Ẹnam Mme Magazine Nnyịn Man Edemede Nsio Nsio Owo Udọn̄
1. Didie ke ofụn emi anamde akpanikọ onyụn̄ enyenede ọniọn̄ ekpebe apostle Paul?
1 Kpa nte apostle Paul ọkọkwọrọde eti mbụk ke nsio nsio usụn̄ man ekeme ndisịm “kpukpru orụk owo,” ofụn emi anamde akpanikọ onyụn̄ enyenede ọniọn̄ esitịm mme magazine nnyịn man otụk mme owo ke nsio nsio idaha ke uwem ye se mmọ ẹnịmde ke akpanikọ. (1 Cor. 9:22, 23) Man ikeme ndida Enyọn̄-Ukpeme ye Awake! nnam n̄kpọ nte ọfọnde, ọkpọfọn isinyene mme owo emi ẹdikotde mme magazine emi ke ekikere.
2. Ẹnam Awake! ndidemede udọn̄ mmanie?
2 Awake!: Enam magazine emi ẹnọ utọ mme owo nte mbon oro apostle Paul ẹketịn̄de ikọ ọnọ, ke ini enye ekenyenede nneme ye “mbio Athens.” (Utom 17:22) Mmọ ikedịghe mme Christian, ntem mmọ ikenen̄ekede ifiọk N̄wed Abasi. Kpasụk ntre, ẹnam Awake! ẹnọ mbon oro ẹnyenede esisịt ifiọk Bible mîdịghe mbon oro mînyeneke-nyene. Ekeme ndidi mmọ inyeneke ifiọk iban̄a ukpepn̄kpọ mme Christian, ibuọtke idem ke ido ukpono, mîdịghe ifiọkke ke Bible enyene ata ufọn. Akpan uduak Awake! edi ndinam mme andikot enye enịm ke ata Abasi odu. Uduak n̄wed emi n̄ko edi ndinam ẹnịm Bible ke akpanikọ nnyụn̄ n̄n̄wam mme andikot enye ẹfiọk ke Mme Ntiense Jehovah edi isio ye mme n̄ka ido ukpono eken.
3. Ẹnam Enyọn̄-Ukpeme eke Nsiondi Ofụri Owo ye Nsiondi Eke Ukpepn̄kpọ ẹnọ mmanie?
3 Enyọn̄-Ukpeme: Ẹnam Enyọn̄-Ukpeme eke Nsiondi Ofụri Owo ẹnọ mbon emi ẹnyenede ukpono ẹnọ Abasi ye N̄wed Abasi. Mmọ ẹnyene esisịt ifiọk ẹban̄a Bible edi itịmke ifiọk se Bible ekpepde. Mmọ ẹtie nte mbon oro Paul okokotde ‘mme abak Abasi.’ (Utom 13:14-16) Ẹtịm Nsiondi Eke Ukpepn̄kpọ ẹnọ Mme Ntiense Jehovah akpan akpan. Paul akada mbon oro ẹkekotde mme leta esie nte mmọ emi ẹfiọkde N̄wed Abasi ẹnyụn̄ ẹnyenede nnennen ifiọk akpanikọ. (1 Cor. 1:1, 2) Kpasụk ntre, ẹwet mme ibuotikọ ke Nsiondi Eke Ukpepn̄kpọ ẹnọ mbon oro ẹsidụkde mme mbonoesop, emi enyụn̄ ẹmehede ye mme ikọ ye mme ukpepn̄kpọ Mme Ntiense.
4. Ntak emi ikpemehede ye nsiondi magazine kiet kiet oro inọde ke an̄wautom?
4 Okposụkedi emi isidiande mme magazine iba emi inọ inikiet, isitịn̄ n̄kpọ iban̄a kiet kpọt ke ini inọde mmọ. Mmọdo, kụt ete ememehe ye nsiondi kiet kiet. Do afo eyekeme ndinọ mbon oro afo osobode magazine oro edidemerede mmọ udọn̄.