Da Enye Nam N̄kpọ ke Kpukpru Idaha
1. Tract Ndifiọk Akpanikọ ọfọn ke ndida nnam nso?
1 Ẹtịm tract Nte Akpama Ndifiọk Akpanikọ? ndin̄wam nnyịn itọn̄ọ ukpepn̄kpọ Bible. Edi, enye n̄ko edi eti n̄kpọutom oro ikemede ndida nsuan n̄kpasịp akpanikọ. (Eccl. 11:6) Ndusụk ekikere oro ẹnọde ndin̄wam nnyịn ida tract emi inam n̄kpọ nte ọfọnde ẹdi emi.
2. Didie ke ikeme ndida tract emi ntọn̄ọ nneme?
2 Nditọn̄ọ Nneme: Afo emekeme ndiyak tract emi nnọ enyeneufọk, owụt enye mbụme itiokiet oro ẹdude ke akpa page esie, onyụn̄ obụp ete: “Ewe ke otu mme mbụme emi ke afo esibụp idemfo?” Ke enyeneufọk ama ọkọbọrọ, da tract oro neme ibọrọ oro Bible ọnọde ke kiet ke otu mbụme esie nyụn̄ kot kiet ke otu mme itie N̄wed Abasi oro ẹsiakde ẹsịn. Kot mîdịghe tịn̄ n̄kpọ ibio ibio ban̄a se idude ke akpatre page tract emi, nyụn̄ nọ n̄wed Bible Ekpep. Idem ọkpọkọm enye ibọhọ n̄wed oro, enye ọbọ tract, emi ekemede ndinam akpanikọ ọtọn̄ọ ndidọn̄ n̄kam ke esịt esie.—Matt. 13:23.
3. Nso ke ikeme ndinam edieke enyeneufọk mînyeneke ini?
3 Edieke Enyeneufọk Mînyeneke Ini: Afo emekeme ndidọhọ ete: “Sia mûnyeneke ifet idahaemi, yak n̄kpọn̄ tract emi ye afo. Enye enyene mbụme itiokiet emi ata ediwak nnyịn isibụpde onyụn̄ owụt nte Bible ọbọrọde mbụme kiet kiet nnennen nnennen. Mbọk sian mi se afo ekerede ke ima ifiak isobo.”
4. Nso ke ikpetịn̄ ke ini inọde tract emi ke adan̄aemi ikwọrọde ikọ ke efak?
4 Ke Ini Ikwọrọde Ikọ ke Efak: Afo emekeme ndidọhọ: “Mmọkọm-o. Ndi akanam omobụp ekededi ke otu mme mbụme emi? [Bet ibọrọ.] Tract emi owụt mme in̄wan̄-in̄wan̄ ibọrọ Bible oro ẹnọde uyụhọ.” Edieke owo oro mîtiehe itọk-itọk, afo emekeme ndineme kiet ke otu mme ibọrọ mbụme ke tract emi, emekeme ndikam nnọ n̄wed Bible Ekpep.
5. Didie ke ikpada tract emi inam n̄kpọ ke ini ke ini ye mbon oro mîsidụhe ke ufọk?
5 Mbon Oro Mîsidụhe ke Ufọk: Ke ndusụk efakutom, mme asuanetop ẹsinịm n̄wed ke ebiet oro mbon en̄wen mîdikwe ẹnọ mbon oro mîsidụhe ke ufọk. Edieke ẹsinamde ntre ke esop mbufo, ntak mûnịmke tract Ndifiọk Akpanikọ ke ini ke ini unọ utọ mbon oro? Ke ini afiakde aka, afo emekeme ndidọhọ ete: “Isan̄ oko ikedide, ukodụhe ke ufọk, ntre ima isịn tract emi ke idak enyịnusụn̄ fo. Ewe ke otu mme mbụme emi ke afo akpama ẹbọrọ?”
6. Nso inam tract Ndifiọk Akpanikọ edi eti n̄kpọutom ndida n̄kwọrọ ikọ?
6 Tract Ndifiọk Akpanikọ eneme akpanikọ ke mmemmem ye in̄wan̄-in̄wan̄ usụn̄. Mme owo ke kpukpru ebiet ye ke kpukpru ido ukpono ẹma enye. Emem utom ndinọ tract emi; idem nditọwọn̄ ye mbufa mme asuanetop ẹkeme ndinọ enye. Ndi afo ke ada enye anam n̄kpọ ke kpukpru idaha oro ẹdotde?