“Afo Eyekeme Ndinam Usiakusụn̄!”
1. Eyenete an̄wan kiet ekese didie utom usiakusụn̄ esie?
1 Kathe B. Palm ọkọdọhọ ete: “Idụhe utom ndomokiet oro akpakanamde mi n̄kop uyụhọ ntem, m̀mê oro akpakanamde mi nnyene utọ edidiọn̄ eke spirit emi.” Enye ama esịn ifịk anam utom nte asiakusụn̄ ke ata ediwak isua, ọnọ ikọ ntiense ke kpukpru itụn̄ ye inụk Chile, ke South America. Ekeme ndidi owo ọdọhọ fi ete: “Afo eyekeme ndinam usiakusụn̄” ke ntak emi enye okụtde ufọn emi mbon oro ẹdude ke utom uyọhọ ini ẹbọde.
2. Nam an̄wan̄a ntak emi mme owo ẹsinyenede ata uyụhọ ke ndinam mme n̄kpọ eke spirit.
2 Usụn̄ Uwem Oro Ọnọde Uyụhọ: Jesus, emi edide Uwụtn̄kpọ ọnọ nnyịn, ama enen̄ede okop inem ke ndinam uduak Ete esie. (John 4:34) Mmọdọ, enye ama ekeme ndinen̄ede n̄kpep mbet esie nte ke ata uyụhọ oto ke ndinam mme n̄kpọ oro ẹnyenede ebuana ye utuakibuot nnọ Jehovah. Imesikop uyụhọ ke ini idade uwem nnyịn inam utom oro anamde nnyịn inyene unyịme Jehovah. N̄ko n̄ko, adan̄a nte nnyịn idade ekese ini, odudu ye inyene nnyịn in̄wam mbon en̄wen, ntre ke inemesịt nnyịn okpon.—Utom 20:31, 35.
3. Nso idatesịt ke ikeme ndinyene ke ndisịn ekese ini ke an̄wautom?
3 Nte isịnde ekese ini ke utom an̄wautom, ntre ke idikop idatesịt ke nditọn̄ọ nnyụn̄ nnịm mme ukpepn̄kpọ Bible. Idem ke ebiet emi etiede nte ke ediwak owo inyeneke udọn̄, imekeme ndikụt ke efakutom nnyịn on̄wụm mfri edieke inyenede usọ ye mbufiọk ke utom ukwọrọikọ. Mme asiakusụn̄ ẹkeme ndinam se mmọ ẹkekpepde ke Ufọkn̄wed Utom Usiakusụn̄ oro mmọ ẹkedụkde ke ẹma ẹkesiak usụn̄ ke n̄kpọ nte isua kiet. (2 Tim. 2:15) Nte ikade iso isịn ifịk, imekeme nditọ mme n̄kpasịp akpanikọ oro ẹdin̄wụmde mfri nte ini akade.—Eccl. 11:6.
4. Nso ke mme uyen oro ẹkperede ndikụre n̄wed ẹkpekere ẹban̄a?
4 Mme Uyen: Ke emi afo ekperede ndikụre ufọkn̄wed mi, ndi emetịm ekere aban̄a ini iso fo? Kan̄a ke emi, se ẹnamde ke ufọkn̄wed ebiere nte abiatde ini fo. Ama okụre n̄wed, nso ke edida ini oro ekesidade aka ufọkn̄wed anam? Utu ke ndinam utom idịbi udia ofụri ini, ntak mûbọn̄ke akam ukere uban̄a usiakusụn̄ ofụri ini-e? Mme usọ oro afo edikpepde—ndikwọrọ ikọ nnọ nsio nsio orụk owo, ndikan mme ọkpọkpọ n̄kpọ ubiọn̄ọ, ndinọ idem ntụnọ, ye ndinyene usọ unọ ukpep—ẹyenyene ufọn ẹnọ fi ke ofụri eyouwem fo.
5. Didie ke mme ete ye eka ye esop ẹkeme ndisịn udọn̄ nnọ usiakusụn̄?
5 Mme ete ye eka, ndi ke ẹnam udeme mbufo ndin̄wam nditọ mbufo ẹmek utom uyọhọ ini? Mme ikọ ye nti uwụtn̄kpọ mbufo ẹkeme ndinam ekese ndin̄wam mmọ ẹnịm mme n̄kpọ Obio Ubọn̄ akpa. (Matt. 6:33) Ray emi ọkọtọn̄ọde usiakusụn̄ ke ama okokụre ufọkn̄wed sekọndri, eti ete: “Eka mi ama enịm nte ke usiakusụn̄ esinam owo enen̄ede okop uyụhọ ke uwem.” Kpukpru owo ke esop ẹkeme ndisịn udọn̄ nnọ utom usiakusụn̄ ke se mmọ ẹtịn̄de ye ibetedem oro mmọ ẹnọde. Jose emi otode Spain ọdọhọ ete: “Esop nnyịn akada utom usiakusụn̄ nte mfọnn̄kan ubọkọkọ oro n̄kparawa ẹkpemekde. Se mmọ ẹkesitịn̄de ẹban̄a utom usiakusụn̄ ye ata ata un̄wam oro ẹkesinọde ama anam edi mmemmem n̄kpọ ọnọ mi nditọn̄ọ usiakusụn̄.”
