Du ke Mben̄eidem Nditọn̄ọ Ukpepn̄kpọ Bible
1. Ndinam utom oro Jesus ọkọdọhọde ẹnam ke Matthew 28:19, 20, abuana nso?
1 Jesus ọkọdọn̄ nnyịn ete ‘ikanam mme owo ẹdi mbet inyụn̄ ikpep mmọ n̄kpọ.’ (Matt. 28:19, 20) Ntem, iyom ndidu ke mben̄eidem kpukpru ini nditọn̄ọ ukpepn̄kpọ Bible, idịghe sụk ke usen kiet oro ẹsiode ẹnịm san̄asan̄a ndiyom mbon emi ẹdinyịmede ukpepn̄kpọ Bible. Mme ekikere oro ẹtienede mi ẹkeme ndin̄wam fi.
2. Ikpodomo nditọn̄ọ ukpepn̄kpọ Bible ye mme anie?
2 Yom Mbon Emi Ẹdinyịmede: Adan̄a nte iyomde mbon emi ẹdinyịmede ukpepn̄kpọ Bible, ntre ke idinyene ifet nditọn̄ọ ukpepn̄kpọ Bible. (Eccl. 11:6) Ndi akanam omodomo nditọn̄ọ enye nnennen nnennen? Esop kiet ke United States ẹma ẹnen̄ede ẹsịn ukeme ndinam emi ke ofụri ọfiọn̄ kiet. Esịt ama enem mmọ eti eti nditọn̄ọ mbufa ukpepn̄kpọ Bible 42! Kûkere ute ke mbon emi ẹnyenede udọn̄, oro afo esikwọrọde ikọ ọnọ ẹfefiọk ke afo akpama ndikpep Bible ye mmọ. Ke ini afiakde aka ebịne mmọ, ntak mûdọhọke ke ikpama ndikpep Bible ye mmọ? Edieke mmọ mînyịmeke ke isan̄ enye oro, mfịna idụhe. Emekeme ndisụk n̄ka iso nnyene nneme ye mmọ. Ndi omobụp mme mbọhọidụn̄ fo, iman, mbon itieutom, ye nditọ ufọkn̄wed m̀mê mmọ ẹkpema afo ekpep Bible ye mmọ? Afo emekeme ndibụp nditọ ukpepn̄kpọ Bible fo n̄ko m̀mê mmọ ẹnyene mme ufan ye iman emi ẹkpemade ndikpep Bible.
3. Ewe eti n̄kpọ utom ke inyene ndida ntọn̄ọ ukpepn̄kpọ Bible, ndien ini ewe ke ikpada enye inam n̄kpọ?
3 N̄kpọ Un̄wam: Tract oro Nte Akpama Ndifiọk Akpanikọ? eyenen̄ede an̄wam fi nditọn̄ọ mme ukpepn̄kpọ Bible. Afo emekeme ndinọ mme enyeneufọk tract emi edide mmọ ẹbọ mme n̄wed eken m̀mê ibọhọ. Ẹkeme ndikama enye nnam utom ke mme efakutom mbubehe, ke ini ẹkwọrọde ikọ ke efak, ke ini ẹwetde mme leta, ye ke ini ẹnamde mfiakn̄ka. Ẹkeme n̄ko ndinịm enye nnọ mbon oro mîsidụhe ke ufọk. Ntak mûkamake enye ke ini odụkde n̄kpọisan̄ ofụri owo, ke ini akade ndidep n̄kpọ, ye ke ini odude ke itieutom? Ẹtịn̄ ibio ibio ẹban̄a nte isikpepde Bible, ẹnyụn̄ ẹtịn̄ n̄kpọ ẹban̄a n̄wed Bible Ekpep ke akpatre page tract oro.
4. Didie ke ikeme ndida tract Ndifiọk Akpanikọ ntọn̄ọ ukpepn̄kpọ Bible?
4 Ke ama ọkọkpọn̄ tract oro ọnọ owo oro, afo emekeme ndiwụt enye mme mbụme oro ẹdude ke akpa page oro onyụn̄ obụp ete, “Ewe ke otu mbụme emi ke afo akpama ẹbọrọ?” Ekem neme ibọrọ oro odude ke tract oro ye enye, nyụn̄ kot mîdịghe tịn̄ se idude ke akpatre page oro, emi enemede nte isikpepde Bible. Afo emekeme ndien ndiwụt enye ebiet oro ẹnemede n̄kpọ efen efen ẹban̄a ibuotikọ oro ke n̄wed Bible Ekpep, ọnọ enye n̄wed oro, onyụn̄ odiomi ndifiak ndi man aka iso ke nneme oro.
5. Ntak emi ikpodude ke mben̄eidem nditọn̄ọ ukpepn̄kpọ Bible?
5 Ke efakutom nnyịn, isụk inyenyene mme owo oro ẹyomde ndifiọk se Bible enen̄erede ekpep. Ke ini idude ke mben̄eidem nditọn̄ọ ukpepn̄kpọ Bible, eyenem nnyịn esịt ndida akpakịp ifet oro inyenede ndin̄wam mbon en̄wen ẹsan̄a ke usụn̄ oro adade esịm uwem.—Matt. 7:13, 14.