Ekebe Mbụme

◼ Nso ke kpukpru nnyịn ikpanam man ikûtịmede mbono esop? (Deut. 31:12)

Sia inen̄erede ikpono Jehovah inyụn̄ imade mbono esop oro enye etịmde, ẹsisịn udọn̄ ẹnọ kpukpru nnyịn ẹte ibabak ididụk inyụn̄ iben̄e idem man Jehovah ekpep nnyịn n̄kpọ. Ọfọn itie ke mme n̄kpọitie iso, man mbon oro ẹkamade n̄kpri nditọ ye mbon oro ẹdidide ke idiọk ini ẹkpetie ke edem. Mbemiso mbono esop ọtọn̄ọde, ẹkpenyene ndikama urụk ukopikọ oro ẹkamade ẹsan̄a ye mme n̄kpọ ntre ke usụn̄ oro mîditịmekede otuowo. Edieke kpukpru owo ẹtiede sụn̄, n̄kpọ idinen̄ekede itịmede mbono esop.—Eccl. 5:1; Phil. 2:4.

Eyenete oro emehede ye mbufa owo ekeme ndinyịme nditie ye mmọ ke ini mmọ ẹtọn̄ọde ndidụk mbono esop. Emi ọyọfọn akpan akpan edieke n̄kpri nditọ oro anade ẹnọ ukpep ẹtienede ẹdụk. Eyedi ubon ẹtọn̄ọ ndidụk mbono esop obufa. Ke edide ntre, anaedi ete ye eka ẹyenen̄ede ẹma nditie n̄kpere edem mbak ẹditịmede mme owo ke ini mmọ ẹyomde ndimen nditọ mmọ n̄wọrọ an̄wa ke esisịt ini. (N̄ke 22:6, 15) Owo ikpenyeneke ndinọ mbon oro ẹkamade n̄kpri nditọ itie ke san̄asan̄a ubet mbak nditọ oro ẹdikere ke imekeme ndinam uyom nte imama. Nte ido edide, ọfọn mme ete ye eka ẹmen nditọ mmọ ẹwọrọ an̄wa ẹketụnọ m̀mê ẹkese ẹban̄a mme n̄kpọ en̄wen oro mmọ ẹyomde ndien ekem ẹfiak ẹda mmọ ẹdụk ẹdi.

Mme adaidaha esikpan uyom ke itie utuakibuot. Mmọ ẹsinọ mme ubon ye mbon oro ẹdide ke idiọk ini itie oro odotde. Mme adaidaha ẹfiọk nte ẹkemede ndinam mbon en̄wen ẹtie ke itie oro ọfọnde inyụn̄ itịmekede mbon en̄wen nte mîdotke. Mmọ ẹsifiọk nte ẹsede ẹban̄a uyom ekededi. Ke ini eyenọwọn̄ esịnde ntịme, mme adaidaha ẹkeme ndin̄wam.

Kpukpru nnyịn oro isopde idem man ituak ibuot inọ Jehovah imekeme nditie sụn̄ man ikpep n̄kpọ iban̄a Jehovah ye se enye aduakde ndinam ke emem emem obufa ererimbot oro edinen ido edidude.—Heb. 10:24, 25.