6. Nso ke ikpanam edieke mîdọn̄ke nnyịn kan̄a ndinam utom usiakusụn̄?
6 Ndikan Mme N̄kpọ Ubiọn̄ọ: Edi nso ke akpanam edieke ekerede ete, ‘Idọn̄ke mi ndisiak usụn̄’? Edieke afo ekesikerede ntre, bọn̄ akam nọ Jehovah nyụn̄ dọhọ enye ete, ‘Mfiọkke m̀mê mmekeme ndisiak usụn̄, edi nyom ndinam se inemde fi esịt.’ (Ps. 62:8; N̄ke 23:26) Ekem yom ndausụn̄ oro enye adade Ikọ ye esop esie ọnọ. Ediwak mme asiakusụn̄ ofụri ini ẹkebem iso “ẹtabi” usiakusụn̄ unọ un̄wam ẹse, ndien idatesịt oro mmọ ẹkenyenede anam mmọ ẹda utom uyọhọ ini nte ubọkọkọ.—Ps. 34:8.
7. Nso ke ikpanam edieke ikerede ke nnyịn idikemeke ndinọ hour 70 oro ẹyomde kpukpru ọfiọn̄?
7 Nso ke akpanam edieke mûfiọkke m̀mê eyekeme ndinọ hour 70 oro ẹyomde kpukpru ọfiọn̄? Ntak emi mûnemeke n̄kpọ emi ye mme asiakusụn̄ oro ẹdude ke ukem idaha oro ebietde okwo? (N̄ke 15:22) Ekem wet nsio nsio ndutịm oro ẹkemede ndifọn ye afo. Afo emekeme ndikụt nte ke ndidep ifet nto mme n̄kpọ oro mîdịghe akpan n̄kpọ nnọ utom an̄wautom emem utom akan nte afo ekesikerede.—Eph. 5:15, 16.
8. Ntak emi ikpodụn̄ọrede mme idaha nnyịn ke ini ke ini-e?
8 Fiak Se Mme Idaha Fo: Mme idaha owo ẹsiwak ndikpụhọde. Ọfọn esifiak odụn̄ọde mme idaha fo ke ini ke ini. Ke uwụtn̄kpọ, ndi emekpere ndisịm isua ukpọn̄ utom? Randy, emi akabakde ọkpọn̄ utom, ọkọdọhọ ete: “Ubiere emi an̄wam mi nditọn̄ọ usiakusụn̄ ofụri ini ye n̄wan mi, ndien emi anam nnyịn inyene ifet ndikanam utom ke ebiet emi udọn̄ okponde. N̄kemeke ndibat mme edidiọn̄ oro mbọde ke ndikanam ubiere emi, edi n̄kponn̄kan edidiọn̄ ke otu mme edidiọn̄ oro edi eti ubieresịt.”
9. Nso ke mme ọdọ ndọ ẹkpekere ẹban̄a?
9 Ke ndusụk mme ọdọ ndọ ẹma ẹketịm ẹtie ẹkere, mmọ ẹma ẹdikụt nte ke iyomke mmọ mbiba ẹnam utom idịbi udia ofụri ini. Ke akpanikọ, emi ekeme ndiyom ubon oro ẹdu mmemmem uwem, edi n̄waidem emi odot. John emi n̄wan esie eketrede utom idịbi udia ofụri ini ke ndondo emi man ekeme ndinam ekese ke utom ukwọrọikọ, ọdọhọ ete: “Inyeneke se inemde mi esịt ikan ndifiọk nte ke n̄wan mi ada ini esie anam n̄kpọ Abasi.”
10. Nso isinam mme Christian ẹkere ndidụk utom usiakusụn̄?
10 Edinam Oro Owụtde Ima ye Mbuọtidem: Jehovah anam utom ukwọrọikọ edi ata akpan utom oro owo nnyịn ekededi ekemede ndinam. Ẹmọn̄ ẹsọp ndisobo akani editịm n̄kpọ emi, ndien mbon oro ẹsemede ẹkot enyịn̄ Jehovah kpọt ẹdibọhọ. (Rome 10:13) Esịt oro ọyọhọde ye ima ye esịtekọm oro inyenede inọ enye ke se enye anamde ọnọ nnyịn ẹdinụk nnyịn inam ewụhọ oro Eyen esie ọnọde nnyịn ete ikwọrọ ikọ ifịk ifịk. (Matt. 28:19, 20; 1 John 5:3) N̄ko n̄ko, ndinyene mbuọtidem nte ke nnyịn inen̄ede idu uwem ke mme akpatre usen ayanam nnyịn inam kpukpru se ikemede ke utom ukwọrọikọ ke adan̄aemi ini osụk odude, utu ke ndida ererimbot nnam n̄kpọ ọyọhọ ọyọhọ.—1 Cor. 7:29-31.
11. Ikpanam n̄kpọ didie edieke owo ọdọhọde nnyịn ke iyekeme ndinam usiakusụn̄?
11 Usiakusụn̄ ofụri ini idịghe ikpîkpu edinyịme ndibiat ekese ini ke an̄wautom; enye edi usụn̄ ndiwụt ima oro imade Abasi. Ntre edieke owo ọdọhọde fi ke afo eyekeme ndinam usiakusụn̄, da nte ke enye ototoro fi. Kere nyụn̄ bọn̄ akam ban̄a nte ekpetienede esịne ke otu mbon oro ẹdude ke utom emi ọnọde uyụhọ mi.
[Se ẹwetde ke ikpọ abisi ke page 4]
Mme ete ye eka, ndi ke ẹnam udeme mbufo ndin̄wam nditọ mbufo ẹmek utom uyọhọ ini?
[Se ẹwetde ke ikpọ abisi ke page 5]
Jehovah anam utom ukwọrọikọ edi ata akpan utom oro owo nnyịn ekededi ekemede ndinam.