“Ẹka Iso Ẹnam Emi”—Editi Oro Ẹdinịmde ke April 5
1. Ntak emi edinịm Editi edide akpan n̄kpọ?
1 “Ẹka iso ẹnam emi nditi mi.” (Luke 22:19) Jesus akada mme ikọ emi owụk mme anditiene enye ete ẹsiti n̄kpa uwa imọ. Kpukpru ufọn oro ibọde ito ufak anam usen Editi eke kpukpru isua edi ata akpan usen ọnọ nnyịn mme Christian. Nte Editi eke isua emi, oro ẹdinịmde ke April 5, asan̄ade ekpere, didie ke ikpowụt esịtekọm inọ Jehovah?—Col. 3:15.
2. Didie ke ikeme ndiwụt esịtekọm mban̄a Editi ke ndikpep nnyụn̄ ntie n̄kere mban̄a enye?
2 Tịm Idem: Imesitịm idem iben̄e mme edinam oro ẹdide akpan n̄kpọ ẹnọ nnyịn. Kpukpru owo ke ubon ẹkeme nditịm esịt mmọ mben̄e Editi ke ndineme nnyụn̄ ntie n̄kere mme n̄kpọ oro ẹketịbede ke mme akpatre usen oro Jesus okodude uwem ke isọn̄. (Ezra 7:10) Ndusụk itie N̄wed Abasi oro ẹnemede mme n̄kpọ emi ẹdu ke n̄wed usenọfiọn̄ ye ke Ẹdụn̄ọde N̄wed Abasi ke Usen ke Usen. Enyọn̄-Ukpeme eke February 1, 2011, page 23-24, ọdọn̄ọ ekese itie N̄wed Abasi ọkọrọ ye mme ibuotn̄wed ke Akakan Owo, oro ẹnemede mmọ.
3. Didie ke ikeme ndiwụt esịtekọm mban̄a Editi ke ndinam ekese ke an̄wautom?
3 Kwọrọ Ikọ: Imekeme ndiwụt esịtekọm n̄ko ke ndisịn ekese ini ke an̄wautom. (Luke 6:45) Ọtọn̄ọde ke Saturday, March 17, iyanam ubịnikọt ke ofụri ererimbot ndikot mbon en̄wen ẹdidụk Editi. Ndi emekeme ndinam ukpụhọde ke ndutịm fo man esịn ekese ini ke an̄wautom, iso-ọfọn nte asiakusụn̄ unọ un̄wam? Ẹmekeme ndineme emi nte ubon ke ini efen oro ẹdinịmde mbubreyo Utuakibuot Ubon mbufo.
4. Mme ufọn ewe ke ikeme ndibọ ke ini idụkde Editi?
4 Imesinen̄ede ibọ ufọn ke ini idụkde Editi kpukpru isua. Imesinen̄ede ikop idatesịt inyụn̄ itetịm ima Jehovah nte itiede ikere iban̄a mfọnido esie ke enye ndikọnọ ikpọn̄-ikpọn̄ edibon Eyen esie nte ufak. (John 3:16; 1 John 4:9, 10) Emi onụk nnyịn ikûdu uwem aba inọ idem nnyịn. (2 Cor. 5:14, 15) Emi n̄ko esịn udọn̄ ọnọ nnyịn nditoro Jehovah an̄wan̄wa. (Ps. 102:19-21) Ke akpanikọ, ikọt Abasi oro ẹwụtde esịtekọm ẹtie ye ọkpọsọn̄ udọn̄ ẹbet ifet oro nnyịn idinyenede ‘ndikwọrọ n̄kpa Ọbọn̄’ ke ini Editi ke April 5.—1 Cor. 11:26.