abasi” n̄n̄wam mme asuanetop oro mîwọrọke an̄wautom aba?
5 Edieke ebiowo kiet ke otu Kọmiti Utom Esop ọdọhọde fi ete enịm ukpepn̄kpọ Bible ye owo oro mîwọrọke an̄wautom aba, enye ekeme ndidọhọ fi eneme mme akpan ibuot ke n̄wed “Ima Abasi.” Owo ikpenyeneke ndinịm utọ ukpepn̄kpọ oro ke anyan ini. Nso eti ndutịm ke edi ntem ndinọ nnyịn obufa n̄wed emi, oro ẹtịmde man an̄wam nnyịn ika iso idu “ke ima Abasi”!—Jude 21.