Nte Ẹkpekpepde Mbufa Owo Ndikwọrọ Ikọ
1. Eketie fi didie ke idem akpa ini oro ọkọtọn̄ọde ndikwọrọ ikọ?
1 Ndi emeti akpa usen oro eketienede aka ukwọrọikọ ke ufọk ke ufọk? Eyedi idem ama enyek fi. Edieke akasan̄ade ye owo oro ekekpepde fi Bible m̀mê asuanetop en̄wen, ekeme ndidi un̄wam oro enye akan̄wamde fi ama enem fi. Idahaemi afo ekemede ndikwọrọ ikọ mi, enyene n̄ko nditiene n̄n̄wam ẹkpep mbufa owo ndikwọrọ ikọ.
2. Nso ye nso ke oyom mbufa asuanetop ẹkpep?
2 Mbufa mme asuanetop ẹnyene ndikpep nte mmọ ẹkpetọn̄ọde nneme ye enyeneufọk, nte ẹkpekotde Bible ẹnọ owo, nte ẹkpenamde mme mfiakn̄ka, ye nte ẹkpetọn̄ọde ẹnyụn̄ ẹnịmde ukpepn̄kpọ Bible. Mmọ ẹkpenyene n̄ko ndikpep nte ẹkpebuanade ke nsio nsio ikpehe utom ukwọrọikọ, utọ nte edinọ ikọ ntiense efak ye edikwọrọ ikọ nnọ mme owo ke mme itie mbubehe. Afo emekeme ndin̄wam mmọ ẹnam n̄kọri ke mme ikpehe emi ebe ke uwụtn̄kpọ oro afo enịmde ye mme ekikere oro ọnọde mmọ.
3. Didie ke uwụtn̄kpọ nnyịn ekeme ndin̄wam mbon en̄wen?
3 Da Uwụtn̄kpọ Kpep Mmọ N̄kpọ: Jesus ama anam owụt mme mbet esie nte ẹkpekwọrọde ikọ. (Luke 8:1; 1 Pet. 2:21) Ke ini aduakde ndisan̄a ye obufa asuanetop, tịm mmemmem ikọ oro edidade ọtọn̄ọ nneme, emi asuanetop oro ekemede ndikpebe, emekeme ndisio enye ke kiet ke otu n̄wed nnyịn. Ekem, dọhọ ke imọ imọn̄ ikwọrọ ikọ ke ufọk kiet m̀mê iba man asuanetop oro ekeme ndikop nte ọkwọrọde. Mbemiso esịmde ufọk efen, emekeme ndidọhọ asuanetop oro etịn̄ m̀mê nso ke imọ ikanam man ukwọrọikọ imọ oro ọfọn. Emi ayanam enye okụt ufọn edisan̄a ye mbon en̄wen ke an̄wautom, onyụn̄ anam emem utom ọnọ enye ndinyịme ndibọ ekikere ekededi oro afo ọnọde ke enye ama ọkọkwọrọ ikọ ke idemesie.
4. Didie ke ikeme ndin̄wam obufa asuanetop ke ima ikakpan̄ utọn̄ ikop ukwọrọikọ esie?
4 Nọ Mme Ekikere: Jesus ama eteme mbet esie n̄ko nte mmọ ẹkpekwọrọde ikọ. (Matt. 10:5-14) Afo emekeme ndinam ntre ye obufa asuanetop. Ke ini enye etịn̄de ikọ, nen̄ede kpan̄ utọn̄. Ndien ẹma ẹkpọn̄ enyịnusụn̄ oro, toro enye ke ofụri esịt, idem ọkpọkọm omokụt mme itie oro oyomde enye anam n̄kọri. Mbemiso ọnọde enye ekikere, emekeme ndibet nse m̀mê enye ayafiak anam ukem n̄kpọ oro ke enyịnusụn̄ en̄wen. Ekeme ndidi idem ekenyek enye. Ti n̄ko ete ke mme asuanetop ẹnyene nsio nsio ukeme, ye nte ke ẹkeme ndida nsio nsio usụn̄ nnam n̄kpọ.—1 Cor. 12:4-7.
5. Nso ke ikeme nditịn̄ ke ini iyomde ndinọ asuanetop ekikere mban̄a se enye akpanamde?
5 Ndusụk ini, obufa asuanetop ọyọdọhọ fi eteme imọ se ikpanamde. Edi edieke enye mîdọhọke fi an̄wam imọ, domo ndin̄wam enye. Didie ke ekeme ndida mbufiọk nnam emi? Ndusụk asuanetop oro ẹnyenede mbufiọk ẹsibụp ẹte, “Ndi mmekeme ndinọ fi ekikere?” mîdịghe, “Afo ekere ke nneme oro eketie didie?” Usụn̄ en̄wen edi ndidọhọ, “Ke akpa ini oro n̄kọtọn̄ọde ndikwọrọ ikọ, ama esisọn̄ mi ndi . . . , edi se ikan̄wamde mi ekedi . . . ” Ndusụk ini, ọfọn nditie ọtọkiet ndụn̄ọde n̄wed Reasoning m̀mê ekpri n̄wed Nte Ẹkpetọn̄ọde Ẹnyụn̄ Ẹkade Iso ke Nneme Bible. Mbak udutịn̄ ikọ ye enye awak akaha, nọ enye ekikere ban̄a n̄kpọ kiet kpọt ke ukwọrọikọ esie.
6. Didie ke ‘ukwak esiban ukwak ọsọp’ ke an̄wautom?
6 Ukwak Aban Ukwak Ọsọp: Paul ama esịn udọn̄ ọnọ Timothy oro ekenyenede mbufiọk ndikwọrọ ikọ, ete enye aka iso esịn idem ke ndinọ ukpep ye ke ndinam n̄kọri. (1 Tim. 4:13, 15) Okposụkedi emi edide nte ke ediwak isua ẹbe tọn̄ọ nte ọkọtọn̄ọ ndikwọrọ ikọ, ikpanaha etre ndifori usọ fo. Kpep n̄kpọ to mme asuanetop oro ẹsisan̄ade ye afo, idem ọkpọkọm mmọ ẹnyene esisịt ifiọk ke ndikwọrọ ikọ, nyụn̄ ben̄e idem ndin̄wam mbon en̄wen, akpan akpan mbufa owo, man mmọ ẹkabade ẹdi mme ọkwọrọ eti mbụk oro ẹnyenede mbufiọk.—N̄ke 27:17.