Ekebe Mbụme
◼ Ndi akpana Mme Ntiense Jehovah ẹsuan mme utịn̄ikọ oro mmọ ẹmụmde ẹsịn ke ọkpọ umụmikọ m̀mê mbon oro ẹsion̄ode ẹwet?
Mme utịn̄ikọ Bible ẹsisịn udọn̄ ẹnọ nnyịn ẹnyụn̄ ẹsọn̄ọ nnyịn idem. (Utom 15:32) Ntem esidọn̄ mme owo ndibuana utọ ọnọ nsịnudọn̄ utịn̄ikọ oro ye mbon oro mîkodụhe do. Sia inyenede nsio nsio n̄kpọ umụm ikọ idahaemi, emem utom ndimụm utịn̄ikọ nnyụn̄ nsuan enye nnọ mme owo. Ndusụk owo ẹnyene ata ediwak utịn̄ikọ oro mmọ ẹkemụmde ẹnịm, ẹsịnede mme utịn̄ikọ oro ẹkenọde ata ediwak isua ke edem, ndien mmọ ẹsibuọt mme owo mme utịn̄ikọ emi mîdịghe ẹfiak ẹmịn̄ mmọ ẹnọ mme ufan, mmọ ẹsinyụn̄ ẹnam emi ye eti uduak. Ndusụk owo ẹsidọn̄ mme utịn̄ikọ emi ke ikpehe ndutịm Intanet mmọ ẹnyụn̄ ẹdọhọ owo ekededi aka do okosio.
Ke nditịm ntịn̄, inyeneke se idiọkde edieke imụmde mme utịn̄ikọ idọn̄ ke ọkpọ umụmikọ man nnyịn ye mme iman nnyịn ikpakpan̄ utọn̄ ikop. N̄ko-n̄ko, mbiowo ẹkeme ndinam ndutịm man ẹmụm mme utịn̄ikọ ẹdọn̄ ke ọkpọ umụmikọ ẹnọ nditọete oro udọn̄ọ mîyakke mmọ ẹdụk mme mbono esop oro. Nte ededi, imenyene nti ntak nditre ndisuan mme utịn̄ikọ oro ẹmụmde ẹsịn ke ọkpọ umụmikọ m̀mê mbon oro ẹsion̄ode ẹwet.
Sia ẹsinọde utịn̄ikọ ẹtiene se itịbede ke n̄kann̄kụk, se ẹtịn̄de ekeme nditre ndin̄wan̄a nnyịn sia nnyịn mîdiọn̄ọke se ikanamde ẹtịn̄ ikọ oro ntre. Ke adianade do, nnyịn idikemeke ndifiọk owo oro ọkọnọde utịn̄ikọ emi ye ini oro enye ọkọnọde man ifiọk m̀mê ke ẹdada ntọt oro ẹnam n̄kpọ idahaemi m̀mê ẹnyụn̄ ẹnen. (Luke 1:1-4) Ndisuan mme utịn̄ikọ oro ẹmụmde ẹsịn ke ọkpọ umụmikọ m̀mê mbon oro ẹsion̄ode ẹwet ekeme ndinam ndusụk owo ẹnọ m̀mê ẹbọ ukpono oro mîdotke.—1 Cor. 3:5-7.
Ofụn emi anamde akpanikọ onyụn̄ enyenede ọniọn̄ esinam utom ọkpọsọn̄ ndinọ nnyịn nnennen “udeme” udia eke spirit nnyịn ke “edikem ini.” (Luke 12:42) Emi esịne ndutịm oro ẹsinamde man ẹnọ utịn̄ikọ ke mme esop n̄kann̄kụk eke Mme Ntiense Jehovah ye enye oro ẹkemede ndikosion̄o ke ikpehe ndutịm Intanet jw.org. Nnyịn imenịm ke ofụn emi anamde akpanikọ onyụn̄ enyenede ọniọn̄ ye Otu Ukara esie ẹyenọ nnyịn se iyomde man isọn̄ọ mbuọtidem nnyịn.—Utom 16:4, 5.