Obufa Ediye Uduot Ekpri N̄wed Oro Ẹdinọde!
1. N̄wed ewe ke idinọ ke November, ndien nso idi uduak n̄wed emi?
1 Ke mbono district “Ẹdu ke Ukpeme!” nnyịn eke 2009/2010, ẹma ẹsio obufa ediye uduot ekpri n̄wed oro ẹkotde Nso Idi Etop Bible? Mme esop ke ofụri ererimbot ẹyetọn̄ọ ndinọ mme owo n̄wed emi ke November. Nso ufọn ke n̄wed emi edinyene inọ mme owo ke efakutom nnyịn? Ediwak owo, akpan akpan mbon oro mîdịghe mme Christian, itịmke ifiọk Bible. Ntem, ẹtịn̄ ke ọyọhọ page 3 ke ediye uduot ekpri n̄wed emi nte ke ẹsio enye man ẹn̄wam owo “ọfiọk mme akpan n̄kpọ oro ẹdọn̄ọde ke Bible.”
2. Didie ke ikpọnọ ediye uduot ekpri n̄wed emi?
2 Nte Ẹdinọde N̄wed Emi: Imekeme ndidọhọ ntem ite: “Ikpama ndifiọk se afo ekerede aban̄a emi. [Kot 2 Timothy 3:16.] Ediwak mbon oro isobode ẹnyịme se ẹtịn̄de ke itien̄wed emi; edi mmọ eken ẹkere ke Bible onyụn̄ edi eti n̄wed. Nso ke afo ekere aban̄a Bible? [Bet ibọrọ.] Inamke n̄kpọ m̀mê nso ke inịm ke akpanikọ, ediwak nti ntak ẹdu oro akpanamde idụn̄ọde Bible. [Kot akpa ikpehe ekikere ke enyọn̄ page 3.] Nte afo okotde mbio mbio ndinem mbụk Bible oro ẹdude ke ediye uduot ekpri n̄wed emi, oyokụt n̄kpọ kiet oro edinemde fi: Bible enyene akpan ibuotikọ ye akpan etop kiet.”
3. Ewe usụn̄ nneme efen ke ikpada inam n̄kpọ, akpan akpan ke efakutom oro ediwak owo mîdịghe mme Christian?
3 Usụn̄ efen oro ẹkpenọde n̄wed oro edi emi, akpan akpan edieke ọkwọrọde ikọ ke ebiet oro ediwak owo mîdịghe mme Christian: “Ikpama ndifiọk ekikere fo ke se itie N̄wed Abasi emi etịn̄de (mîdịghe ke se etịn̄de mi ke edisana n̄wed emi). [Kot Psalm 37:11.] Afo ekere ke ererimbot editie didie ke ini ntịn̄nnịm ikọ emi osude? [Bet ibọrọ.] Emi owụt idotenyịn ye ndọn̄esịt oro mme owo ke nsio nsio idụt, emi ẹnyụn̄ ẹnịmde nsio nsio n̄kpọ ẹkemede ndinyene nto Bible.” Kot akpa ikpehe ekikere ke enyọn̄ page 3, ekem nọ ediye uduot ekpri n̄wed emi.
4. Didie ke ikeme ndida ediye uduot ekpri n̄wed emi ntọn̄ọ ukpepn̄kpọ Bible?
4 Tọn̄ọ Ukpepn̄kpọ Bible: Ke ini ifiakde ika, imekeme nditi enyeneufọk se ikenemede inyụn̄ ineme ikpehe ekikere kiet m̀mê iba ke ibuotikọ oro ikenemede, ibụp mme mbụme oro ẹdude ke utịt ikpehe oro. Mîdịghe edieke iyomde ndinọ n̄wed Bible Ekpep idaha oro, imekeme ndikot se idude ke edem ediye uduot ekpri n̄wed oro ye enye, iyak n̄wed Bible Ekpep inọ enye, ibụp enye m̀mê ewe ibuotikọ ke enye ama, inyụn̄ ineme ikpehe ekikere kiet m̀mê iba ke ibuotikọ oro ye enye. Kpukpru nnyịn ikpakam ibuana ọyọhọ ọyọhọ ke ndinọ ediye uduot ekpri n̄wed emi ke November!