N̄wam Enyeneufọk Ọkọk Ibuot
1. Ewe usụn̄ unyene nneme ọfọn akan ke an̄wautom?
1 Ewe usụn̄ unyene nneme ọfọn akan ke an̄wautom—nditịn̄ ikọ ye unana n̄kọkibuot m̀mê ndin̄wam enyeneufọk ọkọk ibuot onyụn̄ esịm nnennen ubiere? Apostle Paul akada ọyọhọ usụn̄ iba emi anam n̄kpọ ke ini enye eketịn̄de ikọ ye mme Jew ke Thessalonica, ndien “ndusụk mmọ [ẹma] ẹkabade ẹdi mme andinịm ke akpanikọ.” (Utom 17:2-4) Nso ibuana ke ndikọk ibuot ye mbon en̄wen?
2. Didie ke ikpekpebe uwụtn̄kpọ Paul ke ini ibuanade eti mbụk ye mme owo?
2 Kere Ban̄a Ekikere Mme Owo ye Idaha Mmọ: Ndikọk ibuot ye mme owo abuana edikere mban̄a ekikere mbon oro ẹdude ke efakutom nnyịn. Paul ọkọtọn̄ọ nneme ye mme Greek oro mînịmke ke akpanikọ ke Areopagus ke nditịn̄ mban̄a se mmọ ẹkefiọkde ẹnyụn̄ ẹnịmde ke akpanikọ. (Utom 17:22-31) Mmọdo, ke ini etịmde se afo edinemede, kere ban̄a se ediwak owo ke efakutom mbufo ẹnịmde ẹnyụn̄ ẹmade. (1 Cor. 9:19-22) Edieke enyeneufọk afan̄ade n̄kpọ, domo ndiyom se mbufo mbiba ẹnyịmede, nyụn̄ da oro tọn̄ọ nneme.
3. Didie ke ndida usọ mbụp mbụme ekeme ndin̄wam nnyịn inen̄ede ikọk ibuot ye mbon en̄wen?
3 Da Usọ Bụp Mbụme: Nnyịn ikemeke ndinọ akaisan̄ ndausụn̄ esịm ebiet emi enye akade edieke nnyịn mîfiọkke ebiet oro enye odude. Kpasụk ntre, nnyịn idikemeke ndin̄wam enyeneufọk esịm nnennen ubiere edieke nnyịn mîfiọkke ekikere esie. Mbemiso Jesus ọkọkde ibuot ye andikpan̄ utọn̄ nnọ enye, enye ama esiwak ndibụp mbụme man ọfiọk se owo emi ekerede. Ke uwụtn̄kpọ, ke ini owo okobụpde Jesus ete, “Ndinam nso man nnyene nsinsi uwem?,” Jesus ama obụp enye mbụme man ọfiọk se enye ekerede mbemiso ọbọrọde. (Luke 10:25-28) Ke idaha efen, ke ini Peter mîkọbọrọke mbụme ọfọn, Jesus ama ada usọ obụp mbụme man enen̄ede ekikere Peter. (Matt. 17:24-26) Mmọdo, edieke enyeneufọk obụpde mbụme m̀mê etịn̄de se mînenke, imekeme ndibụp mbụme man in̄wam enye ọkọk ibuot ke n̄kpọ oro.
4. Ntak emi ikpodomode ndin̄wam enyeneufọk ọkọk ibuot?
4 Ke ini in̄wamde enyeneufọk ọkọk ibuot, nnyịn ikpebe Akwa Andikpep, Jesus, ye mme ọkwọrọ eti mbụk akpa isua ikie emi ẹkenyenede usọ. Nnyịn inọ enyeneufọk uku ye ukpono. (1 Pet. 3:15) Emi ekeme ndinam enye ọdọhọ nnyịn ifiak idi ini en̄wen.