Di Eti Nsan̄a ke An̄wautom

1. Nso ufọn idu ke ndisan̄a ye owo ke an̄wautom?

¹ Ini kiet, Jesus ama ọdọn̄ mbet 70 ete ẹkekwọrọ ikọ, ndien enye ‘okosio mmọ ọdọn̄ ẹsan̄a iba iba.’ (Luke 10:1) Ndutịm emi ama anam mbet esie ẹkeme ndin̄wam nnyụn̄ nsịn udọn̄ nnọ kiet eken ke adan̄aemi mmọ ẹkekwọrọde ikọ. Ke ini isan̄ade ye asuanetop efen ke an̄wautom, didie ke ikeme ndin̄wam enye?

2. Ke ini nsan̄a nnyịn ọkwọrọde ikọ ke an̄wautom, didie ke ikpakpan̄ utọn̄, ndien ntak-a?

² Kpan̄ Utọn̄: Nen̄ede kpan̄ utọn̄ ke ini nsan̄a fo ọkwọrọde ikọ. (Jas. 1:19) Edieke ẹkotde itie N̄wed Abasi, kụbọde Bible fo tiene se. Se owo oro etịn̄de ikọ iso, edide nsan̄a fo etịn̄ m̀mê enyeneufọk etịn̄. Edieke afo enen̄erede akpan̄ utọn̄ ke nneme oro, emi ekeme ndisịn udọn̄ nnọ enyeneufọk nditiene n̄kpan̄ utọn̄.

3. Ini ewe ke nsan̄a nnyịn akpama itiene isịn uyo ke nneme?

³ Fiọk Ini Emi Ekpetienede Esịn Uyo: Ke ini nsan̄a nnyịn ọkwọrọde ikọ, nnyịn iwụt ke imokpono enye ebe ke ndiyak enye ada iso ke nneme oro. (Rome 12:10) Ikpanaha isịbe idụk nneme oro. Edieke enye efrede se enye okoyomde nditịn̄ m̀mê edieke enyeneufọk afan̄ade n̄kpọ m̀mê obụpde mbụme ndien nsan̄a nnyịn oyom un̄wam, iyodomo nditịn̄ n̄kpọ nsịn ke se enye eketịn̄de utu ke nditọn̄ọ obufa ibuot nneme. (N̄ke 16:23; Eccl. 3:1, 7) Edieke itịn̄de ikọ, akpana ikọ nnyịn etịp esịn ke ikọ ntiense oro ẹnọde.—1 Cor. 14:8.

4. Nso idinam nnyịn inyene idatesịt inyụn̄ ikụt unen ke an̄wautom?

⁴ Ke ini mbet 70 oro ẹkesan̄ade iba iba ẹkekụrede utom ukwọrọikọ, mmọ ẹma “ẹnyọn̄ọ ẹdi ye idatesịt.” (Luke 10:17) Nnyịn n̄ko iyenyene idatesịt inyụn̄ ikụt unen ke an̄wautom ke ini ikpan̄de utọn̄ inyụn̄ ifiọkde ini emi ikposiorode uyo ke adan̄aemi in̄wamde mbon oro isan̄ade kiet ke an̄wautom.